2834 - Trump og Kata

Takið eftir að þið lásuð það fyrst hér og gleymið því ekki. Trump mun tapa í forsetakosningunum á næsta ári og líklegasti andstæðingur hans þar er demókratinn Joseph Robinette Biden Jr. fyrrum varaforseti Bandaríkjanna.

Þessi spádómur byggist annarsvegar á vissu um það að erfiðleikar Donalds Trump muni fara vaxandi á næstu mánuðum. Þingið mun neyða hann til að beita neitunarvaldi sínu í fyrsta skipti á lagafrumvarp sem ógildir yfirlýsingu hans um neyðarástandið á landamærunum við Mexikó. Það mun gerast á næstu vikum.

Samtímis eða jafnvel fyrr mun Mueller skila skýrslu sinni og dómsmálin gegn honum hrannast upp. Jafnvel neyðist hann til að gera skattskýrslu sína opinbera, en gegn því hefur hann lengi barist. Margt hefur Trump samt gert sæmilega vel og satt að segja hefur hann verið ótrúlega heppinn. Allt tekur samt enda og fyrirsjáanlegt er að bandarískir kjósendur munu ekki styðja þennan oflátung lengur.

Spádómurinn um Biden er um margt óvissari. Auðvitað kemur það honum til góða að hafa verið varaforseti. Stuðningur Obama, ef hann fæst, getur líka komið honum mjög vel því völd og áhrif Obama innan demókrataflokksins eru ennþá talsverð. Erfitt er samt að sjá fyrir allt sem gerast kann á næsta ári innan demókrataflokksins, en forkosningar þar hefjast snemma á næsta ári. Þegar eru allmargir búnir að tilkynna um framboð sitt, en Biden ekki.

Erfitt er að fjalla um innanlandspólitík án þess að minnast á verkföll og verkalýðsbaráttu. Samt ætla ég að reyna.

Ekki er annað að sjá en þreytu sé talsvert farið að gæta hjá Katrínu Jakobs. Enda er það engin furða. Ekki er að sjá að hún komi neinum málum fram. Ekki dugir að hrópa hátt um óskyld mál og skipta um þau daglega eins og hún hefur gert að undanförnu. Satt að segja virðist sem henni hafi verið bannað að tala um sum mál. Annars er íslensk pólitík um margt jafnvel skrýnari en sú bandaríska og er þá mikið sagt.

Ekki veit ég fremur en aðrir hvar þingrofsheimildin liggur. Hugsanlegt er jafnvel að Guðni forseti taki ekkert mark á slíkri vitleysu. Hver veit nema það sé ímyndun valdalausra forsætisráðherra að hún sé hjá þeim. Allavega fór Sigmundur flatt á því gagnvart Ólafi kóngi. Læt ég svo útrætt um íslensk stjórnmál.

Mikið er fimbulfambað um samfélagsmiðla þessa dagana. Auðvitað er það ekkert annað en veikleiki hjá skólastjórnendum að hafa látið nemendur komast upp með að hafa og nota jafnvel snjallsíma í kennslustundum. Vitanlega er auðveldara um þetta að tala en í að komast. Ekki get ég samt vorkennt kennurum sem hafa misst allt snjalltækjavald í bekkjum sínum. Þeim hefði verið nær að taka fastar á þessu í upphafi. Auðvitað getur kennari sett allskyns reglur og ætlast til þess að þeim sé hlýtt.

Einhver mynd.

Athugasemdir

[Tómas Ibsen Halldórsson, 27.2.2019 kl. 14:09]

Árið 2007 spáði Kim Clement, spámaður Drottins, fyrir um að Trump yrði forseti Bandaríkjanna. Margir aðrir spádómar hans hafa þegar ræst. Kim spáði því að Trump myndi sitja tvö tímabil.

Árið 2011 var annar spámaður Drottins sem spáði fyrir um að Trump yrði forseti og það í tvö tímabil. Þessi spámaður er Mark Taylor.

Báðir þessir menn komu fram með spádóma sína áður en Trump gaf til kynna að hann myndi sækjast eftir embættinu.

Verð ég því að hryggja þig kæri Sæmundur að ég tel að spádómur þinn muni ekki rætast.

Með góðri kveðju,

[Jóhannes Laxdal Baldvinsson, 27.2.2019 kl. 15:28]

Spekin af spjátrungnum lekur
spinnur sinn örlagavef.
Eitt samt hér athygli vekur
enda efni í allsherjarþref.

[Valdimar Samúelsson, 27.2.2019 kl. 21:12]

Mig minnir að forseti sitji meðan neyðarlög eru í gildi. Kannski klárar hann landamæra girðinguna áður en hann léttir lögunum og bara hættir þá.Ég held samt að hann nái kosningu næsta kjörtímabil. Vinsældir hann aukast með hverjum degi meðal almennings.

[Sæmundur Bjarnason, 27.2.2019 kl. 23:01]

Allsherjarþrefið er allsekki hér
enda er Laxdal í fríi.
Allsherjartromparinn tekur við þér
þó talsvert þá larður hans sigi.

[Sæmundur Bjarnason, 27.2.2019 kl. 23:04]

Tðmas Ibsen, ég hef nú alveg eins mikla trú á spádómshæfileikum mínum og einhvers útlends ómerkings í þessu efni.

[Sæmundur Bjarnason, 27.2.2019 kl. 23:09]

Þetta getur alls ekki verið rétt hjá þér Valdimar, því þá væri bara að drífa sig í að setja neyðarlög í lok kjörtímabils. Og hvað á þá að gera við öll neyðarlögin sem í gildi eru? Jafnvel þó vinsældir Trumps aukist eitthvað dugir það ekki til, hann er svo óvinsæll einmitt núna.

[Valdimar Samúelsson, 28.2.2019 kl. 09:02]

Sæmundur Trump getur ekki beðið með girðinguna lengur en þá verður hann aftur óvinsæll. Geti hann treint sér verkið og básúnað með það þá verður hann enn vinsælli

[Þorsteinn Siglaugsson, 28.2.2019 kl. 09:51]

Þú mátt þín nú ekki mikils gagnvart spámönnum drottins Sæmundur. Sýndu smá auðmýkt

Fyrst drottinn hefur ákveðið að láta ameríkana sitja uppi með Trumpsa kallinn í tvö kjörtímabil, nú þá verða þeir auðvitað að taka því, nema þá einhver komi honum fyrir kattarnef.

[Þorsteinn Sch Thorsteinsson, 28.2.2019 kl. 16:13]

Sæll Sæmundur, 

Það ma´vera að einhver "spámaður" hafi spáð því að hann Donald Trump karlinn ætti eftir að vera tvö kjörtímabil í embætti, en hver sagði að Donald Trump væri að vinna á Guðsvegum?   
Ég held að það sé litill sem engin munur á Donald Trump og fyrrum forseta Bandaríkjanna, hvað varðar með að vera áfram í Sýrlandi, Írak og Afganistan. Nú það er búið að setja Íran aftur á dagskrá í hinu svokallaða stríði gegn hryðjuverkum (eða stríði ofan á stríð), já og svo er "Regime Change" á dagskrá hjá þeim ekki bara í Venesúela heldur á líka að reyna koma stjórnvöldum á Kúbu í burtu, svo á að reyna koma stjórnvöldum í Nikaragúa í burtu. 
KV. 

 

[DoctorE 1.3.2019 kl. 10:03]

Spoiler: Yfirnáttúrulegir Spámenn/konur eru ekki til í alvörunni.
Þannig er nú það.