2021 - Ástæður Vesturferða

Það sem mér finnst vera aðalatriðið varðandi limrur er að stuttrímið sé rammandi og frumlegt. Endarímið helst líka. Samanborið við ferskeytlurnar held ég að lítið hafi verið samið af limrum og þessvegna séu svona margir að reyna sig við þær. Auðvitað er það mikið lýti á þeim ef ljóðstafirnir eru á maa og faa eins og danskurinn mundi segja.

Öfugur þríliður á hvolfi týndist í Hreppunum í gær. Finnandi vinsamlega skili honum ekki.

Örleikrit í einum þætti. (Samið eftir að horft var á ógleymanlega frétt á Stöð 2.)

A: „Vá, hann flöskuskeit.“

B: „Nei, hann brenndi af.“

A: „Nú, eins gott að hann var þarna í fjörunni.“

B: „Hann var ekkert þar.“

A: „Hvar þá?“

B: „Á skipinu, náttúrulega.

Auðvitað skiptir máli hvernig litið er á söguna. Aðeins með því að kynna sér hana er hægt að öðlast nokkurn skilning á samtímanum. Deila hefur risið milli ESB-sinna og andstæðinga aðildar um ástæður fyrir Vesturferðum Íslendinga seint á nítjándu öldinni. Gunnar Smári Egilsson skrifaði grein í fréttablaðið eða fréttatímann og segja má að hún hafi verið upphafið. Páll Vilhjálmsson, Egill Helgason og Ómar Ragnarsson hafa síðan lagt orð í belg. Vel getur líka verið að ég hafi misst af einhverjum þáttakendum í þessari deilu.

Páll Vilhjálmsson er fulltrúi Evrópu-andstæðinga í deilunni. Hann heldur því fram að ómilt veðurfar og uppskerubrestur hafi verið aðalástæða Vesturferðanna. Íslendingar hafi alltaf verið, eins og Sigmundur forsætis segir, sjálfstæðir, samhentir og án stéttaskiptingar. Ómar Ragnarsson og fleiri halda því fram að mikil stéttaskipting hafi verið hér á landi og fátæklingar örsnauðir og hjálparvana hafi beinlínis flúið landið þegar tækifæri bauðst.

Það vill svo til að ég veit að Ómar & Co. hafa rétt fyrir sér í þessu. Nær alla tuttugustu öldina var reynt að halda því að fólki að næstum allt sem aflaga fór á umliðnum öldum væri Dönum að kenna. Sannleikurinn var þó sá að Íslendingar voru Íslendingum verstir. Stéttaskipting var gífurleg hér og fátækt mikil. Afi minn bjó við mikið hungur í uppvexti sínum og náði aldrei fullum vexti, var innan við 150 sentimetrar á hæð og öll hans systkini.

Margt hefur breyst hér eftir blessað stríðið. Segja má að lífskjör séu allgóð, þó er það svo að stéttaskipting er enn mikil, en mestan part falin. Sumir eiga nóga peninga, aðrir enga. Margir halda að þeir eigi fullt af peningum en það eru bara skuldir. Hrunið sem varð hér árið 2008 hefur skerpt línurnar að nýju. Margir vantreysta þeirri ríkisstjórn sem nýlega hefur tekið völd hér og telja að hún muni draga taum þeirra ríku og þeirra sem halda að þeir séu ríkir eða a.m.k. bjargálna.

Fífill og fluga.

Athugasemdir

[Ellismellur 1.8.2013 kl. 08:19]

Sammála þér eins og oft áður. Stéttaskipting hefur oftast verið og er enn gríðarleg hér á landi. Sögufölsun er nánast viðtekin hvað varðar þessi mál öll. Ég held að enn í dag sé fullt af fólki sem trúir þeim viðbjóði, sem fólst í Íslandssögu Jónasar frá Hriflu, sem til skamms tíma var kennd sem sagnfræði og vísindi. Ég held að margur maðurinn þyrfti að skoða skrif Jónasar í Skinfaxa á árunum milli stríða til að átta sig á fársjúkum huga þessa manns og fasiskum hugmyndum hans. Enn í dag er heill stjórnmálaflokkur rekinn á grundvelli hugmynda hans. Hefur okkur virkilega ekkert miðað í menntun og þroska?

[Jóhannes Laxdal Baldvinsson, 1.8.2013 kl. 13:56]

Þjóðfélög byggjast á stéttaskiptingu.  Það þarf ekkert að rífast um það.

[Sæmundur Bjarnason, 1.8.2013 kl. 17:07]

Og Ísland er ekkert stéttlausara en önnur lönd. Hún er bara öðruvísi.