2117 - Olympíuleikar o.fl.

Eru gömlu risaeðlurnar úr íslenskum stjórnmálum enn að stýra pólitískri umræðu á landinu? Með gömlu risaeðlunum á ég t.d.við Björn Bjarnason, Hjörleif Guttormsson, Styrmi Gunnarsson og Ragnar Arnalds. Reyndar eru þeir kannski ekkert eldri en ég, en þeir eru þó allavega á móti inngöngu í ESB en það er ég ekki. Þessvegna er það sem ég kalla þá risaeðlur og finnst að ég megi það.

Annars er það ekki inngangan í ESB, sem er mál málanna í dag. Vinstri kórinn vill álíta að það sé öryrkja- og ellilífeyrisfrumvarpið sem samþykkt var á alþingi s.l. þriðjudag. Vel má líta á það sem aðför að þeim sem annt er um persónulegan rétt sinn. Í flestum greinum held ég samt að þetta verði til mikilla bóta og leyfi það sem starfsfólk TR fær til söfnunar upplýsinga afsakanlegt. Mér hefur fundist starfsfólk TR standa sig eins og búast má við af fólki í þess konar störfum. Hvorki vel né illa. Margir hafa samt ekki sömu sögu að segja af samskiptum sínum við þá stofnum. Held að hlutverk þeirra sem hjá TR vinna sé stundum erfitt. Almennt líta opinberir starfsmenn niður á almenning. Algerlega að ófyrirsynju.

Mál málanna þessa dagana er auðvitað Vetrarólympíuleikarnir í Rússlandi. Þau íþróttamót sem draga að sér flesta áhorfendur og auglýsendur eru Ólympíuleikar, Heimsmeistararamót í Knattspyrnu og Formúlu eitt mótin. Formúlan er á hverju ári og OL og fótboltinn á fjögurra ára fresti. Það er nýlega sem farið er að halda Vetrar-OL á milli sumarleika. Sennilega er það gert til að græða meiri peninga. OL-hringirnir eru góð söluvara. Evrópumót og allskyns svæðamót í hinum ýmsu greinum söngvakeppnir og allskyns uppákomur er síðan reynt að halda til að fá bita af auglýsingakökunni. Hún er alveg gríðarstór og þar skipta tímasetningar miklu máli. Fyrst og fremst er þetta barátta um að vekja á sér athygli. Síðan koma mannréttindamál og fleira sem verklitlir fjölmiðlamenn hafa áhuga á, inn í myndina. Ef réttlætanlegt var að kalla Ólympíuleikana sem haldnir voru í Berlín árið 1936 Hitlers-leika er margt sem bendir til að ekki sé síður hægt að kalla þess Vetrarolympíuleika sem eru að hefjast í Rússlandi núna Pútín-leika.

Hef undanfarið verið að lesa í kyndlinum mínum bók um aldraðan mann með gervifót og langt genginn Alzheimers-sjúkdóm sem þvælist fram og aftur um Bandaríkin með 13 ára gömlum strák. Kona karlsins, sem er miklu yngri en hann og foreldar stráksins eru auðvitað að farast úr áhyggjum og margskonar misskilningur veður uppi. Karlinn og strákurinn ná hinsvegar ágætlega saman. Bók þessi heitir „Taking flight“ og er eftir Adrian R. Magnuson. Kannski svolítið stefnulaus og fjallar ekki um neina stóra atburði. Er ágæt samt. Höfundur lætur allar helstu persónurnar segja frá til skiftis og notar ýmist fyrstu eða þriðju persónu frásagnarhátt. Hann virðist einkum vera að velta fyrir sér andstæðunum frelsi og öryggi. Fuglaskoðun kemur einnig mjög við sögu. Á sínum tíma kostaði þessi bók ekki nokkurn skapaðan hlut, en nú sýnist mér að hún kosti yfir 8 dollara á Amazon. Veit ekki mikið um þennan Magnusson. Hann gæti verið af íslenskum ættum.

Auk þess legg ég til að bæjarstjórn Árborgar verði neydd til að semja um not af Ásgautsstaðajörðinni og látin hætta þessu sífellda arðráni.

Sjósund undirbúið.

Sjón í hópi höfunda sem mótmæla

Athugasemdir

[Grímur 6.2.2014 kl. 10:31]

Vinsælasta viðfangsefni fréttamanna og bloggara - "Sparka í Pútín"

Það mætti halda að þetta væri keppni þar sem allt er leyfilegt

[Áslaug Benediktsdóttir 6.2.2014 kl. 10:33]

Það er leiðinda fasistafnykur af þessu öryrkja og ellilífeyrisþegafrumvarpi

Helgi pírati hefur beðist afsökunar á því að hafa samþykkt það,og segir það hafa verið vanhugsað af sér.

Kannski verður næst lögskipað að stja öklabönd á aldraða og öryrkja til að fylgjast betur með þeim svo þeir fari sér nú ekki að voða eða ráfi of lengi um án eftirlits.

Áslaug

[Sæmundur Bjarnason, 6.2.2014 kl. 12:11]

Mér finnst ég ekki neitt vera að sparka í Pútín Grímur. En það er ekki hægt að mæla á móti því að hann hefur haft meiri perósnuleg afskipti að þessum Ólympíuleikum en þjóðhöfðingjar eru vanir að hafa. Allt leyfilegt segirðu. Pútín sjálfur er nú ekki alltaf vandur að meðölum.

Áslaug, fasistfnykur finnst mér ekki af lögunum og sumt af andstöðunni er greinilega byggt á misskilingi. Öklabönd, gyðingastjörnur og þ.h. er áróður sem missir marks.