833 - Afastelpan litla

Auðvitað get ég um fátt annað hugsað en afastelpuna nýfæddu. Móðir hennar er frá Bahama eyjum svo hún valdi réttan dag til að koma í heiminn. Tólfti október er nefnilega svonefndur Kólumbusardagur og haldinn hátíðlegur víða. Að minnsta kosti í Bandaríkjunum. Þar er það reyndar jafnan gert annan mánudag í október. Í þetta skipti var 12. október einmitt mánudagur. 

Það var 12. október 1492 sem Kristófer Kólumbus steig á land á eyjunni San Salvador og hélt að hann væri kominn til Asíu. Svo var ekki því nú tilheyrir þessi eyja Bahama eyjaklasanum á Karíbahafi. Reyndar er líka til eyja í Galapagos eyjaklasanum undan Ekvador sem heitir San Salvador. Sú eyja er oft kölluð Santiago eyja.

Svo má ekki má rugla San Salvador eyjunum saman við höfuðborg El Salvador í Mið-Ameríku sem einnig er kölluð San Salvador. San Salvador eyja í Bahama klasanum er stundum kölluð Watling eyja. Þegar Kólumbus kom þangað er sagt að eyjaskeggjar hafi kallað eyjuna Guanahani.

Já ég veit að Leifur heppni Eiríksson fann Ameríku fyrstur Evrópumanna (eða öllu heldur Bjarni Herjólfsson - en förum ekki nánar út í það) Leifur hafði vit á að týna Ameríku aftur en vitið þið hvernig hann fékk viðurnefni sitt? Heppnin var ekki fólgin í því að finna Ameríku. Nei, hann var svo heppinn að bjarga heilli skipshöfn í sjávarháska.

Eyþór Árnason hlaut bókmenntaverðlaun Tómasar Guðmundssonar árið 2009 fyrir ljóðabókina „Hundgá úr annarri sveit." Eyþór þekki ég frá veru minni á Stöð 2 og hann er Moggabloggari og bloggvinur minn. Hefur ekki bloggað neitt nýlega. Alltaf skemmtilegur samt. Til hamingju Eyþór!

Þetta er að finna á RUV vefnum:

Eyþór er fæddur 2. ágúst 1954. Hann ólst upp í Skagafirði, á Uppsölum í Blönduhlíð, og stundaði almenn sveitastörf frameftir aldri og tilfallandi vinnu, svo sem við brúarsmíði og grenjavinnslu. Vorið 1983 útskrifaðist hann úr Leiklistarskóla Íslands. Eftir það tóku við ýmis verkefni eins og leikstjórn hjá áhugaleikfélögum og vinna við auglýsingagerð. Árið 1987 hóf hann störf hjá Stöð 2 sem sviðsstjóri og vann þar til 2006 er hann flutti sig yfir til Saga Film. Sem stendur er hann sjálfstætt starfandi.

Athugasemdir

[Ellismellur 14.10.2009 kl. 07:27]

Til hamingju með barnabarnið!

[Ólafur Sveinsson 14.10.2009 kl. 12:56]

Vangaveltur.

Gott að þú komst réttu skýringuna á nafngift Leifs heppna.  Er ekki önnur bábilja - "þeir sem guðirnir elska, deyja ungir."?  Þetta hefur ekkert með aldur að gera.  Þetta á frekar við um eldra fólk, það er, að þeir deyja ungir í anda, sem guðirnir elska. (grískt)

Allavegana vona ég það.

[Anna Einarsdóttir, 14.10.2009 kl. 13:02]

"Þeir sem guðirnir elska, deyja ungir" ....... ég hef bara aldrei þolað þetta orðatiltæki.  Hvaða skilaboð inniheldur þessi setning gagnvart góðu og guðhræddu fólki sem nær 100 ára aldri ?  

Á kjarnyrtri íslensku segi ég;  "Þetta meikar engan sens" !

[Benedikt Segura 14.10.2009 kl. 13:49]

Til hamingju Sæmundur og þér verðið að skila bestu kveðjum til Bjarna og konunar hans.

Svona til gamans með dagana þá var 12 octóber 2009 hér í Canada Þakargjördardagurinn sem er alltaf annar mánudagur i Október og hann Ísak Máni er fæddur þenann dag 2004 sem var þá 10 Október og er það afmæisdagur annars landkönuðar Dr Fridtjof Nansen. Sem leiddi Fram leiðangurinn mikla en hann var fæddur 1861.

Þetta verða vonandi miklir landkönuðir einhvern daginn.

Annars allt hið besta hér hjá okkur og við skilum bestu kveðjum til ykkar.

Benedikt Henry.

[Sæmundur Bjarnason, 14.10.2009 kl. 16:12]

Takk Ellismellur og Ólafur og Anna þetta með að þeir deyji ungir sem guðirnir elska hef ég alltaf litið á sem huggun eftirlifenda. Annað ekki.
Takk Henry. Það var búist við stelpunni fyrr og auðvitað vorum við búin að sjá þetta með Nansen en 12. er nú síst verri hvað þetta snertir.
Bið að heilsa.

[Ragnheiður , 16.10.2009 kl. 00:56]

Sæmundur , sem móðir ungs manns sem lést 21 árs, þá er það sem mín kæra Anna vitnar í ekki huggun.

Til hamingju með telpuna

Takk, les oft en kvitta sjaldan