816 - Gestur Þórhallason

Frá því er sagt í Heiðarvígasögu að Víga-Styr hafi vegið Þórhalla bónda á Jörfa fyrir litlar sakir. Þórhalli átti tvö börn, Áslaugu og Gest. Voru þau bæði ung þegar faðir þeirra var veginn. Gestur Þórhallason var smár vexti og seinþroska. Nokkrum misserum seinna er það var ámálgað við Víga-Styr að hann bætti börnum Þórhalla föðurmissinn í einhverju tók hann því illa og einu föðurbæturnar sem þau fengu var grátt og illa haldið óþrifalamb.

Gesti líkaði þetta að vonum stórilla.

Einhverju sinni þurfti Víga-Styr að gista að Jörfa og laumaðist Gestur þá að honum og eins og segir í Heiðarvígasögu: höggur með öxi af öllu afli í höfuð hönum bak við eyrað hægra megin svo í heila stóð og mælti: „Þar launaði eg þér lambið grá," hleypur út laundyrnar og skellir í lás.

Ekki er að orðlengja það að þarna lét hinn mikli kappi Víga-Styr líf sitt við lítinn orðstír og er orðtakið að launa einhverjum lambið gráa frá þessu komið. Gestur Þórhallason komst undan og lík Víga-Styrs var flutt að Helgafelli til Snorra goða og segir frá þeim atburðum og ýmsu öðru í Heiðarvígasögu.

Nú er ég loksins að verða búinn að lesa bókina „Skáldalíf" eftir Halldór Guðmundsson. Hún er um margt mjög athyglisverð. Fátt eitt í bókinni kemur mér á óvart um Þórberg Þórðarsons. Meðal annars er það eflaust vegna þess að ég hef lesið mikið eftir hann og um hann auk þess sem ég hef alltaf haft nokkurt dálæti á honum.

Eins og flestir vita er einnig sagt frá Gunnari Gunnarssyni í þessari bók. Frásögnin af fundi hans með Hitler er æsispennandi. Hafði reyndar heyrt af henni áður en margt er samt mjög fróðlegt um Gunnar í bókinni. Höfundur bókarinnar er allan tímann dálítið utan og ofan við frásögnina og ekki er fyrir að synja að skoðanir hans liti hana dálítið.

Lára Hanna skrifar góðan pistil um Davíð Oddsson og Teitur Atlason á eyjunni.is bloggar líka skemmtilega um karlinn. Pistillinn hjá Teiti er þó alltof langur og of mikil fljótaskrift á honum. Lára Hanna finnst mér stundum of hatursfull í skrifum sínum og ekki síst þarna.

Athugasemdir

[Lára Hanna Einarsdóttir, 27.9.2009 kl. 00:37]

Þetta er ekki hatur, Sæmi minn, heldur fyrirlitning í bland við reiði og óþol. Það ergir  mig hvað fólk virðist fljótt að gleyma og segir endalaust að svart sé hvítt og jörðin flöt. Það á að vita betur.

[Sæmundur Bjarnason, 27.9.2009 kl. 01:13]

Mér finnst skrif þín stundum hatursfull. Veit samt auðvitað að þú hatar alls ekki þá sem þú ert að skrifa um. Til að halda geðheilsunni held ég að fólk þurfi að hætta að ergja sig þessi ósköp á bankahrunsmönnum. Vonandi verða þeir samt teknir í gegn þó síðar verði. Einhverjir verða samt að benda á ósköpin það skil ég vel.

[Brjánn Guðjónsson, 27.9.2009 kl. 03:40]

ég get susum stundum sett hugtök eins og reiði og gremju í samengi við skrif Láru Hönnu. þó aðallega tilfinningu fyrir réttlæti og sanngirni. hatur hef ég eldrei skynjað í hennar skrifum.

hatur er sterkt orð.

[Sæmundur Bjarnason, 27.9.2009 kl. 04:38]

Brjánn. Ef persónulegt hatur er það sama og hatursfull skrif í þínum huga þá höfum við bara mjög ólíkan orðskilning. Við því er kannski ekkert að gera.

[DoctorE 27.9.2009 kl. 14:02]

Mér finnst meira að þetta sé svona að fallast hendur yfir öllu ruglinu.
Hatur er gagnslaus tilfinning, gerir minna en ekkert gagn... er verri fyrir þann sem hatar en þann sem er hataður.

[Jón Steinar Ragnarsson, 27.9.2009 kl. 15:23]

Ég þarf að kíkja á skáldalíf. Vissi ekki að Gunnar hafi hitt Hitler. Sonur Gunnars Úlfur, skar upp og spengdi saman á mér lærlegginn, þegar ég var lítill. Handbragðið fær ekki hæstu einkun. Þetta tengir mig þá Adolf Hitler óbeint, sem mér þykir fjandi merkilegt.

[Sæmundur Bjarnason, 27.9.2009 kl. 16:28]

Jón Steinar, það er ekki nóg með að Gunnar hafi hitt Hitler heldur virtust einhverjir hafa haldið í alvöru að hann (Hitler) hefði flúið að Skriðuklaustri þegar allt var komið í eindaga hjá honum. Bókin er gull og mikið var vitnað í hana í fréttum á sínum tíma enda er heimildavinnan mikil og vönduð.

[DoctorE 27.9.2009 kl. 18:53]

Þannig að Hitler er hugsanlega á lífi, stjórnar íslandi ábakvið tjöldin.. ;)

[Sæmundur Bjarnason, 27.9.2009 kl. 20:23]

Nei, ég held Hitler sé örugglega dauður. Var ekki eitthvað nýlega í fréttum um brot úr hauskúpu sem átti að vera af Hitler? Man þetta ekki nákvæmlega.

[Finnur Bárðarson, 28.9.2009 kl. 15:14]

Ég er ekki reiðubúinn að bíða lengur eftir handtökum. Og ég vil meira að segja fá góða fauta til að handfjatla þá. Hatur, fyrirlitning, skiptir ekki máli hvaða orð maður notar yfir tilfinningar. Einhvers staðar er ég á því róli, svona mitt á milli.

[DoctorE 28.9.2009 kl. 15:33]

Hauskúpan af Hitler var af konu... sko Hitler er á íslandi, hann er feluformaður sjálfstæðisflokks :)
http://www.mbl.is/mm/frettir/erlent/2009/09/28/hofudkupa_hitlers_sogd_tilheyra_konu/