2118 - Kranablaðamennska fréttabarna

Vissulega er það rétt að Internetið hefur breytt mjög hinu hefðbundna hlutverki blaðamanna í íslensku þjóðfélagi. Það er samt óþarflega mikið á þá ráðist. Það getur enginn skrifað eða talað íslenskt mál á þann hátt að öllum líki. Eiður Guðnason er duglegur við að tína upp helstu ambögurnar sem verða til hjá þeim sem í vinsæla fjölmiðla skrifa eða tala. Sjálfur skrifar hann ágætt mál, en er samt á sinn hátt fulltrúi gamla tímans. Verst er að þeir sem helst þyrftu á leiðbeiningum hans að halda lesa skrif hans síst allra.

Í vaxandi mæli er fólk að yfirgefa fjölmiðlana sem hér hafa ráðið lögum og lofum í marga áratugi. Flokksblöðin týndu tölunni og eru nú með öllu horfin. Mogginn heldur þá áfram að koma út og sumt er þar ágætlega vandað. Fréttir á mbl.is eru yfirleitt fjarskalega illa skrifaðar en eftirlit með fréttastofunni að öðru leyti nokkuð gott. Stjórnmálaskrifin eru sér kapítuli og margt er mjög undarlegt við blaðið. Annars er ég ekki áskrifandi og ætti ekki að fullyrða mikið um efni þess. Fréttablaðið sé ég nær aldrei. Ef ég fæ þá hugmynd að eitthvað merkilegt sé í því, kíki ég kannski í það á netinu. Vefritin les ég stundum. Blogg Egils Helgasonar á Eyjunni er það eina sem ég les nokkuð reglulega. Kíki oft á kjarnann.is og dv.is og visir.is svona stöku sinnum. Fésbókina skoða ég a.m.k. einu sinni á dag eða oftar, en hangi ekki þar heilu dagana eins og mér virðist að sumir geri. Bæði Mogginn og DV reyna enn að selja sig á netinu, en það gengur ekki. Nægilega vönduð skrif um allt mögulegt er hægt að fá ókeypis hvar sem er á netinu. Bækur, tónlist og sjónvarpsefni allskonar er á góðri leið með að verða aðgengilegt öllum án endurgjalds svo þessi viðleitni er vonlaus.

Um daginn kom forstjóri Brims í viðtal í sjónvarpi allra landsmanna og skýrði frá því grátklökkur að ekki væri rekstrargrundvöllur fyrir frystitogara og hann neyddist til að segja 30 til 40 manns upp störfum. Bíddu við. Er ekki eitthvað gruggugt við þetta? Er þetta ekki sami maðurinn og fékk eftirgefnar skuldir og svo er því haldið fram að útgerðin græði. Jafnvel einhverjar skýrslur til sem sýna það. Fer tap og gróði semsagt bara eftir einhverjum hentugleikum? Kannski er ofureðlilegt að menn láti svona. A.m.k. alvanalegt.

Margir velta fyrir sér hve lengi gjaldeyrishöftin haldist. Þegar þau voru sett var fullyrt á þau yrðu við lýði í hæsta lagi í 3 mánuði. Einhverjir trúðu þessu. Þeir eru jafnvel til sem trúa því að gjaldeyrishöftin hverfi á næstunni. Ekki er það líklegt. Sennilegast er að þau verði við lýði a.m.k. þangað til Ísland gengur í ESB. Eða fram að næsta hruni. Enginn veit hvernig Íslensk efnahagsmál þróast næstu árin. Margir vilja samt endilega spá um það og þykjast vera miklir spámenn. Sumt sem sagt er um þau er fremur ógáfulegt. Sumu er samt hægt að trúa með góðum vilja. Sá vilji fer aðallega eftir stjórnmálaskoðunum og sveiflast daglega til.

Margir spá því að veðurfar í heiminum fari kólnandi, enda svotil sólblettalaust með öllu. Samhengið þarna á milli og svo hnatthlýnunarinnar af mannavöldum er fræðimönnum ekki að fullu ljóst svo engin furða er þó leikmenn eins og ég hugsi fyrst og fremst um veður dagsins. Já, ég fór austur í Hveragerði á mánudaginn var og lenti í skafrenningi og fjúki á Hellisheiðinni og víðar eins og búast mátti við. Á heimleiðinni vonaðist ég til að komast niður úr snjófjúkinu fyrst í Hveradalabrekkunum, svo í Draugabrekkunni, en það var ekki fyrr en í Lögbergsbrekkunni sem því lauk og rigning tók við.

Auk þess legg ég til að bæjarstjórn Árborgar semji við eigendur Ásgautsstaðajarðarinnar og hætti því arðráni sem staðið hefur í marga áratugi. Jafnframt að fréttamenn kynni sér þetta mál, ef þeir hafa ekkert þarfara að gera, t.d. með því að hafa samband við lögfræðing þann sem hluti erfingja jarðarinnar hefur á sínum snærum. Hann nær þó engum árangri vegna samtryggingar valdamanna á svæðinu. Lögfræðingurinn heitir Sigurður Sigurjónsson og er sonur fyrrverandi lögreglustjóra hér í Reykjavík. Skrifstofu hafði hann í Kringlunni síðast þegar ég vissi.

Vaðið út í sjóinn.

Athugasemdir

[Emil Hannes Valgeirsson, 10.2.2014 kl. 23:37]

Reyndar er talsvert af blettum á sólinni núna enda sólin stödd í sólblettahámarki í ár. Tíðni sólbetta nær hámarki á ellefu ára fresti að meðaltali en svo hverfa þeir nær alveg á milli uppsveiflna. Það sem spekingar eru hinsvegar að tala um er að þetta sólblettahámark er með veikasta móti sem gæti bent til þess að næsta hámark verði enn veikara og sólblettir fáséðir um langt árabil. Um leið gætu norðurljósin orðið mun sjaldgæfari en nú þannig að kannski fer hver að verða síðastur að njóta þeirra. Áhrifin á veðurfar er svo önnur saga, óráðin og umdeild. En hvernig sem fer þá mun áfram skafa á Hellisheiðinni á veturna.

Hér má meðal annars fylgjast með sólblettum: http://spaceweather.com/

[Sæmundur Bjarnason, 11.2.2014 kl. 11:02]

Takk fyrir þetta Emil Hannes. Ég er nú enginn sólblettasérfræðingur og hef meiri áhyggjur af skafrenningi á Hellisheiði en þeim. Þetta er allt áreiðanlega rétt hjá þér. Mér er alveg sama um Norðurljósin. Varðandi Hellisheiðina má segja að ég hafi á mánudaginn í hinni vikunni ruglað saman veðurhæð og úrkomu. Skafrenningur er ekki til skaða á vel byggðum vegi. Snjókoma getur aftur á móti verið það. Kannski er ég með næsta blogg í huga þegar ég skrifa þetta því það er nefnilega næstum tilbúið hjá mér.