820 - Ehemm

Er alveg stumm. Get ekkert gáfulegt sagt. Uppdráttarsýkin á Moggablogginu virðist vera að ná til ríkisstjórnarinnar. Held ég reyni bara að blogga um eitthvað annað. Kann hálfilla við mig í fréttaskýringarhlutverkinu. 

Loksins er ég búinn með bókina Skáldalíf. Aftarlega í henni er eftirfarandi klausa:

„Þegar Gunnar hélt til Danmerkur virtist vonlaust að gera skriftir að ævistarfi á Íslandi og þegar Þórbergur endurfæddist loks til ritstarfa var aðeins einn atvinnuhöfundur á Íslandi, Halldór Laxness. Þetta skýrir bæði stórhug Gunnars, sem hugðist semja skáldsagnabálk um íslenska þjóðarsögu og vitund, og frumleik Þórbergs í Bréfi til Láru. Þeir komu að óskrifaðri veröld."

Þetta er ekki rétt. Íslendingar eru og hafa alltaf verið mikið fyrir allskyns skriftir. Veröldin núna er alveg jafn óskrifuð og þegar Gunnar og Þórbergur voru að byrja. Auðvitað er næsta úrelt að skrifa orð á blað. Engum úrslitum ræður samt hvort menn hafa atvinnu af skrifum eða ekki. Gæðin skipta mestu máli.

Nú eru Bitrumálin að komast á dagskrá aftur. Veit ekki af hverju. Minnst var á þau í kommentum hjá mér og Lára Hanna er aftur komin í Bitru-gírinn. Leitaði í bloggum mínum hér og sá að ég hef sex sinnum minnst á Bitruvirkjun. Fyrst 22. nóvember 2007. Kannski er samt markverðasta greinin mín frá 17. maí 2008. Veit það samt ekki alveg því ég nennti ekki að lesa öll þessi sex blogg.

Ölkelduháls og hverasvæðið þar þekki ég vel. Um Hellisheiði og Hengladali hef ég víða flækst. Þekki að sjálfsögðu Klambragil og Grensdal. Einnig Innstadal, Fremstadal og Þrengslin, Meitlana tvo og Lambafellið, Skálafell, Geitafell, og svo framvegis. Hef gengið á þau fjöll öll. Einnig Hengilinn, Hrómundartind, Súlufell og sjálfsagt fleiri.

Ein er samt sú gönguleið sem ég hef aldrei farið en lengi ætlað mér að ganga. Það er leiðin úr Hafnarfirði (eða af Bláfjallaveginum) um Grindaskörð til Selvogs. Á þessari leið er mikið og gott útsýni. Einnig falleg fjallanöfn svosem Heiðin há og Fjallið eina. Landnámsmaður á svæðinu var Þórir haustmyrkur og þar áttust þær við tröllskessurnar Krýsa og Herdís. Í Herdísarvík bjó Einar Benediktsson sín síðustu æviár og Eiríkur í Vogsósum bjó að sjálfsögðu að Vogsósum og fleira mætti rifja upp.

Athugasemdir

[Lissy 1.10.2009 kl. 00:57]

This reminds me, for some reason, of sitting here at my table the other day, playing playdough with a little boy that lives nearby. He was making figures that looked like horses and cars, and I showed him how to make a flower. I keep thinking about the flower I made, and about him. His parents told him he did not need to go to school last week or this week, for some reason.

[Sæmundur Bjarnason, 1.10.2009 kl. 09:03]

Lissy, skil ekki hvernig saga þín tengist mínu bloggi en það skiptir svosem engu máli.

[Axel Þór Kolbeinsson, 1.10.2009 kl. 09:14]

Já Sæmundur, Bitruvirkjun gæti verið hið leiðinlegasta mál fyrir okkur rúm 2000 manns sem búum í Hveragerði í dag.

Annars hjó ég eftir örnefnunum Heiðin há og Fjallið eina.  Frá því að ég var krakki og sá þessi örnefni fyrst á korti hefur mér ekki þótt þau vera hugmyndarík.  Bæði eru margar hærri heiðar rétt eins og mörg fleiri fjöll.

[Sæmundur Bjarnason, 1.10.2009 kl. 11:33]

Axel Þór, vissulega eru til hærri heiðar og fleiri fjöll. Nöfnin finnst mér samt sérkennileg. Get þó ekki almennilega dæmt um hversu hugmyndarík þau eru nema þekkja staðhætti.