2399 - Ljót lygi

Jæja, nú er ég búinn að setja upp einskonar jólablogg, þó fátt sé nú jólalegt við það. Og bráðum kemur annar í jólum. Hversvegna blogga ég? Ef ég gæti nú svarað því. Eftir því sem sumir segja er bloggið mitt alls ekkert vinsælt. Og mér finnst líka heldur klént að skrifa bara uppá vinsældirnar. Kannski stafar það af því að ég vil helst fara út um víðan völl þar og skrifa um allt mögulegt. Aldrei er neinn skortur á umfjöllunarefni. Og alltaf eru einhverjir sem lesa þennan samsetning.

Á fésbókinni eru lækin legíó, en bloggið virðist úrelt þing. Sama er mér. Sjálfur er ég að verða að mestu úreltur og flestir eru eitthvað að sýnast á fésbókinni. Kannski að sýnast betri en þeir eru í rauninni. Sýnist mér. Öðruvísi er því farið með blessað bloggið. Þar fá sumir (margir?) fyrirmæli um hvernig þeir eigi að haga sér. Nefna má: matarblogg, tískublogg, ferðablogg, flóttamannablogg (eru þau annars til?) o.s.frv. Sennilega er orðið erfitt að gefa út tímarit núorðið. Bloggunum trúa menn betur og þar má fá allskyns upplýsingar samstundis og fyrir ekki neitt. Og besservisserar nútímans verða að vera góðir gúglarar. Fyrir svo utan fésbókina en hún hefur alveg komið í staðinn fyrir Gróu á Leiti kaffiþambið. Hver skyldu annars verða framtíðaráhrif netsins, sem alltaf er að þróast og breytast, en Mogginn ekki.

Það er ljótt að ljúga að börnum. Um það sameinumst við þó öllsömul. Börnin, allt niður í tveggja eða þriggja ára, eru vel fær um að skilja á milli raunveruleika og ímyndunar. Þess vegna er ljótt að halda því fram að jólasveinninn komi með gjafirnar sem eru í skónum. Ef þau spyrja ætti að svara þeim sannleikanum samkvæmt. Og það má vel gefa þeim smágjafir þegar jólin nálgast. Þau eru hvort eð er að farast úr spenningi. Þau komast að þessu fyrr eða síðar. Flest börn fyrirgefa lygi sem þessa umhugsunarlaust. En ekki öll. Þó bara eitt barn trúi þessari vitleysu, er það einu barni of mikið. Af hverju sameinast allir um þessa lygi? Ekki veit ég það og ekki tíðkaðist að setja gjafir í skóinn í mínu ungdæmi. Samt tek ég þátt í þessari árlegu uppákomu. Kannski ætti ég að hætta því. En það er erfitt. Ekki er það vegna fordæmingar þeirra fullorðnu. En það er erfitt að horfa uppá vonbrigði þeirra barna sem hugsanlega trúa þessu í einlægni.

Af hverju skyldi vera reynt er að telja börnum trú um þetta? Eiginlega er mér það algjör ráðgáta. Börn eru ekki svo vitlaus að trúa því að syngjandi jólasveinar og álíka asnar sem henda í mannskapinn eplum séu jólasveinar í alvörunni. Af hverju er þá reynt að telja þeim trú um að jólasveinar brjótist inn hjá öllum börnum og setji allskyns drasl í skóna þeirra? Eiginlega stríðir það á móti öllum grundvallarreglum sem reynt er að innprenta börnunum. Að kennarar skuli taka þátt í þessu tekur eiginlega út yfir allan þjófabálk.

Einhver mynd.

Athugasemdir

[Ásthildur Cesil Þórðardóttir, 26.12.2015 kl. 11:24]

Fyrir mér er jólasveinninn alveg jafn raunverulegur og Guð, enginn hefur séð hann, og engar sannanir fyrir því að hann sé til.  Samt trúa ótrúlega margir á hann.  

[Gústav K Gústavsson 26.12.2015 kl. 15:14]

Trúi því ekki Sæmi að þú sért hættur að trúa á jólasveininn!! Það er sama og að vera hættur að trúa á sjálfan sig. Því jólasveinninn er jú við.

[Sæmundur Bjarnason, 29.12.2015 kl. 11:36]

Ásthildur. Guð er ekki raunverulegur fyrir öllum. Það er meira að segja hægt að trúa á hann án þess að gefa sér að hann sé raunverulegur.

[Sæmundur Bjarnason, 29.12.2015 kl. 11:40]

Gústi minn, í mínu ungdæmi (ósköp er ég farinn að nota þetta orðalag oft)áttu jólasveinar heima á jólaböllum, þar sem gengið var í kringum risastórt jólatré. Það er líkt með jólasveininn og Guð að ég hætti að trúa á slík hindurvitni löngu fyrir fermingu.

[Ásthildur Cesil Þórðardóttir, 29.12.2015 kl. 14:46]

Við erum búin að skapa bæði Jólasveina og Guð með því að nægilega margir trúa á þá ekki satt?