2050 - Tölvur o.þ.h.

Stórtíðinda má vænta af pólitíska sviðinu. Þó ekki alveg „strax“ (sem er víst búið að endurskilgreina). Óánægjan með fjárlagafrumvarpið virðist jafnvel almennari en venjulega. Mikilla tíðinda er þó varla að vænta fyrir Jól úr þessu. 

Menn hafa rætt talsvert um það á fésbókinni hvort réttara sé að segja norður eða vestur á Patreksfjörð.  Um þetta má margt segja, en málvenjan ræður, finnst mér og íbúar á staðnum, sem sjaldnast eru í vafa. Eins er það með forsetningar á undan staðarnöfnum. Sú hugmynd að þetta (áttatilvísanir eftir staðsetningu) sé hugsað útfrá landsfjórðungunum fornu er afar líkleg. Erfiðara er að finna reglu varðandi forsetningarnar.  Og hvaðan er dregið „landsuður og útnorður“? Hef heyrt að þá sé miðað við Noreg. (Það sé semsagt landið í þessu tilfelli) Þaðan komu flestir landnámsmennirnir að því að sagt er, svo það er sennilegt. Þá er landsuður = suðaustur, útsuður =suðvestur, landnorður = norðaustur og útnorður = norðvestur. Bara hugmynd.

Ergelsi og pirringur útaf því að aðrir hugsi ekki eins og maður sjálfur hvað tölvur varðar er oftast óþarfur. Sem betur fer er það svo að svipaðri eða alveg eins endastöð er hægt að ná á mismundandi hátt hvað það snertir einsog flest annað. Oftast er hægt að fara fleiri en eina leið að sama marki og þó þær séu kannski misfljótlegar er óþarfi að fordæma þá sem fara lengstu leiðina. Hún er stundum einfaldari og hentar betur þeim hugsunarhætti sem notandinn er vanur. Þetta á ekkert síður við um aðra tækni en tölvur og getur oft skýrt augljósan mun kynslóða.

Helga Arnardóttir á Stöð 2 og María Sigrún Hilmarsdóttir á RUV eru bestu fréttalesararnir um þessar mundir. Mér finnst Logi Bergmann Eiðsson ofmetinn sem slíkur og Edda Andrésdóttir vera búinn að vera of lengi í djobbinu. María Sigrún hefur heilmikla útgeislun og lyftir þeim fréttum verulega sem hún les. Annars er þetta ekki eitthvað sem vert er að fjalla mikið um. Íslenskir fjölmiðlar eru vandræðabörn. Samanburður við útlönd verður þeim alltaf óhagstæður, sama hvað Sigmundur Davíð segir.

Svo þeir sem ég hef svikið að undanförnu og bíða með öndina í hálsinum eftir því að ég bloggi (sem eru víst fáir) þá er ég að hugsa um að senda þetta sem fyrst á Moggabloggið, enda er ég leikinn í því. Kommur og þessháttar mega þeir setja þar sem þeir vilja, sem það vilja. Ekki kann ég það.

Allt í ólestri. Samt verður þetta að húsi.

Athugasemdir

[Ellismellur 4.10.2013 kl. 10:08]

Takk fyrir þetta. Held að það sé margt til í þessu varðandi áttatáknanir. Það er eins og orðtakið "að fara utan". Út var vestur í Noregi og þeir sem voru að fara til Íslands fóru því út, "Út vil ek", sagði Snorri, þá var hann í Noregi og vildi heim. Eins fara menn enn þann dag í dag "utan" þegar þeir fara til Evrópu frá Íslandi og reyndar hvert sem þeir eru að fara. Annars táknar "út" eða "úteftir" mjög mismunandi áttir eftir því hvar maður er á landinu. Norðanlands táknar það yfirleitt norður, en snúi t.d. firðir mót austri, táknar það oft austur. Hef fregnað af því bæði á Austfjörðum og eins á Ströndum.
En að fjárlögunum. Önnur eins og jafn fáránleg örlagavitleysa og kreddubundið kjaftæði hefur held ég aldrei verið lagt fram á þingi. Því miður virðist það hafa verið þannig, að fjöldi fólks, sem er orðið örvæntingarfullt af fjárhagsáhyggjum hafi í fljótræði kosið þessa fáráða á þing í vor vegna þess að þau trúðu því að þeir myndu skera þau niður úr þeirri fjárhagslegu stöðu, sem það var komið í vegna gengisbindingar og annarrar verðtrygginga fjárskuldbindinga. Nú nagar þetta fólk handarbökin og við reyndar öll, því þetta bitnar á allri þjóðinni. Það eru því miður engin töfralyf eða galdralausnir við fjárhagsvanda þjóðarinnar. Því er nú verr og miður. Eina lausnin, sem til er, er innganga í Evrópusambandið og upptaka nýs og stöðugs gjaldmiðils. Fólk þarf líka að fara að læra að hagsmunum alþýðufólks er best borgið með ríkisstjórn, sem starfar eftir sósíaldemókratískum megingildum. Lukkuriddarar skoðanasystkina Teboðshreyfingarinnar munu aldrei bjarga neinu fyrir almenning. Enda einskorðast allt þeirra starf við að tryggja að handhafar nýtingarréttar íslenskra auðlinda, sem eru jú ekki einu sinni búsettir á landinu, fái sitt.

[Sæmundur Bjarnason, 7.10.2013 kl. 08:44]

Mjög sammála þér um þetta, Ellismellur. Innst og fremst getur líka í huga fólks haft gjörsamlega andstæðar merkingar. Forsetningarnar "í og á" á undan staðarnöfnum t.d. kauptúna eru merkilegt rannsóknarefni. Ómögulegt að finna nokkra reglu, finnst mér.