653- Af hverju mistókst útrásarvíkingunum að sölsa undir sig Orkuveituna?

Varðandi pólitík hef ég ekki miklu við það að bæta sem ég hef áður skrifað. Ég bíð eftir marktækri skoðanakönnun og tel að það sem einkum verður rætt um varðandi bankahrun og stjórnmál fram að kosningum sé kosningaáróður. 

Ég er svo undarlega þenkjandi að mér finnst lykilspurningin í spillingarmálunum vera þessi: Af hverju mistókst útrásarvíkingunum að sölsa undir sig Orkuveituna? Á þessum tíma mistókst þeim ekki margt. Eiginlega var allt sem þeir gerðu gott og fallegt. Stöku sinnum dálítið torskilið en gott samt.

Ég mun svo reyna að forðast að fjalla um stjórnmál framvegis. Það er óttalega tilgangslaust. Flestir eru búnir að ákveða sig og álit minni háttar bloggara skipta litlu. Hætt er við að ef maður álpast til að blogga um stjórnmál sé erfitt að hemja sig. Haldi semsagt áfram að blogga um þessa vitleysu og annað komist varla að. Fjölbreytni er aðalkostur bloggsins.

Ég les alltaf málfarspistlana Eiðs Guðnasonar. Hann er samt stundum fullsmámunasamur. Um daginn var hann að afsaka villur (sínar eigin) með því að hann kunni ekki fingrasetningu. Hafi lært í MR og þar hafi verið til siðs að kalla Verslunarskólann vélritunarskólann. Ég lærði fingrasetningu á Bifröst. Það var fyrir daga rafritvélanna. Mér er alltaf minnisstæður djöfulgangurinn sem skall á í skólastofunni þegar okkur var sagt að byrja.

Athugasemdir

[Sæmundur Bjarnason, 14.4.2009 kl. 13:45]

Já, það er eflaust ástæðan fyrir því að VG bæta stórlega við sig. Ég hef samt mínar efasemdir um þá.

[EE elle 14.4.2009 kl. 14:17]

Sæll Sæmundur.  Já, það finnst mér líka lykilmál að vita: Hvað stoppaði það að peningagróðaníðingar næðu Orkuveitunnni undir sig?

Ég efast um alla flokka.  Og þó mér virðist VG vera heiðarlegastir þeirra.  En enn geturm við ekki kosið fólk og sitjum uppi með hættulegt flokkavald.  Hvað varð af hreyfingunni hans Ómars?  Kannski mun Borgarahreyfingin geta vegið gegn flokkavaldi pólistísku flokkanna?  

[Rósa 14.4.2009 kl. 14:24]

Auðmennirnir vildu taka ákvarðanir of hratt fyrir getu stjórnmálamannanna. Stjórnmálamenn geta bara hugsað í flokksmaskínu og það tekur tíma að plotta. 

Svo voru þeir líka of gráðugir þegar þeir settu vini sína, strákana að kjötkötlunum of fljótt. Mágkona Finns, auglýsingasölumenn og klúbbfélagar. Allir voru þarna, Framsóknar- og Sjálfstæðismenn, auð- og embættismenn. Allir áttu að fá sneið af kökunni. En þetta var of geist farið, ekki gefinn nógu mikill tíma til að tryggja plottið. Og Sóla og Svandís fóru að ibba gogg. 

[Júlíus Valsson, 14.4.2009 kl. 15:12]

Stjarnfræðilegar háar tölur í vðskiptum og pólitík hefur vakið hjá mér aukinn áhuga á stjarnfræðibloggi.

[Finnur Bárðarson, 14.4.2009 kl. 16:27]

Sem svar við fyrirsögninni: Óskiljanlegt

[Sæmundur Bjarnason, 14.4.2009 kl. 16:44]

Takk öll. Var að sjá fréttir um niðurstöðu skoðanakönnunar. Kannski eru eftir allt saman að verða vatnaskil. Hlusta eflaust á sjónvarpið í kvöld.

[Sæmundur Bjarnason, 14.4.2009 kl. 17:48]

Ég var ekki að segja að sjálfstæðismenn hafi stöðvað þetta. Það hefur samt verið gefið í skyn og sumir sagt það fullum fetum.

[Sigurður Hreiðar, 15.4.2009 kl. 10:52]

Ég er ómögulegur í pólitík og hef um dagana kosið flesta flokka nema aldrei krata, sama hvað þeir kalla sig hverju sinni.

En ég held að það sé auðvelt að fletta upp á því í samtimafréttum þegar VÞV var flæmdur úr borgarstjórastóli -- þá hygg ég komi í ljós að sexmenningarnir stöðuðu í raun samruna fyrirtækjanna. Hvort það dugar til að kjósa sjálfstæðisflokkinn núna er öldungis annað mál.