680- Áður fyrr á Samvinnuskólanum að Bifröst

Skólablaðið á Samvinnuskólanum að Bifröst hét Vefarinn. Þar var án efa verið að vísa til vefaranna í Rockdale sem stofnuðu fyrsta kaupfélagið í heiminum. Já, Samvinnuskólinn var menntadeild framsóknarflokksins, sambandsins og kaupfélaganna. Þar stundaði ég nám árin 1959 til 1961. Samt varð ég ekki meiri framsóknarmaður en svo að ég minnist þess ekki að hafa kosið þann flokk nema einu sinni um æfina. Ég taldi mig fremur til svokallaðra Möðruvellinga en þaðan kom Ólafur Ragnar Grímsson ef ég man rétt.

Þó ég hafi ekki kosið framsóknarflokkinn nema einu sinni hef ég kosið flesta flokka aðra, nema sjálfstæðisflokkinn, öðru hvoru. Sjálfstæðisflokkinn hef ég aldrei kosið en verið hallur undir ný framboð. Til dæmis kaus ég „frjálslynda og vinstri menn" á sínum tíma og leit á Magnús Torfa Ólafsson sem minn mann.

Baldur Óskarsson var sá af bekkjarbræðrum mínum sem flestir bjuggust við að færi í pólitík. Það gerði hann þó ekki nema að takmörkuðu leyti. Aftur á móti hugsa ég að úr fáum bekkjum hafi komið jafnmargir kaupfélagsstjórar.

Á mínum skólaárum á Bifröst var svona þrisvar eða fjórum sinnum gefið út fjölritaða blaðið „Þefarinn". Nafnið var auðvitað stæling á nafni sjálfs skólablaðsins og þar létu menn gamminn geysa um ólíklegustu málefni og þefuðu uppi allskyns hneykslismál. Held að ég eigi einhvers staðar í drasli hjá mér einhver eintök af þessu merka blaði.

Á Bifröst var margt brallað. Meðal annars rákum við innanhúss útvarpsstöð í hátalarakerfi því sem var þar á herbergjunum. Bifröst var nefnilega fínasta hótel á sumrin og útvarpshátalari í hverju herbergi. Mér er minnisstæð morgunleikfimislýsing Baldurs Óskarssonar þar en ætla ekki að fjölyrða um hana hér.   

Í anda alvöru stéttaskiptingar voru tveir ljósmyndaklúbbar að Bifröst. Annars bekkingar voru að sjálfsögðu yfirstéttin. Þeir höfðu á sínum snærum ljósmyndaklúbbinn „Foto". Þar réði ríkjum sem formaður Kári Jónasson sem seinna varð fréttastjóri ríkisútvarpsins og ritstjóri Fréttablaðsins.

Öreigastéttin sem við fyrstubekkingar tilheyrðum hafði ljósmyndaklúbbinn „Fókus". Þar vildi svo til að ég var kosinn formaður vegna þess að ég hafði fiktað við framköllun áður og þekkti muninn á framköllunarbaði og fixerbaði.

Þetta með stéttaskiptinguna missir kannski dálítið marks því ég man ómögulega hvernig starfsemi ljósmyndaklúbbanna var háttað seinni veturinn minn að Bifröst. Þá var ég samt í öðrum bekk og hefði átt að vera í yfirstéttarklúbbnum „Foto", en man bara ekkert eftir því.

Og nokkrar myndir:

Auglýsing á Lækjartorgi.

Allt á rúi og stúi.

Eitt stykki tónlistarhús í smíðum.

Gamalt hús við Grettisgötu eða einhvers staðar þar.

Rok við Rauðavatn.

Pálmatré í Reykjavík.

Glaðlegir garðálfar.

Falleg blóm.

Þykkskinnungur í Garðheimum.

Athugasemdir

[Ellismellur 10.5.2009 kl. 21:29]

Heyrðu, Sæmundur. Einhvernveginn finnst mér að þetta stéttaskiptingafyrirkomulagi hafi verið aflagt þennan vetur, sem við vorum samtíða. Gæti nefnilega ímyndað mér, að þessi lýðræðislega sinnaði bekkur, sem þú tilheyrðir, hafi tekið þá ákvörðun að klúbburinn yrði bara einn. Ég kom lítið þar við sögu en samt eitthvað smávegis. Annað apparat var það þarna uppfrá, sem fór alltaf í taugarnar á mér. Það var akademían, sem mér skilst að Guðmundur skólameistari hafi komið á fót. Svoleiðis snobbfyrirbrigði fannst mér þá og finnst ekki enn að hafi fallið inn í íslenskan hugsunarhátt sem félagslegt fyrirbrigði. Það er ekki fyrr en síðustu 10 - 15 árin eða svo sem manni þykir trúlegt að það hefði átt tilverugrunn og hafi svo verið, er sá tími liðinn nú - vona ég.

[Sæmundur Bjarnason, 10.5.2009 kl. 21:40]

Já, mig rámar í þetta Akademíumál. Held að einhverjir af mínum bekkjarbræðrum hafi komist í hana. Gott ef Árni Reynisson, Baldur Óskarsson og Jón Eðvald voru ekki allir í henni. Ég er þó ekki viss um það. Ég er ekki viss um að þessi klúbbaskipting hafi verið nema í ljósmyndaklúbbunum.

[Rebekka, 14.5.2009 kl. 20:26]

Voðalega er nú heimurinn lítill.  Ég ramba inn á bloggið þitt af rælni, og sé hérna mynd af húsi frænku minnar á Grettisgötunni!  

[Sæmundur Bjarnason, 14.5.2009 kl. 20:46]

Já, mér finnst húsið flott og fallegt á litinn.