1610 - Where is everybody?

Gamla myndin.
Skrúðganga í Hveragerði. Þetta er í Bláskógum og húsið hans Kristins Péturssonar í baksýn fyrir miðju.

Var að enda við að lesa merkilega bók sem er um möguleikana á að líf kunni að finnast á öðrum hnöttum. Höfundurinn gengur mjög skipulega til verks og fer yfir 50 helstu skýringarnar á Fermi-þversögninni og útskýrir hana fyrir lesendum.

Þannig er gerð grein fyrir bókinni á Amazon.com:

Ég er fæddur í september árið 1942. Þann 2. desember það sama ár má segja að kjarnorkuöldin hafi hafist. Þá tókst mönnum í fyrsta sinn að koma af stað kjarnaklofnun í úrani. Sem betur fer var sú kjarnaklofnun „under control“ eins og sagt er. Það var Enrico Fermi sem hafði þá stjórn með höndum. Þetta var hluti af svokallaðri Manhattan-áætlun sem eins og margir vita fólst í því að smíða kjarnorkusprengju. Arthur Holly Compton var stjórnandi keðjuverkunar-verkefnisins og hringdi til James Bryant Conant sem stjórnaði Harvard háskólanum á þessum tíma og sagði: „Jim, you will be interested to know that the Italian navigator has just landed in the new world.“

Þetta hef ég meðal annars úr þessari bók. Þ.e.a.s. ég vissi svosem að Fermi stjórnaði fyrstu kjarnaklofnuninni og að hún átti sér stað skömmu eftir að ég fæddist. Hitt er úr bókinni og þar er að sjálfsögðu margt fleira.

Einn merkilegasti kaflinn í bókinni finnst mér vera undir lokin. Það ræðir höfundur um málstöðvar heilans og máltöku barna. Það mál er afar merkilegt. Þar ræðir hann meðal annars um kenningar Chomsky‘s um að vissir þættir í máltökunni hljóti að vera meðfæddir. Það er nefnilega alveg undur og stórmerki hve fljót börn eru að læra að tala og hvernig þau gera það. Fátt held ég að sé betur til þess fallið að kynnast starfsemi heilans en að setja sig vel inn í þau mál.

Kannski geri ég betur grein fyrir þessari bók seinna. Hún á það alveg skilið. Það er ólíkt merkilegra að velta fyrir sér UFO-um, lífi á öðrum hnöttum og þessháttar en íslenskum stjórnmálum og íslensku Hruni. Flestir fara ekki lengra en að ESB og Grikklandi ef þeir vilja finna eitthvað merkilegra, en hvers vegna ekki að fara alla leið?

„Ekkert er stórt og ekkert er smátt án samanburðar við annað.“ Þetta minnir mig að Jónatan Swift hafi sagt. Ég, eins og margir fleiri, las með áfergju Gullivers-bækurnar á sínum tíma og þó mörgum finnist ég oft gera lítið úr Íslandi og íslenskum veruleika vil ég bara minna á spakmæli þetta og boðskap þess. T.d. á þetta  vel við um samanburð á UFO og Hruninu.

Sveiflast alltaf á milli þess að álíta að fólk sé fífl og álíta að það sé ekki fífl. Þegar ég horfi t.d. á boltaleiki í sjónvarpinu verður fyrri fullyrðingin oftast ofaná. (Já, nú verður þú að athuga hvort ég nefndi á undan.) Við kosningar og þjóðaratkvæðagreiðslur verður það oftast sú síðari. Jafnvel þó ég lendi í miklum minnihluta. Hvernig stendur eiginlega á þessu?

Ofan gefur snjó á snjó.

Athugasemdir

[Stjörnufræðivefurinn (www.stjornufraedi.is), 13.2.2012 kl. 09:53]

Bókin um þversögn Fermis er stórskemmtileg. Á Stjörnufræðivefnum höfum við tekið saman 25 útskýringar á þversögninni.

[Sæmundur Bjarnason, 13.2.2012 kl. 11:12]

Ég er mjög ánægður með þessa athugasemd frá ykkur. Ég veit að mjög margir hafa áhuga á þessum málum. Umræður um þau finnst mér þó oft leiðast út i umræður um fljúgandi furðuhluti eða trúmál sem ég hef minni áhuga á. Ég mun áreiðanlega kanna betur vefinn ykkar, sem ég hef lengi ætlað mér að gera, og t.d. leita að umræðuvettvangi um kosmólógíu eða skyld málefni. Gallinn við umræður um þessi mál er einkum sá að allir virðast hafa mismunandi hugmyndir um hvernig takmarka skuli umræðuna.