682- Um Evrópusambandið og ýmislegt fleira

Það kemur mér á óvart hve æstir menn verða við skrif um ESB. Um daginn las ég greinar eftir Jón Baldvin Hannibalsson annarsvegar og Egil Jóhannsson í Brimborg hinsvegar og báðir eru nokkuð ofstopafullir. Reyna samt að vera stilltir og málefnalegir.

Almenningur getur rætt þessi mál æsingalaust. Elítan jafnt sem einangrunarsinnar. Þeir sem hæst hafa um þessi mál eru eflaust að vona að þeir geti haft áhrif á pöpulinn. Þau áhrif eru mjög óbein. Flestir eru búnir að mynda sér skoðanir um þetta og aukin umræða sem þó getur verið skemmtileg bætir litlu við.

Evrópuandstæðingar hafa hátt um að verið sé að blekkja fólk með því að tala um viðræður um aðild. Þetta er í besta falli orðhengilsháttur. Þó sótt sé um aðild (með skilyrðum) er ekki þar með sagt að ekki sé hægt að hætta við. Það hafa Norðmenn gert í tvígang sem frægt er.

Sumir eru alltaf æstir þegar þeir ræða þessi mál.

Evrópuandstæðingar hafa hátt um massívan áróður fyrir aðild. Einhver nefndi að Fréttablaðið agiteraði daglega á þann hátt. Ég les Fréttablaðið afar sjaldan. Mun oftar lít ég í Morgunblaðið eða DV. Í sambandi við mál af þessu tagi held ég að áhrif hefðbundinna fjölmiðla séu lítil.

Ég hef verið þeirrar skoðunar síðan 1972 að við munum fyrr eða síðar enda í Evrópubandalaginu. Það er ekkert hættulegt að vera aðili að því. Fannst Ragnari Arnalds vefjast tunga um höfuð þegar hann átti að útskýra hvað væri svona hættulegt við viðræður um aðild.

Ætlaði ekki að ræða pólitísk mál á blogginu mínu. Það er bara svo erfitt að stilla sig og svo eru öll mál pólitísk ef út í það er farið.

Merkilegt hvað ég er orðinn marktækur. Menn eru bara farnir að skattyrðast við mig. Þó þetta sé bara í athugasemdum í bloggi sem fáir sjá þá finnst mér þetta athyglisvert. Ómerkingurinn ég er bara farinn að rífast við ókunnuga.

Á sigmund.is eru tíu þúsund skopmyndir eftir Sigmund. Sjáið bara. Á blogg.gattin.is er líka flesta daga að finna myndasögu eftir Henry Þór. Þær eru oft ekkert slor.

Sameinuð svínfuglaflensa
Líklega endar þetta með því að flensuskrattinn kemur hingað. Kannski verður hún ekkert verri en venjuleg flensa. Mig minnir hún geti verið slæm.

Um daginn minntist einhver á í sjónvarpsumræðum að skynsamlegra væri að ganga í NAFTA samtökin amerísku en Evrópusambandið. Þessu er ég algerlega ósammála. Ísland er Evrópuþjóð bæði menningarlega og sögulega. Við erum búin að mæna of lengi í vesturátt ef eitthvað er. Miklu nær er að við þokumst nær Evrópu en Ameríku.

Athugasemdir

[Lára Hanna Einarsdóttir, 13.5.2009 kl. 00:06]

Ekki gleyma Halldóri Baldurs, Sæmi...  hann er hér.

[Gunnar Ásgeir Gunnarsson, 13.5.2009 kl. 10:44]

Sjálfur ritstjóri Mbl flaggar heima sér ESB fánanum

Við sem stundum atvinnurekstur og höfum fengið kynnast ESB aðeins í gegnum EES samningin lítur þetta  hræðilega út. Hérna er sýnishorn af einni af mörgum reglugerðum sem ég ber að uppfylla að viðurlögðum starfsleyfissviptingum ef ég uppfylli ekki

[Sæmundur Bjarnason, 13.5.2009 kl. 11:06]

Svo var verið að óskapast yfir því hvað hættulegt væri að flytja inn kjöt frá Evrópusambandslöndum því svo mikil hætta væri á allskonar sýklum og öðrum ófögnuði. Það fannst mér ekki trúverðugt.

En vissulega þarf að huga að mörgu og Evrópusambandsaðild kemur misjafnlega við ýmsa hópa.

[Gunnar Ásgeir Gunnarsson, 14.5.2009 kl. 10:22]

Vandamálið er að koleggar okkar í Evrópu hlæja að þessu meðan við erum kaþólskari en páfinn.