2661 - Stólaleikurinn mikli

Jæja, þá eru kosningarnar blessunarlega afstaðnar. Hefst þá stólaleikurinn. Á fésbókinni spáði ég því að Katrín Jakobsdóttir mundi sennilega mynda næstu stjórn með Samfylkingunni, Pírötum og Framsóknarflokki og e.t.v. styðjast við Flokk fólksins eða Viðreisn. Nú er ég að mestu fallinn frá þeirri skoðun. Sennilega dreymir Sigurð Inga um að verða þriðja hjólið undir vagni Bjarna og Katrínar. Ekki er samt víst að þau nái saman en vafalaust verður samt reynt að útiloka Sigmund sem mest. Stjórnarmyndunarumboðið er að mestu þýðingarlaust, nema þá til að kanna hug Guðna forseta.

Það sem hér fer á eftir var ég að mestu búinn að skrifa fyrir kosningarnar en til að ná æskilegri lengd á bloggið læt ég það fljóta hér með.

Þó sumum þykji fyndið að tala um exemflokkinn hugsa ég að sá útúrsnúningur verði Sigmundi ekki til trafala. Undarlegt er þó í meira lagi hve margir virðast trúa fagurgala hans. Þetta með að gefa fólki það sem það á nú þegar minnir óþægilega á kennitölusöfnunina sem var einu sinni í tísku. Í Rússlandi skilst mér að þessi aðferð hafi verið reynd (ekki bara í sambandi við banka, heldur einnig ýmislegt annað) og ekki hafi tekist vel til þar.

Eiginlega er ég í mesta vafa um hvort ég eigi að kjósa Píratana eða Samfylkinguna. Þó sumir á blogginu eða fésbókinni tali mjög illa um báða þessa flokka hefur það engin áhrif á mig. Mér finnst þeir vera þeir einu sem til greina koma. Sumir litlu flokkanna gætu þó hentað mér sæmilega en ég tek talsvert mark á skoðanakönnunum og þær hafa viss áhrif á val mitt. En ákvörðum verður að taka. (Á endanum kaus ég Píratana – Ath. – þetta er seinni tíma viðbót.)

Ástæða er til að vona að einhverjir vakni á sunnudagsmorguninn næstkomandi þrátt fyrir að hugsanlega verði ekki útséð um úrslit kosninganna fyrr en talsvert er liðið á nóttina. Þetta segi ég vegna þess að við hjónakornin erum að hugsa um að hafa smáveislu fyrir afkomendur okkar og þeirra nánustu, en við erum bæði nýlega orðin 75 ára. Reyndar er það enginn sérstakur aldur en afsakanlegt er samt að hafa þetta þeim mun þéttara sem nær dregur öldinni.

Þessi veisla tókst ágætlega og

Þetta fann ég á flandri mínu um Internetið á sjálfan kosningadaginn: 

Árni talar einnig um samskipti katta og nagdýra en bogfrimilssýking er einfrumungur sem lifir í músum og breytir hegðun músarinnar, sýkt mús sækir í kattahland og er því að þvælast á svæði sem köttur sækir, kötturinn drepur músina og þá  berst bogfrimilssmitið þeirra á milli. Ef smit berst í mannfólk getur sú sýking valdið breytingu í hegðun fólks.
Konur verða glysgjarnari og lauslátari en karlar verða áhættusæknari og árásárgjarnari.

Árni þessi er sagður vera dýralæknir og ekki er hann sérstakur kattavinur en mér dettur í hug að hann sé Sigmundarvinur. Þetta er ekki sett fram til að fá fólk til að kjósa ekki exemflokkinn enda er kosningadagurinn liðinn.

Einhver mynd.

Athugasemdir

[Atli Harðarson 31.10.2017 kl. 19:30]

Er það ekki annar Árni Matt. sem kann dýralækningar? Ég held að það sem þessi Árni segir um toxoplasmosis sé hálfgerð steypa. Mér skilst að „sýkillinn“ sem heitir toxoplasma gondi sé í um helmingi jarðarbúa og geri lítinn skaða. 

Einhverjir telja að toxoplasma tengist alvarlegum sjúkdómum eins og geðklofa og geðhvarfasýki aðrir að hann verji fólk fyrir slæmum kvillum eins og MS (multiple sclerosis). Hvað er satt í þessu veit ég ekki (og mig grunar að Árni viti það ekki heldur). Hitt þykist ég vita að menn hafi í þúsundir ára átt vingott við ketti án þess að hrynja niður úr kattasjúkdómum. Hins vegar hafa kettir hjálpað, og hjálpa enn, við að losa fólk við skaðleg óþrif af rottum og músum.

[Atli Harðarson 31.10.2017 kl. 19:49]

Sögusagnir um að kvikindið hafi áhrif á hegðun fólks eru dregnar í efa af fólki sem hefur nýlega rannsakað þessi efni. (Sjá t.d. http://journals.plos.org/plosone/article?id=10.1371/journal.pone.0148435 og http://journals.plos.org/plosone/article?id=10.1371/journal.pone.0148435)