2269 - Hvergerðingar

Pólitískt séð finnst mér einna athyglisverðast á árinu, að ríkisstjórnin skuli hafa heykst á því að afturkalla ESB umsóknina. Auðvitað er líka athyglisvert að flestar ráðstafanir ríkisstjórnarinnar og meirihlutans á alþingi skuli hafa verið svo hægri sinnaðar sem raun ber vitni, en vitanlega var við því að búast. Oft hefur það verið svo að hægri sinnaðar ríkisstjórnir hafa átt í góðu sambandi við „aðila vinnumarkaðarins“ (ofnotaður orðhengill) en því virðist ekki vera að heilsa núna. Annað sem er athyglisvert er harkan í verkfallsaðgerðum lækna. Þeir eru alls ekki vinstri sinnaðir yfirleitt, hefur mér fundist.

Man mjög vel eftir t.d. Lilla (eða Ingvari) Christiansen, Jóni bensín, Mára Mikk og Kalla Jóhanns þó þeir hafi ekki verið í bekk með mér. Mest var ég auðvitað með þeim Atla Stefáns, Lalla Kristjáns, Jóa á Grund og strákunum hans Skafta ásamt Sigga í Fagrahvammi og Þórhalli Hróðmars. Stundum líka Mumma Bjarna Tomm, Magga Kalla Magg og Kidda Antons. Að sumu leyti fannst mér samt að ég væri nær pöplinum en þeir. Við þorpararnir (sem áttum heima í Hveragerði) sameinuðumst svo í því að líta niður á sveitavarginn þ.e.a.s krakkana úr Ölfusinu sem keyrðir voru í skólann á hverjum degi.

Vitanlega var þetta með pöpulinn – þó ég hugsaði alls ekki þannig þá, að einhverju leyti til komið af því að mér fannst að ósekju vera litið að sumu leyti niður á mig vegna atvinnu pabba míns. Hann var bara réttur og sléttur verkamaður en flestir hinna voru synir manna sem voru eitthvað sérstakt. Að sjálfsögðu ætti ég ekki að vera að nefna nöfn á þennan hátt, en ég er bara svona og kannski verður bloggið vinsælla með því. Auðvitað varð ég hissa í gær á því að lesendur (eða heimsækjendur skv. Moggabloggstalningu) væru orðnir nokkuð á annað hundrað á u.þ. b. tveimur tímum, en ég ætti ekki að vera að miklast af því. Kannski stafar það bara af því að fáir blogga á Nýársdag.

Almennur lokunartími verslana er sjálfsagt mörgum ofarlega í huga einmitt núna. Man vel eftir að sá tími var þannig í gamla daga að opið var til 10 alla laugardaga í desember (eða tvo eða þrjá síðustu þeirra fyrir jól – man ekki hvort) og til 12 á Þorláksmessu og hádegis á aðfangadag. Að öðru leyti minnir mig að opnunartími hafi verið samkvæmt venju. Hún var sú að verslanir voru yfirleitt opnar frá 9 til 6 alla virka daga og 9 til 12 á laugardögum. Lokað á sunnudögum. Ekki held ég að þetta sé þannig núna. Lokað var næstum allsstaðar 2. janúar vegna vörutalningar. Kannski er svo ennþá. Best að spyrja Gúgla samt.

Skrifa yfirleitt aldrei í athugasemdadálka dagblaðanna og kann ekki að twitta (eða tísta eins á víst að segja á því ástkæra og ylhýra). Bloggið og fésbókin nægja mér alveg. Eða hafa a.m.k. gert það hingað til og ég á ekki von á öðru en svo verði líka á þessu nýbyrjaða ári. Já, vel á minnst. Gleðilegt ár!!. Var ég annars búinn að óska lesendum mínum gleðilegs árs. Man það ekki og nenni ekki að gá að því.

Komið við á vinnustofu.

Athugasemdir

[Jóhannes F Skaftason 3.1.2015 kl. 10:27]

Heill og sæll Sæmundur. Alltaf finnst mér skemmtilegt að sjá upprifjanir á okkar góðu gömlu dögum í Hveragerði. En þó brestur mig minni þegar þú nefnir Jón bensín. Eini Jón sem ég man eftir á okkar aldri var Nonni Leós sem var reyndar mjög stutt meðal okkar þar til hann flutti á Selfoss að mig minnir.

[Sæmundur Bjarnason, 3.1.2015 kl. 10:51]

Já, þetta með Jón bensín. Kannski var hann bara kallaður það í vissum kreðsum. Jón ljósmóðir minnir mig að hann hafi líka verið kallaður. Það var ekki um neinn annan Jón að ræða sem hætta var á að hann ruglaðist saman við, svo engin þörf held ég að hafi verið á þessu viðurnefni. Hef heldur enga hugmynd um hvernig það er tilkomið. Staðreynd var það engu að síður. Kannski var það einhver hluti af einelti. Er bara að spekúlera núna. Held að hann hafi verið (og sé) sonur Herdísar ljósmóður sem átti heima vesturfrá eins og við kölluðum. Hann var talsvert yngri en við held ég.Það eru fleiri en þú sem þekkja ekki þetta viðurnefni. Þessvegna spekúlasjónirnar hjá mér.