501. - Og 501 strax á eftir. Um svarta hundinn, Einar Kárason, Obama, Kennedy og ýmsa fleiri

Margt er um að skrifa eftir að hafa verið í hálfgerðu bloggfríi síðustu daga. Harpa Hreinsdóttir skrifar um svarta hundinn og ýmislegt fleira. Varðandi það sem hún segir um geðsjúkdóma er ég yfirleitt á sama máli og hún. Enda hef ég lesið bloggið hennar lengi. Minni á að Árni Tryggvason leikari skrifaði í ævisögu sinni um svarta hundinn og hafði langa reynslu af honum. Hef líka lesið söguna um konuna í köflótta stólnum. Churchill er með þeim frægustu sem þjáðst hafa af slæmu þunglyndi.

Ég er aftur á móti ekki sammála Hörpu þegar hún skrifar um Einar Kárason. Hef samt ekki lesið nýjustu bókina hans. Las "Óvinafagnað" á sínum tíma og þótti hún góð. Þó þeir sem vel þekkja til Sturlungu og fornra rita yfirleitt geti vel gagnrýnt margt í bók Einars held ég að þeir séu svo fáir að um markverða gagnrýni sé varla að ræða. Ef sagan er vel skrifuð er hún vel skrifuð burtséð frá öllum hugsanlegum ritgerðarefnum. Svarti hundurinn held ég að verði Einari ekki að fótakefli.

Ég spáði Obama sigri í forsetakosningunum í Bandaríkjunum enda var það lítill vandi. Þegar John Fitzgerald Kennedy var kjörinn forseti í Bandaríkunum var hann fyrsti kaþólikkinn sem varð forseti þar. Efamál er að sú nýjung að kjósa blökkumann í embættið nú sé meiri en það var þá.

"Drengurinn er einstakur höfðingi" sagði Jón Ólafsson um Jón Ásgeir þegar hann keypti af honum Norðurljósaveldið eins og það lagði sig. Ég hef ekki mjög miklar áhyggjur af eignarhaldi Jóns Ásgeirs á 365 miðlum. Hluturinn í útgáfufélagi Morgunblaðsins held ég að verði honum ekki til neins gagns og hann væri áreiðanlega betur kominn hjá einhverjum öðrum. Þó yfirvöld hafi á sínum tíma heimilað samruna Hagkaupa og Bónuss er ekki þar með sagt að svo verði um Fréttablaðið og Morgunblaðið.

Athugasemdir

[Sigurður Þór Guðjónsson, 5.11.2008 kl. 02:47]

Það þunglyndi sem lýst er í þessum íslensku bókum finnst mér nú varla vera þunglyndi. Eftir bókunum að dæma var það bara léttur leikur.  

[Jón Steinar Ragnarsson, 5.11.2008 kl. 12:41]

Þunglyndi getur verið ljóðrænt og það dregur úr alvrleika þess og jafnvel rómantíserar í bókmenntum. Ef því er lýst eins og það er þá er það kallað sjálfsvorkunarvæll.

Svartir hundar eru skelfilegir ásýndum. Orð ná ekki að lýsa þeim. Menn myndu skilja það um leið og þeir sjá myndir af þeim.

[Sæmundur Bjarnason, 5.11.2008 kl. 15:12]

Ég er enginn sérfræðingur í þunglyndi eða geðsjúkdómum yfirleitt. Álít þá samt vera sjúkdóma og nær aldrei einhverja uppgerð eða væl.

Harpa Hreinsdóttir er minn gúrú varðandi geðveiki. Þunglyndi og allt annað sem að geðveiki lýtur verður mjög oft fyrir allskyns fordómun enn þann dag í dag. Ástandið er þó örlítið betra nú en fyrir mörgum áratugum. Fólk óttast þessa sjúkdóma oft mest vegna þess að það skilur þá illa.

Ef þunglyndi sem lýst er í bókum virðist vera léttur leikur mundi ég fremur álíta því illa lýst en að þunglyndið sé eitthvað gallað.

Bækur eru betri en blogg.

[Lára Hanna Einarsdóttir, 5.11.2008 kl. 17:47]

Ég held að þunglyndi geti enginn skilið til fulls nema sá sem hefur upplifað það. Alveg sama hvað sagt er um það og skrifað.

En það er hægt að gefa örlitla hugmynd þótt skilningurinn á líðaninni sé bágborinn.

[Sigurður Þór Guðjónsson, 5.11.2008 kl. 18:22]

Þeir sem hér voru að lýsa þunglyndi sínu í bókunum hafa vísast upplifað það. En mér fannst þetta bara eitthvað flott, sem bókarhöfundar auðvitað sigruðust á eins og alltaf í bókum. En þungluyndi er ekkert flott og  ýmsir sjá aldrei til sólar út af því alla ævi og éru EKKI sigurvegarar. En það er rétt hjá Jóni Steinari að við viljum ekki horfast í augu við alvöru þjáningu náungans. Það er umsvifalaust kallað væl og sjálfsvorkunn ef hún kemur fram varnarlaus og nakin. Niðurstaðan er: VIð erum vond en ekki full af einhvejrum umfaðmandi kærleika.  Eins gott að viðurkenn það. Og ekkert væl!  

[Malína 5.11.2008 kl. 19:12]

Ég viðurkenni ALDREI að ég sé vond!  Og hananú!

[Sigurður Þór Guðjónsson, 6.11.2008 kl. 00:14]

Eini góði maðurinn sem ég þekki er  hann Mali - og hann er bara köttur!

[Malína 6.11.2008 kl. 02:39]

Þú heldur bara að Mali sé svona góður af því að þú þekkir mig ekki.  Þig vantar alvöru samanburð!