643. - Sjónvarpið frá Alþingi að verða aðalrásin

Gæti trúað að áhorf fari vaxandi á Alþingis-sjónvarpið. Nú má búast við öllu í þessu leikhúsi fáránleikans. Bölv, söngur, fylliríishjal og allt í beinni. Stendur langt fram á kvöld og getur hæglega komið í staðinn fyrir ýmislegt annað. En málþóf er málþóf hver sem beitir því og af hvaða ástæðu sem er. Kannski hætta þeir þessu ekki fyrr en líður að páskum. Á endanum verður samið um eitthvað. Virðing fyrir Alþingi eykst ekki.

Endalaust má velta fyrir sér niðurstöðum úr skoðanakönnunum. Þrjú atriði eru athyglisverðust. Tap sjálfstæðismanna virðist staðreynd. Litlu framboðin verða í óttalegu basli. Frjálslyndi flokkurinn sem hefði átt að leika sér að því að fá svona 10 - 15 % atkvæða hverfur líklega af þingi.

Farið er að kalla fjármálaeftirlitið fjölmiðlaeftirlitið. Menn þarna verða að gæta sín. Ef það á bara að taka í lurginn á litla Landsbankamanninum en láta Jóakima von And landsins eiga sig getur farið illa.

Veðurfræðingar eru ómissandi. Þó Trausti Jónsson sé ekki hávær var hann oft skemmtilegur í sjónvarpinu í gamla daga. Siggi stormur er ágætur þegar honum tekst upp. Þessir tveir eru þó ekki einir veðurfræðinga um að fara með gamanmál og vera skemmtilegir á að hlýða. Fyrir löngu síðan tíðkaðist þetta hjá útvarpinu og margir bændur kunnu vel að meta það. Einn bóndi skrifaði útvarpsstjóra bréf um ýmislegt og í lokin sagði hann eitthvað á þessa leið: „Það er svosem gaman að veðurfræðingunum en í guðanna bænum hættið að láta þá trufla okkur svona um hásláttinn." 

Samfylkingin heldur spilunum fast uppað sér. Þó Vinstri grænir hafi álpast til að sverja af sér allt samræði við djöfulinn (sjálfstæðisflokkinn) ætlar hún ekki að brenna sig á því sama. Eftir kosningar skal farið aftur í stjórn. Það var svo gaman síðast. Líklega er strax farið að rífast um ráðherrastólana. Samfylkingin gæti, ef úrslitin verða á þann veg, sem hægast farið í stjórn með annaðhvort sjálfstæðismönnum eða framsókn.

Athugasemdir

[Sigurður Sveinsson, 4.4.2009 kl. 07:19]

Ég er einn af veðurvitunum. Með veðurdellu eins og nafni minn Guðjónsson og hinn ágæti Einar Sveinbjörnsson. Mér kom alltí einu í hug gömul vísa um 2 liðna veðurfræðinga. Ég held örugglega að vísan sé eftir Egil Jónsson kenndan við Húsavík. Veðurfræðingarnir sem ort er um eru Jón Eyþórsson og Theresía Guðmundsdóttir.

Þar sem þau bauka bæði

er blautt og úrkomugnægð.

Hann er með háþrýstisvæði

en hún er með djúpa lægð.

Mér finnst þessi staka vera hin tæra snilld.

[Óli Ágústar 4.4.2009 kl. 09:00]

Ég lærði þessa vísu svona:

Að veðurspá vinna þau bæði

veðrið er rigning með hægð.

Hann er með háþrýstisvæði

en hún er með djúpa lægð.

[Ben.Ax. (Benedikt Jóhannes Axelsson), 4.4.2009 kl. 17:07]

 Ég kann margar vísur eftir Egil en ekki þessa og veit því ekki hvor er rétt. En til gamans má geta þess að Egill fékk skáldastyrk forðum en gaf aldrei neitt út. Þá var ort:

Egill margan kvað í kút,
kannski ætti að virkja'nn.
Fyrir að gefa ekki út
eru þeir að styrkja'nn.

P.s. Til að vísur verði með einu stafabili er ýtt á shift og enter.

[Malína 4.4.2009 kl. 19:41]

Og ég sem hélt að ég hefði slegið met í dónaskap hérna!

[S.H. 4.4.2009 kl. 21:08]

Egill var Jónasson, ekki Jónsson.

[Sæmundur Bjarnason, 4.4.2009 kl. 23:20]

Takk. Vísur um tíðarfar eru oft skemmtilegar.

Harðna tekur tíðarfar
Teresía spáir byl.
Hver sem verður tittlings var
veiti honum skjól og yl.

Þetta er sú veðurvísa sem ég man best eftir. Gæti vel verið eftir Húsavíkur-Egil.

[Sverrir Hjaltason 5.4.2009 kl. 06:55]

Vísuna las ég fyrir fyrir margt löngu í "Íslenskri fyndni" og er næstum viss að sé svona.

Tökin herðir tíðarfar
Teresía spáir byl.
Hver sem tittlings verði var
veiti honum skjól og yl.

[Sæmundur Bjarnason, 5.4.2009 kl. 11:26]

Sverrir: Varðandi seinnipartinn hefurðu örugglega rétt fyrir þér því þar eru ljóðstafirnir ekki einu sinni réttir eins og ég tilfæri hana. Þó er það svo að mér finnst að vera eigi "verður" en ekki "verði". Ég man núna að ég hef heyrt upphafið sem þú nefnir og líka með fyrstu tvö orðin víxluð. Upphafið sem ég tilfæri finnst mér eins og ég lærði vísuna fyrst. Vinsælar vísur eru oft til í mörgum útgáfum.

[S.H. 5.4.2009 kl. 12:06]

Eftirfarandi vísa var eitt sinn kvedin ( NB ekki af Davíd Oddssyni!). En ég held ad tildrögin hafi verid thau, ad Jón frá Pálmholti hafi komid vísum Egils Jónassonar á prent eda framfaeri og öllu fremur theim vísum sem voru í klúrari kantinum. Undu sumir thessu illa og kvad thá skáldid, sem vel gaeti hafa verid Egill sjálfur:

Jón minn frá Pálmholti skadlegar skyssur henda
skrítin og lítil eru hans fródleikskorn.
Bövadur ratinn ad fara í öfugan enda
á Agli til thess ad velja sýnishorn.

Bid ég svo alla vísnavini afsökunar ef ég fer rangt med vísuna.

[S.H. 5.4.2009 kl. 12:17]

æ,æ! Á ad vera bölvadur, alveg taepitungulaust.

[EE elle 5.4.2009 kl. 19:34]

Ben.Ax., gott að vita  þetta með shift og enter.  Það vafðist fyrir manni þó það væri ekki voða flókið.