1671 - Gunnar Helgi

Gamla myndin.
Þarna eru menn greinilega þreyttir. Mér virðist mega þekkja þarna Guðmar Magnússon, Pétur Esrason og Árna Reynisson a.m.k.

Fjölmiðlafárið í kringum forsetakosningarnar versnar stöðugt. Veit ekki hvar þetta endar. Áhugi minn á að leggja orð í forsetabelginn minnkar stöðugt. Ætli ég verði ekki að reyna að einbeita mér að öðru.

Í rauninni er hundleiðinlegt að spara. Best er að láta hverjum degi nægja sína þjáningu. Bara passa að þjáningin verði ekki of mikil. Best að losna við hana með því að eyða ótæpilega. En þá kemur árans samviskubitið og áhyggjurnar.

Já, það er erfitt þetta líf. Það endar samt að lokum. Það er kannski það versta. Eða það besta. Það sem mestu máli skiptir er tímabilið frá fæðingu til dauða. Skelfing var þetta spekingslegt hjá mér. Nú held ég að sé best að fara að sofa.

Kannski landsbyggðarmenn hafi ekki allir fattað djókinn þegar ég minntist á þá í gær. Sá svolítið eftir að hafa sagt þetta. Það er jafnvel hægt að hugsa sér að til séu húmorslausari menn en ég. Mér finnst sumir baggalútsbrandararnir a.m.k. meinfyndnir.

Er eiginlega svolítið foj yfir því hvað lítið er kommentað hér. Þó er það svo að eftir Moggabloggsteljaranum að dæma þá er bloggið mitt talsvert lesið. Þeir sem oft koma hingað og er alveg sama þó aðrir viti af því mættu semsagt alveg segja hæ og bæ stöku sinnum. Hef samt heyrt um að sumir bloggarar séu lagðir í hálfgert eineldi af ágengum kommenterurum. Ekki óttast ég slíkt.

Tek eftir því að Pressan talar um fasbók þegar hún meinar fésbók. Aðrir fjölmiðlar og netmiðlar virðast hafa fallið fyrir því síðarnefnda. Einnig ég og það án þess að vera miðill. Stuttar setningar eru mínar ær og kýr. Sjaldan verða þær of stuttar.

Var í gær að skoða gamalt blogg-skjal hjá mér. Þar sá ég bréf frá Gunnari Eysteinssyni. Hér er kafli úr því með leyfi höfundar (eða án):

Ég er búinn að keppast í nokkur ár við að koma vefsíðunni minni á framfæri, sem bíður uppá ókeypis þjónustu... án árangurs. Ég les bloggið þitt reglulega og ég man ekki hvaða færsla það var en þú nefndir það fyrir skömmu að þú vissir ekki hvað þú ættir að skrifa um, eða hvort þú ættir að skrifa blogg. Ég á kannski eftir að sjá eftir þessu, en værir þú til í að skrifa bloggfærslu um vefsíðulistann Topplistinn.is? Ef þú skrifar eitthvað neikvætt þá er það í fína lagi “bad publicity is good publicity”

Fyrir nokkrum árum (mörgum) datt mér í hug að koma á framfæri þjónustu sem væri ókeypis ( Leit.is er með svipaða þjónustu en þar er ársgjaldið 39.200 á ári) – Þetta var bara hugmynd á meðan  íslendingar “héldu” að þeir væru ríkasta þjóð í heimi. En þegar kreppan kom hugsaði ég með mér að núna er tími fyrir mig að bjóða upp á þessa þjónustu, hún er jú ókeypis. EN það er eins og fólk lifi ennþá í þeirri staðreynd að ókeypis sé drasl. 

 Með bestu kveðju,
Gunnar Helgi Eysteinsson
http://www.topplistinn.is

Sennilega hef ég alveg gleymt að sinna þessu þá og satt að segja fer ég ekki oft á þessa síðu og það er mest vegna þess að mér finnst ég hafa lítið að sækja þangað. Nú er ég semsagt búinn að minnast á hana og geri það kannski betur seinna.

Steinar og haf.

Athugasemdir

[DoctorE 15.5.2012 kl. 08:58]

Hæ Sæmi :)

[Ellismellur 15.5.2012 kl. 10:34]

Tja, ég er með tiltölulega góða samvisku, kommentera reglulega og þykist vera kurteis.

Varðandi myndina, þá sýnist mér Guðmundur Gaukur vera þarna í fremstu röð og GRÓS líka?

Í öllum bænum hættu ekki að blogga. Þetta er bráðnauðsynlegur skammtur til að viðhalda geðheilsunni réttu megin við girðinguna utan um Klepp.

[Sæmundur Bjarnason, 15.5.2012 kl. 22:29]

Takk.

Ellismellur, heldurðu að þetta sé GRÓS fyrir framan Árna Reynisson. Mér sýnist þetta frekar vera Jón Illugason. Sammála þér með Guðmund Gauk, en hver er þetta fyrir aftan hann?