2323 - Vopnuð lögregla

Það neikvæðasta við nútímann er hve margir halda, að aðrir séu eins spilltir og maður sjálfur mundi vera, hefði maður aðstöðu til.

Ókey, þetta átti eiginlega að vera spakmæli, en er það kannski ekki. Bloggið hjá mér er sennilega misheppnuð tilraun til að sýnast merkilegur. Ég er nefnilega alls ekki efni í rithöfund eða skáld, þó ég hafi gengið með þá grillu alllengi. Bloggið hentar mér mjög vel. Stuttar greinar, sem allsekki þurfa að vera í neinu samræmi hver við aðra. Svo sakar ekki að ótrúlega margir lesa þetta bull.

Vopnuð lögregla er það hættulegasta sem til er, punktur. Er valdastéttin virkilega farin að óttast almenning svona mikið? Fyrst verður auðvitað skotið á múslima, vélhjólagengi og annan óþjóðalýð, en er ekki sá almenningur sem krefst nýrrar hugsunar og nýrrar stjórnarskrár sami óþjóðalýðurinn? Sjáið hve illan endi ótti og hræðsla fær. Misskipting auðs í heiminum veldur fátækt, bæði andlegri og líkamlegri. Hve margir hefðu fallið í búsáhaldabyltingunni ef lögreglan hefði verið vopnuð? Bara pæling.

Eftir því sem Stefán Ólafsson prófessor við Háskóla Íslands segir slær Morgunblaðið því upp í stórri fyrirsögn á forsíðu að 18 prósent Íslendinga greiði engan skatt. Auðvitað er þetta tóm vitleysa þó Viðskiptablaðið bergmáli þetta eftir því sem Stefán segir. Sjálfur sé ég aldrei Morgunblaðið nema hundgamalt. Hvað þá Viðskiptablaðið. Kíki þó alloft á mbl.is og treysti fréttum þar og á ruv.is betur en hjá öðrum vefmiðlum. Greinar þykir mér þó betri á Kjarnanum og a.m.k. til skamms tíma einnig á Eyjunni. Uppáhaldsbloggararnir mínir um þessar mundir eru Jónas Kristjánsson og Jens Guð. Upphafssíðan hjá mér er Gúgli sjálfur. Fréttablaðið sé ég nær aldrei. Engin ókeyis blöð rata hingað (og ekki seld blöð heldur) sem betur fer. Nóg er nú samt af þessu bréfarusli í póstinum. Stöku sinnum tek ég samt Bændablaðið í Kosti, en þangað fer ég nær alltaf á fimmtudögum því þá er hægt að fá þar ávexti á hálfvirði.

Dæmigert kjördæmapot átti sér stað bæði þegar Vaðlaheiðargöng og Landeyjahöfn voru ákveðin. Svipað er vissulega að segja um Héðinsfjarðargöng. Þau voru þó þokkalega undirbúin og rökstudd, en ekki rokið í framkvæmdir svotil undirbúningslaust eins og var um hinar tvær framkvæmdirnar. Ekki er þörf á að rifja upp nöfn núna, en auðvitað er rétt að kenna alþingi og ríkisstjórn um þetta alltsaman.

Gnarrinn sjálfur ræddi Guðshugmyndina opinberlega fyrir skemmstu. Sko hann. Þetta þorði hann. Reynslan er samt sú að trúarlegar deilur skila engu. Staðreyndirnar einar skipta máli. Menn líta þær samt misjöfnum augum. Við því er ekkert að gera. Fræðsla er algleymi.

Stutt og dagleg blogg eru á margan hátt það sem blívur. Best að setja þetta bara upp þó stutt sé.

Borgarspítalinn.

Athugasemdir

[Ellismellur 26.4.2015 kl. 08:55]

Já, það hafa margir áhyggjur af því hvað stöku einstaklingar sækja það fast að vopnbúa lögregluna.Hætt er við að gripið verði til norsku vopnanna sem sögð eru geymd suður á Miðnesheiði ef svo fer fram sem horfir varðandi vinnudeilurnar hér um þessar mundir.
Hvað þær varðar, þá held ég að populistar úr öllum flokkum hafi nýtt sé langt til of mikið þær skammtímavinsældir, sem þeir hafa fengið með því að "leysa" vinnudeilur með því að hækka sérstaklega laun "þeirra lægst launuðu" og láta svo launahækkanir deyja út upp eftir skalanum. Árangur þeirrar stefnu, að launa fólk ekki í samræmi við menntun er að leiða til þess að þetta fólk, sem við þurfum auðvitað mest á að halda til að starfrækja hér mannsæmandi þjóðfélag, hefur í auknum mæli sótt úr landi þar sem betri kjör bjóðast og stjórnarfar ekki jafn andskoti spillt og stýrt af gróðapungum og glæpahyski og hér er reyndin.