1693 - Duglaust alþingi

Gamla myndin.
Ávörpin enn á pallinum í lauginni. Nú hefur ljósmyndarinn flutt sig aðeins.

Ekki get ég alltaf skrifað. Nú er ég t.d. andvaka og klukkan að verða fjögur. Ekki get ég skrifað neitt við svona ömurlegar aðstæður. Það er samt bót í máli að bjart er úti. Hnattstaðan lætur ekki að sér hæða.

Einhverntíma ætla ég að yrkja kvæði.
Fái ég bara bæði
brennivín og næði.

Einhverntím í fyrndinni setti ég þetta saman. Þetta get ég en á í miklum vandræðum með að setja saman venjulega limru.

Förum til Hveragerðis á eftir og kannski á Selfoss. Bjarni og Tinna koma líklega hingað og fara trúlega með okkur austur.

Það er bæði hægt að stela öllu steini léttara og svo er líka hægt að stela steinum.

Horfði á útsendingu frá alþingi á miðvikudagskvöldið. Held a.m.k. að það hafi verið þá. Sá meðal annars þegar Björn Valur Gíslason bar drykkjuskap uppá þingmann. Hélt satt að segja að hann ætti við Árna Johnsen því hann var sá eini sem hafði hagað sér eins og fyllibytta í ræðustól. M.a. yfirgefið ræðustólinn seint og illa þegar þingforseti (Ragnheiður Ríkharðsdóttir) hafði vísað honum þaðan. En Árni er víst bara vanur að haga sér svona og enginn sem kippir sér neitt upp við það. Auðvitað var óþarfi hjá Birni að koma með svona ásakanir úr ræðustól og eðlilegt að misvirða það við hann. Einhverjir tóku þetta samt til sín og skömmu seinna varð talsverður hávaði í salnum þó ekki væri því sjónvarpað. Forseti getur líklega sagt til um hvað gerðist þarna.

Annars er alþingi að verða skrípastofnun. Það er eins og alþingismenn vilji endilega að virðingin, sem sumir hafa hugsanlega borið hingað til fyrir þessari stofnum, hverfi alveg. Eflaust fara þeir næst að slást þarna.

Hús á Selfossi.

Athugasemdir

[Láki 10.6.2012 kl. 22:46]

Sammála, auðvitað átti Björn Valur ekki að gefa það í skyn að Jón Gunnarsson væri ekki alveg edrú.

Því þó svo hefði verið, þá var það harla ólíklegt að Jón myndi stíga í pontu og játa smá brennivínsdrykkju á sig í vinnunni.

En viðbrögð Sjálfstæðismanna benda samt til þess að líklega hitti Björn bara naglann á höfuðið !

[Sæmundur Bjarnason, 11.6.2012 kl. 07:55]

Já, sannleikanum verður hver sárreiðastur, en það breytir þvi ekki að alþingismenn eru misslæmir. Sumir eru þannig að þeir ættu alls ekki að vera þarna. Kannski sjá þeir það ekki sjálfir en samþingsmenn þeirra ættu að koma þeim í burtu. Ekki bíða þess að alþingiskosningar lagi verstu mistökin. Kannski koma bara ný í staðinn og virðing þingsins hverfur endanlega.