709- Af hverju ber ég ábyrgð á þessum fjára?

Að eiga banka er nokkurs virði. Gefa má út innistæðulausa tékka villt og galið út um allar jarðir. Að minnsta kosti ef þess er gætt að múta stjórnvöldum nægilega mikið til að þau láti allt reka á reiðanum.

Af hverju er ríkið eiginlega að taka þessar Icesave skuldir á sig? Ekki veit ég það en held að búið hafi verið að lofa samningum og hinn kosturinn hafi verið að láta bankana og allt klabbið fara lóðbeint á hausinn og hætta þessu streði. Það væri uppgjöf.

Með því að taka á sig ábyrgð á því eftirliti sem hefði átt að vera og láta allt líta út fyrir að vera sem eðlilegast má kannski vinna traust umheimsins á ný. Þannig hljóta núverandi stjórnvöld að hugsa.

Það væri hægt að sleppa því að borga og reyna að hengja sig á einhverja vafasama lagakróka. Gallinn er bara sá að í samskiptum þjóða gildir hnefarétturinn þegar í harðbakkann slær. Sá sterkasti vinnur.

Með því að kjósa yfir okkur vanhæf stjórnvöld tókum við öll ábyrgð á vitleysunni sem viðgekkst. Líka þeir sem kusu á móti stjórnvöldum. Kosningarétturinn kostar.

Auðvitað er hægt að yfirgefa bara skerið eins og margir hafa gert og fleiri munu líklega gera.

Núverandi stjórnvöld reyna að milda höggið með því að velta vandanum (eða hluta hans að minnsta kosti) á undan sér í sjö ár. Allur er ávinningurinn af þessu óljós og eini vinningurinn sem er í boði í núverandi þjóðarhappdrætti (eins og vel er hægt að kalla þetta allt saman) er að eðlilegt ástand skapist í landinu á sem stystum tíma.

Kannski verður boðað til nýrrar búsáhaldabyltingar fljótlega. Ekki tek ég þátt í henni. Mér finnst bara vera í boði að una við núverandi stjórn (þó slæm sé á margan hátt) eða fá yfir sig aftur samstjórn Framsóknar og Sjálfstæðisflokks. Eða algera upplausn.

Athugasemdir

[Sigurður Þór Guðjónsson, 8.6.2009 kl. 12:39]

Ég held því miður að upplausn sé framundan.

[Lára Hanna Einarsdóttir, 8.6.2009 kl. 13:32]

Það þarf ekki endilega að boða til byltingar til að steypa stjórninni. Það hlýtur að vera hægt að t.d. fjölmenna niður á Austurvöll til að lýsa yfir stuðningi eða andstöðu við einstök mál - eins og t.d. Icesave samninginn núna.

Við eigum að fagna áhuga og þátttöku almennings í stjórn landsins og því, að fólk er mun óhræddara nú en áður við að tjá skoðanir sínar. Það gerir lýðræðið mun virkara.

Í þetta sinn er verið að fjalla um eitt mál og fólk að segja skoðun sína á því, ekki ríkisstjórninni allri eins og var raunin í janúar.

Sjálfri finnst mér óráð að samþykkja samning sem ríkir jafnmikil óvissa um eins og þennan Icesave-samning. Við fáum lítið að vita um hann - og mér brá í brún þegar ég hlustaði á viðtalið við Ólaf Elíasson á Bylgjunni í morgun. Hlusta má á það hér - það er alveg í bláendann á Bítinu.

Ég vil alls ekki fá Sjálfstæðisflokk og Framsókn aftur í stjórn - en mér finnst sjálfsagt að veita núverandi stjórn aðhald. Og aðhaldið getur líka verið stuðningur við stjórnina. Hvað segja ekki erlendar ríkisstjórnir gjarnan - "Við getum ekki gert þetta eða hitt - það verður allt vitlaust í samfélaginu."

Sýnum að okkur er ekki sama hvernig farið er með skattpeningana okkar, líf okkar og afkomendanna.

[Axel Jóhann Hallgrímsson, 8.6.2009 kl. 14:35]

Hverju myndi það áorka að steypa stjórninni? Endurreisn stjórnarinnar sem var steypt í byrjun árs? Og steypa henni strax og hún færi í nauðsynlegar aðgerðir. Á að gagnrýna svo til skiptis aðgerðir og aðgerðaleysi?

Er það virkilega vilji þjóðarinnar að ekkert verði gert og látið reka á reiðanum. Nú kenna allir fjósamönnunum um skítinn, mönnunum sem standa sveittir og moka  flórinn. En beljurnar sem lögðu til skítinn eru enn að og baula undir með óánægjuröddunum, enginn minnist lengur á þær.

Eina leiðin til að komast hjá Icesave ábyrgðum var að láta allar innistæður hverfa í gjaldþrot bankanna. Íslenskt sparifé jafnt og erlent. Ríkið tryggði allar innistæður sparifjáreigenda í Íslenskum bönkum. Mismunun milli  innlendra og erlendra sparifjáreigenda var ekki inn í myndinni.

Krafan um að mismuna fólki eftir þjóðerni er ekki raunhæf. Við hefðum alveg eins getað ákveðið að aðeins Sjálfstæðismenn fengju sparifé sitt bætt. Þeir eru sannarlega til sem fyndist það hin mesta sanngirni rétt eins og sumum finnst eðlilegt að borga Jóni en svíkja John.

[EE elle 8.6.2009 kl. 15:19]

Nei, það var ljót skömm að mismuna fólki.  Innistæður okkar eru ekkert heilagri en innistæður útlendinga.  Og kannski er það akkúrat þessvegna sem verður að skrifa undir?  Og þó við ættum ekki að þurfa að borga horfnu milljarðana.  Axel, beljurnar eru enn oft í umræðunni.  Við gleymum þeim ekkert.

[EE elle 8.6.2009 kl. 15:50]

Missti mig þarna í líkingardæminu hans Axels um beljurnar.  Höfum það sökudólgarnir.

[Dude 8.6.2009 kl. 19:07]

Þetta er einfalt. Íslenskur almenningur ber ábyrgðina en neitar að taka hana. Það skýrist af því að Íslendingar kusu yfir sig fólk sem samþykkti fyrir hönd þess þessar ábyrgðir með því að leyfa Landsbankanum að safna innlánum með þessum hætti. Svo einfalt er það.

Þetta er sannleikurinn sem enginn vill heyra. Það er því frekar aumingjalegt að ætla að afneita þessari ábyrgð þegar það er alveg morgunljóst að hún er til staðar og engum nema kjósendum hér að kenna.

[Malína 9.6.2009 kl. 00:07]

Ég tek undir flest sem hefur komið fram hér að ofan en vil bæta þessu við:  Við þurfum að fara að ná auðdólgunum:

http://blog.eyjan.is/gunnaraxel/2009/06/08/rettlaetinu-tharf-ad-fullnaegja-fyrst/

[Malína 9.6.2009 kl. 00:12]

Og Nimbus - fyrst þú ert staddur hérna:  Ertu búinn að loka á athugasemdir frá mér?   Malínan kemst ekki inn á bloggið þitt til að láta ljós sitt skína.

[Sæmundur Bjarnason, 9.6.2009 kl. 00:43]

Takk öll.
Ég er á móti Icesave-samningum en tel þó mjög vafasamt að hægt sé að komast frá þessu máli öðru vísi en að semja um það.

[Malína 9.6.2009 kl. 00:58]

Við verðum að semja.  Like it or not - við Íslendingar komumst ekkert hjá því að skila aftur þýfinu sem íslensku auðdólgarnir stálu af breskum og hollenskum almenningi í gegnum innlánsreikningana í Ices(l)ave.