2762 - Hvort er betra að drepast fullur eða ófullur?

Innflytjenda- og flóttamannamál, ásamt kynferðislegum spursmálum ýmisskonar eru á góðri leið með að verða það sem skiptir mestu í stjórnmálalegri umræðu. Ég er að hugsa um að demba mér í þá umræðu.

Í Bandaríkjum Norður Ameríku vakti eitt tiltekið morðmál verulega athygli fyrir stuttu. Þar var ekki annað að sjá en ólöglegur innflytjandi og vinnumaður á bændabýli hefði verið að verki. Trump forseti var ekki lengi að hagnýta sér það. Án þess að segja það beinlínis gaf hann í skyn að þetta sannaði bara að allir (eða flestir) innflytjendur væru glæpamenn.

Við þetta er ýmislegt að athuga. Jafnvel getur verið að ólöglegir innflytjendur séu ekkert verri en annað fólk. Vinnufólk á bændabýlum þar í Guðs eigin landi er ekkert ákaflega margt. Kannski svona ein og hálf milljón. Af þeim er sennilega um helmingurinn eða meira ólöglegir innflytjendur. Þetta tiltekna morðmál segir ekkert til um það hvort morðingjar séu fleiri meðal ólöglegra innflytjenda en annarra. Kannski er því einmitt þveröfugt farið.

Æ, ég nenni þessu ekki. Pólitík er leiðinleg. Aldrei virðist vera hægt að koma sér saman um nokkurn hlut. Bara hjólað í næsta pólitíska andstæðing (flokkslega séð) og þá skiptir litlu hvort maður sé í hjarta sínu sammála síðasta ræðumanni eða ekki.

Varðandi pólitísk kynferðismál dettur mér fyrst í hug að allt ætlaði vitlaust að verða útaf því að Jón Valur Jensson birti klámvísu eftir sjálfan sig á boðnarmiði. Svo sagði DV a.m.k. Það sagði mér bara að fésbókarinnlegg Jóns Vals Jenssonar eru á leslista einhvers starfsmanns á DV. Hef núna farið á Boðnarmjaðarsíðuna og verð að segja að mér finnst þessi vísa heldur klén. Hún er þarna ennþá eða var a.m.k. Annaðhvort er búið að eyða út svotil öllum hneykslunarhellunum eða DV hefur haft rangt fyrir sér að því leyti að þeir sem á Boðnarmjöðinn kíkja reglulega eigi eitthvað bágt með að meðtaka sæmilegar klámvísur. Sjálfur er ég ekki með öllu saklaus af að hafa gert slíkar vísur og þar að auki er (eða var) viðurkennt af vísnavinum að í klámvísum, hestavísum og níðvísum hverskonar hafi íslensk vísnagerð oft risið hæst.

Ég hef komið að sjálfum mér þar sem ég stend við lyftuna hérna í blokkinni og ýti fast á bíllykilinn í algjöru tilgagnsleysi. Hvað táknar það? Fyrir mér er það bara staðfesting á því að ég er stundum dálítið utan við mig.

Hvort ætli sé betra að drepast fullur eða ófullur? Það eina sem ég álít stórhættlegt er að trúa því sem stendur eða fellur í fjölmiðlum. Það er alltaf verið að breyta til. Það sem var krabbmeinsvaldandi í gær er skyndilega orðið meinhollt í dag. Eða var það kannski hinsegin?

Er WOW-air á leiðinni á hausinn eða er bara verið að tala félagið niður af einhverjum annarlegum hvötum? Mér er ekki sama því ég hef góða reynslu af því að fljúga með þessu félagi og ætla kannski að fara erlendis í haust eða vetur.

Einhver mynd.

Athugasemdir

[Þorsteinn Briem, 26.8.2018 kl. 09:03]

Jóns Vals heldur klént er klám,
Kristur veit af lestinum,
af Andskotanum dregur dám,
og dómkirkjunnar prestinum.

[Sæmundur Bjarnason, 26.8.2018 kl. 09:43]

Elskar þrátt hann kirkjuklám
með Kristi sinum eina.
Ef til vill hann dregur dám
af drengnum sínum Steina.

[Húsari. 26.8.2018 kl. 18:48]

Sæll Sæmundur.

Þeir sem mesta reynsluna hafa
af því að deyja segja að engu máli skipti
hvort heldur er og segja dauðann hvorki rómantískan
og þá ekki tignarlegan frekar.

Þú minntist á Krabbamein. í því sambandi vakti það athygli mína
að Krabbameinsfélag Íslands taldi sig hafa efni á því að senda
íslenskum konum tóninn á dögunum og viðhorfsbreytingar væri 
þörf með því að þær mættu illa í skoðun.

Hér fannst flestum eins og öllu hefði verið snúið á haus
því margur sér Krabbameinsfélagið sem hvert annað nátttröll í þessu
sambandi því sjálft hefur það hagsmuni af ofangreindri skoðun
og virðist í raun vera sá þröskuldur sem þarf að yfirstíga til
að raunhæfar úrbætur geti átt sér stað og skiptir þar mestu
bólusetning gegn leghálskrabbameini.

Við þurfum að losna við Krabbameinsfélagið af markaðnum og annast þessa
þjónustu á sjúkrahúsum eins og hvað annað og taka upp bólusetningu.

Eftir að í ljós var leitt að 75% aðgerðir á körlum vegna
blöðurhálskrabbameins voru gagnlausar virðist eins og
konur líti skimun og skoðun sömu augum.

[Hrólfur Þ Hraundal, 26.8.2018 kl. 20:24]

Að vera dálítið utan við sig, er að því er ég held skárra en að vera innan við sig.

Að drepast fullur er að því er ölkærir hafa sagt mér verra en að drepast þunnur, en alverst sé að drepast alsaklaus.

En þetta með bíllykilinn minnir mig á að það getur verið hávaðasamra en til stóð að brasa við að opna dyrnar heima hjá sér um nótt með bíllyklinum. Konur hafa næma heyrn.  

[Sæmundur Bjarnason, 26.8.2018 kl. 20:31]

Húsari, eiginlega er ég að mestu sammála þér um krabbameinið.

Reyslan af því að drepast (í alvörunni) er engin hjá mér.

[Sæmundur Bjarnason, 26.8.2018 kl. 20:35]

Hrólfur. Þetta með lyklana er hjá sumum tengt drykkjuskap, en ekki hjá mér, enda er ég afar sjaldan blindfullur núorðið.

Og ekki hef ég dáið brennivísdauða í háa herrans tíð.

[Húsari. 26.8.2018 kl. 22:22]

Sæll Sæmundur.

Þakka þér fyrir svarið.

Estelle Roberts hafði atvinnu af
því að deyja a.m.k. einusinni á dag eða oftar í heil 40 ár!

Hún var einn af þekktustu miðlum Bretlands um aldamótin 1900.

Ævisaga hennar sem kom út 1960 á íslensku opinberar svik og
pretti sem hún sjálf stundaði jafn lengi.

Má þar nefna smaragða og agat steina sem þeir fengu í hendur
sem sátu fundi hennar og jafnvel styttur og gersamar af Egyptalandi!

Til þess að afhenda gjafir þessar var notaður sérstakur andalúður
(þú last þetta rétt) en steinar jafnt sem gjafir var sagt að kæmu
að handan!! (ummyndaðist í veraldlegt form fyrir tilverknað aðalstjórnanda miðilsins!)

Aðalstjórnandi miðilsins notaði gjarna andalúðurinn við að koma boðskap
sínum á framfæri. Lúðurinn var skreyttur fofór og marglita fosfór
við hátíðlegar athafnir, - afmæli og annað í þeim dúr.

Ætli það séu ekki heldur færri á okkar tíð sem kannast við þetta fyrirbrigði?!

Sjálfur fór ég á fundi á sínum tíma og get vottað það svo sannarlega
að þegar miðill féll í trans fylgdu því oftast álíka hljóð
og þegar einhver skilur við.

Þrátt fyrir þetta er ég jafn trúaður á það nú sem áður að
utan skynfæra okkar er "... fleira milli himins og jarðar, Hóratíus, 
en heimspekina okkar dreymir um".

[Sæmundur Bjarnason, 27.8.2018 kl. 12:05]

Satt að segja hef ég ekkert álit á miðlum og þessháttar vitleysu. Auðvitað getur vel verið að það sé rétt sem þú minnist á í lokin, en sjálfsagt er að nota vit sitt eftir föngum og treysta skynfærunum.

[Halldór Egill Guðnason, 27.8.2018 kl. 18:52]

Það er án nokkurs vafa betra að drepast fullur en ófullur. Helst blindfullur, ef nokkur kostur. Um það getur undirritaður vitnað og kallað til ótal vitni, því til staðfestingar, jafnt almenna borgara sem heilbrigðisstarfsfólk. Um þetta þarf ekkert að rökræða frekar eða gera einhverjar marklausar kannanir.

Þetta með bíllykilinn er ekkert óeðlilegt og þarf ekkert endilega að benda til utanviðsigháttar. Tja, ekki nema þú hafir reynt að setja hana í gang. Ég stóð um daginn utan við hurð og beið þess hún opnaðist að sjálfu sér, eins og flestar útihurðir á opinberum stöðum, en ekkert gerðist. "Afi, það stendur ýta á hurðinni" skaut mér í samband við sjálfan mig á ný. Kýs að kalla svona uppákomur "andartaks hugarfrávik", þar til annað kemur í ljós.

Góðar stundir, með kveðju að sunnan.

[Sæmundur Bjarnason, 27.8.2018 kl. 20:17]

Takk Halldór. 

Kannski er betra að gera ráð fyrir tvennskonar dauða hér. Annars vegar er um að ræða brennivinsdauða og þá er alveg bráðnauðsynlegt að vera blindfullur hefði ég talið. Hinn dauðinn sem ég vil nefna alvörudauða er ekki á valdi okkar að prófa svo líklega getur enginn svarað því hvort betra er að vera fullur þá.

Annars er umræðan um þetta orðin of löng, finnst mér.

Þetta með lykilinn er miklu alvarlegra mál og gæti leitt til umræðu um allskyns minnisglöp jafnvel Alsheimer í versta tilfelli.

[Þorsteinn Siglaugsson, 27.8.2018 kl. 23:36]

Þú verður að skrifa meira um bráðkveddu held ég. Aldrei séð jafn marga kommentera á bloggið þitt.

Annars held ég að það hljóti að vera mun þægilegra að hrökkva upp af fullur en ófullur. Að því gefnu að það renni ekki af manni á meðan 

[Sæmundur Bjarnason, 28.8.2018 kl. 11:54]

Já Þorsteinn, aðdragandinn skiptir máli. Svo getur brennivínsdauði breyst í alvörudauða og kannski er það allra best. Bráðkveddan er stórhættuleg og margir hafa orðið fyrir barðinu á henni. Einu sinni (fyrir fésbókartímann) var ég alveg í vandræðum með kommentin. Trúmál eru hættulegust. Jafnvel verri en blessuð bráðkveddan.