2830 - Þetta er lokaður fésbókarhópur um verkföll

Er nokkuð það til sem er opnara en lokaður fésbókarhópur? Ég held ekki. Einhverjir virðast samt halda að svo sé. A.m.k. er sífellt verið að birta einhverjar yfirlýsingar í slíkum hópum og furða sig svo á því að allir viti af þessu.

Auðvitað eru vinnudeilurnar mál málanna hérlendis þessa dagana. Mér finnst svona deilur vera hálfmarklausar ef litið er samtímis á heimsmálin. Vitanlega erum við Íslendingar afskaplega smáir og fáir í þeim skilningi að við verðum í stórum dráttum að haga okkur eins og ætlast er til af hinu óskilgreinda alþjóðasamfélagi. Í þeim skilningi verður allt smátt hér á þessari litlu eyju okkar. Mér finnst mestu máli skipta fyrir okkur Íslendinga í hvaða átt mál þróast hér á landi.

Sú þróun sem hefur verið hér á landi undanfarið er öll í áttina til USA fremur en til Norðurlandanna. Þetta finnst mér a.m.k. og undanskil ég ekki verkalýðsmál. Heppilegara tel ég að við snúum okkur í vaxandi mæli til ESB landanna og Norðurlandanna alveg sérstaklega. Vissulega er það svo að öfga-þjóðernisstefna á víða miklu fylgi að fagna bæði í Bandaríkjunum og í Evrópu. Sérstaklega þó í Bandaríkjunum.

Í sambandi við verkfallsmálin vil ég taka fram að mér finnst verkalýðsforkólfar óskapast of mikið yfir því hvað aðrir hafi í kaup. Mér finnst miklu nær að einbeita sér að því að reyna að fá laun þeirra sem lítið bera úr býtum hækkuð.

Bankastjórar eða þeir sem ákveða launin fyrir þá þurfa að gera sér grein fyrir því að með því að hækka launin eru þeir að lýsa því yfir að þeim komi ekkert við þó aðrir hafi það skítt. Einu sinni var óskapast mikið yfir því að læknar og flugmenn hefðu of há laun. Þær raddir hafa hljóðnað að mestu núna, en í staðinn er talað um bankastjóra.

Ef þeir hafa of há laun ættu verkalýðsforingjar að geta notað það sem röksemd fyrir því að hækka laun sinna umbjóðenda. Bankastjórar mega fyrir mér hafa 10 eða 20 millur á mánuði. Kannski getur það orðið til þess að laun annarra hækki. Ef ekki þá verður bara svo að vera. Best væri auðvitað að þeir ákvæðu sjálfir sín laun eins og þingmenn gerðu um árabil. Óþarfi að vorkenna þeim það. Sjáið bara forsetann. Hann er látinn vera af því hann er með Svarta Pétur og eykur í sífellu vinsældir sínar. Eiginlega ættu opinberir starfsmenn ekki að hafa verkfallsrétt. Væri ekki spennandi ef þingmenn færu í verkfall? Vonandi kemur að því.

BB segist vera hissa á kröfum launþega. Hann er þá sennilega eini Íslendingurinn sem ekki hefur vitað af því lengi, að til stæði að fara í verkfallsaðgerðir. Annars er augljóst að valdastéttin í landinu hefur yfir þúsund sinnum fleiri aðferðum að ráða til að auka tekjur sínar en verkalýðurinn. T.d. gætu veitingamenn sem best gengið úr SA og samið um hærri laun.

Einhver mynd.

Athugasemdir

[Þorsteinn Siglaugsson, 23.2.2019 kl. 00:49]

Mér finnst leiðinlegt að þessir verkfallsforkólfar skuli hafa uppi endalausa síbylju um hvað fólk á lágmarkslaunum hafi það skítt, en krefjast þess svo að allir, líka þeir sem hafa 2 milljónir á mánuði fái vel ríflega launahækkun. Láglaunafólkið er notað í áróðursskyni, en þessu liði er því miður alveg sama um það. Og svo verður það auðvitað þetta fólk sem missir vinnuna þegar afbókanirna fara að streyma inn og ferðaþjónustufyrirtækin fara á hausinn.

[Sæmundur Bjarnason, 23.2.2019 kl. 13:09]

Auðvitað hafa allir sem við ferðaþjónustuna starfa vel yfir 2 milljónir á mánuði. Samt gætu fyrirtæki þar reynt að semja. Mönnum kemur ekki alveg saman um hverjar kröfurnar séu. 

Held að við höfum ekki sömu sýn á þessi mál, Þorsteinn minn. Samt er ég ánægður með að þú skulir kommenta hér.

[Jóhannes Laxdal Baldvinsson, 23.2.2019 kl. 13:16]

Á Fésbókinni fólk er hooked
fari það og veri.
Athyglis og umtals-sjúkt
því allir liggja á hleri.

[Þorsteinn Siglaugsson, 23.2.2019 kl. 21:40]

Það hafa ekki allir sem starfa við ferðaþjónustu 2 miljónir á mánuði. Skil ekki hvaðan þú hefur þær upplýsingar Sæmundur. Það sem ég er að benda á er að ef markmiðið er að fólk á lægstu laununum eigi að geta lifað á þeim á að leggja áherslu á að hækka lægstu launin, ekki að hækka þá sem hafa enga þörf fyrir hækkun.

[Sæmundur Bjarnason, 23.2.2019 kl. 22:06]

Þorsteinn, mikill vill meira. Þáðu ekki allir hækkunina nema Guðni þegar hún bauðst þó þeir hefðu enga þörf fyrir hana eins og þú segir. Þú talaðir sjálfur um síbylju og 2 milljónir. Kannski eru verkalýðsrekendurnir fastir í kerfinu og finnst að þeir með 2 milljónirnar þurfi líka smáslettu. Annars er kerfisbreyting og ný hugsun það sem vantar hér. Umræður um verkalýðsmál vilja verða full-flokkspólitískar í ástandi eins og hér er nú. 

[Sæmundur Bjarnason, 23.2.2019 kl. 22:10]

Á fésbókinni fársjúkri
fólk í hættu er.
Þó þolinmóðar þeim hjúkri
þetta enda fer.

[Sæmundur Bjarnason, 23.2.2019 kl. 22:21]

Af því ég var svo fljótur að gera vísuna á undan, datt mér þessi í hug strax á eftir:

Hagmælskan er hefndargjöf
en hefur sína kosti.
Hugsun frjásri hún er töf
í huga veldur frosti.