1605 - Hundaskítur

Gamla myndin.
Þessi mynd er af Hótel Hveragerði. (Ljósbrá) Skemmtileg mynd. Ekki veitir af að styðja stigann vel.

Skelfing hefur fólk gaman af að breyta fésbókar-prófæl myndunum sínum. A.m.k. er þetta þannig með mína fésbókarvini. Mér finnst ég alltaf vera að fá tilkynningar um slíkt. Apropos fésbókartilkynningar; þær eru að verða algjör plága því ég asnaðist til að setja nokkra sem skrifa mjög mikið upp sem nána vini. Fésbókin fullyrti að viðkomandi fengju ekkert að vita um það. Svo er ég alltaf að fá beiðnir um leyfi til að gera hitt og þetta, en ég er ekkert snokinn fyrir því. Annars er ég sífellt að fjölyrða (mest neikvætt) um fésbókina og dettur alltaf í hug málshátturinn frægi. Það er tungunni tamast sem er hjartanu kærast. Ósköp hefði ég lítið um að skrifa ef engin væri fésbókin.

Eitt mest notaða blótsyrðið sem við strákarnir notuðum í gamla daga var orðið „hundaskítur“. Hundaskítur þetta og hundaskítur hitt. Þú veist ekki hundaskít um þetta. Hefur ekki hundaskíts vit á því. O.s.frv. Ef við vildum vera óvenju krassandi og magnaðir gátum við talað um mannaskít. Einstöku sinnum fundum við slíkt (eða héldum það) úti í móa en þorðum varla að koma nálægt slíku ógeði. Flugurnar létu sér það samt vel líka; en tölum ekki meira um það.

Það er fátt sem mér dettur ekki í hug. Sjálfum finnst mér þó að mér detti alltof fátt í hug. Bloggað get ég samt fjandann ráðalausan þó ég hafi raunar ekkert að segja. Hafi líka varla hundaskíts vit á nokkrum hlut.

Nú er stóri bílaplansjökullinn að hverfa. Svolítil ísing eftir en með sama áfrahaldi hverfur hún líka. Skíthræddur samt um að veturinn heimsæki okkur aftur. Á þó ekki von á að það verði neitt desember-janúar-skot en snjór á áreiðanlega eftir að koma hér á StórKópavogssvæðinu. Þó ekki væri nema til þess að nýta eitthvað helvítis iðnaðarsaltið, sem allar geymslur eru fullar af.

Spurning hvort DV er ekki farið að vinna gegn tilgangi sínum. Öfgarnar hjá þeim varðandi hrunið eru slíkar að þær gagnast mest þeim sem vilja þagga allt niður. Samkvæmt DV á að taka alla sem hugsanlega eru á einhvern hátt tengdir Hruninu og velta þeim uppúr tjöru og fiðri ef ekki eitthvað enn verra. Segi bara svona. Ekki fer samt hjá því að umræðan um Hrunið er að breytast. Eðlilegt er að fólk sé orðið þreytt á tuðinu. Fróðlegt verður að sjá úrslitin úr næstu kosningum. Ekki bara fróðlegt, heldur geta úrslit þeirra ráðið miklu um framtíð okkar allra.

Af einhverjum ástæðum fór ég að athuga bloggvini mína á Moggablogginu. (Taldi þá samt ekki) Einu sinni voru þeir alltaf í stafrófsröð og fljótlegt að finna þá ef ég þurfti á að halda.Nú eru þeir það ekki og ég get ómögulega áttað mig á í hvaða röð þeir eru. (Fésbókinni átta ég mig sennilega aldrei á) Kannski hefur þeim fækkað líka; hef bara ekki hugmynd um það. Ekki hef ég breytt stjórnborðinu neitt því ég forðast alltaf að fikta í því. Annars er mikil markleysa að vera að spekúlera í svona löguðu en ég get bara ekki að mér gert.

Snjór um allt.

Athugasemdir

[Ellismellur 7.2.2012 kl. 12:05]

Þú nefnir kosningar. Mig uggir að kosningarnar til Stjórnlagaþings hafi út af fyrir sig verið fyrirboði um það sem koma skal varðandi þátttöku í kosningum almennt. Mér heyrist hljóðið í fólki sem ég umgengst vera þannig, að það sé komið að þeirri niðurstöðu að það sé nánast sama hvað maður kýs, það verði alltaf sömu klíkurnar sem öllu ráða. Mér kæmi því ekkert á óvart þótt þátttaka í næstu þingkosningum yrði undir 50%, sem er gríðarleg breyting frá því sem verið hefur hér.

[Ólafur Sveinsson 7.2.2012 kl. 12:08]

Við sögðum einnig"þú ert helvítis hundaskítur".
Snjórinn er að hverfa og allur hundaskíturinn kemur í ljós, á gangstéttum, sem og annars staðar.

Stígi sem flestir hundaeigendur í hundaskít.

[Sæmundur Bjarnason, 7.2.2012 kl. 14:27]

Ellismellur, ég er sammála þér um að kjörsókn muni fara minnkandi en samt ekki að hún fari nærri strax undir 50%.

Ólafur, ég er dálítið á móti hundum. Aðallega vegna þess að svokallaðir hundaeigendur fara mjög misjafnlega með þá og ráða mismunandi vel við þá.