846 - Teygjustökk og síðbuxur

Fyrsta alvöru teygjustökkið sem ég sá á ævinni var fyrir allmörgum árum við Kringluna. Þar var öllum boðið að stökkva ef þeir þyrðu og lengi vel voru menn ekki áfjáðir í það. Einn lét sig þó hafa það og hoppaði af palli einum sem krani nokkur hélt í háalofti. Sá sem stökk og var með teygjukaðal um fæturna á sér var enginn annar en Tommi í Tommaborgurum sem nú er kominn með Fischerskegg eitt mikið og vígalegt. Mér þótti samt meira til hans koma í stökkinu.

Metró sem áður var byggingarvöruverslun í Skeifunni er nú tekin við McDonalds. Sama er mér. Væri kannski þess virði að setja saman vísu um það. Davíð sjálfur gæti komið þar við sögu. Dettur bara ekkert í hug. Samkvæmt mynd í Moggatetrinu virðist mér umbúðalínan minna á matvælalínu hjá MS.

Las í dag ágæta grein eftir Njörð P. Njarðvík í boði Láru Hönnu. Hún gerir það oft að taka myndir af athyglisverðum greinum og setja þær á bloggið sitt. Fyrir það er ég henni þakklátur því ég nenni yfirleitt ekki að lesa dagblöðin. Bloggið hennar og fleiri blogg skoða ég samt yfirleitt á hverjum degi.

Rauðhærður riddari reið inn í Rómaborg. Rændi þar og ruplaði rabbarbara, radísum og rófum. Hvað eru mörg R í því? Þetta er ein af þeim þulum sem vinsælar voru í mínu ungdæmi. Man að ég velti því líka oft fyrir mér hvað átt væri við þegar aldrað fólk talaði um sín sokkabandsár. Sjálfur man ég eftir að hafa verið í koti og notað sokkabönd þegar ég var lítill og hve mikil upphefð það var að fá að fara í síðbuxur.

Athugasemdir

[Svanur Gísli Þorkelsson, 27.10.2009 kl. 00:47]

Ég bloggaði fyrir skömmu smávegis um uppruna teygjustökks og uppskar í athugasemd helst þessa mynd;

 

Eitt sinn heyrði ég að McDonalds veitingastaðir þrifust illa í löndum og meðal þjóða sem á annað borð væri vant hollu og góðu fæði.

Ég las líka pistilinn hans Njarðar. Hann var góður en mér fannst hann samt horfa fram hjá kjarna málsins, sem er að flokksvöld eru forsenda alls valds á Íslandi og á meðan flokkspóltík stýrir landinu heldur valdapotið og flokkadrættirnir í öllum mikilvægum málflokkum áfram.

Stundum fer ég með þessa rullu um Rómarriddarann fyrir útlendinga til að leyfa þeim að heyra hvað kveðið er hart að errinu á Íslandi.

[Eygló, 27.10.2009 kl. 01:09]

Eins lítilfjörleg athugasemd og hugsast getur: Ég hef áhyggjur af því hvort Borgaratommi noti hár-/skeggnet við matseldina. Annars ætti maður von á að finna jólasveinatætlur í borgurunum (sem ég reyndar borða ekki)

[Sæmundur Bjarnason, 27.10.2009 kl. 04:18]

Takk, Svanur Gísli og Eygló.
Bloggaði um teygjustökkið vegna þess að ég sá myndband nýlega um svakalegt teygjustökk og svo Tommaskeggið í fréttum.
Svanur Gísli ég er sammála þér um pólitíkina. Finnst líka að pólitísk umræða fari mjög harðnandi þessa dagana.

[Sigurður Þór Guðjónsson, 27.10.2009 kl. 19:31]

Á þessu bloggi er Nirði umsvifalaust líkt við Hitler vegna þessarar greinar og spurt hvort hann sé með öllum mjalla. Það er mikill misskilningur að það séu nafnausar athugasemdir eða bloggarar undir dulnefni sem viðsjárverðastir og öfgafyllstir eru á  blogginu.

[Sæmundur Bjarnason, 28.10.2009 kl. 00:13]

Já, Sigurður. Svoleiðis er það nú. Þetta er gamall siður einsog Svanur Gísli útskýrir á sínu bloggi. Segir meira um Halldór en Njörð.