1585 - Miklihvellur

Gamla myndin.
Hér er riðið hart. Kannski mætti þekkja á fjöllunum í baksýn hvar þetta hestamannamót hefur verið. Ekki man ég það.

Þeir sem óskuðu með grátstafinn í kverkunum eftir nógu miklum jólasnjó (svo jólin yrðu jólaleg) hafa líklega fengið ósk sína uppfyllta. Mér finnst snjórinn og kuldinn vera farinn að valda vandræðum eins og alltaf er. Það er alveg nóg komið af snjó og ófærð hér á Reykjavíkursvæðinu og svo eru jólin þar að auki búin.

Í kyndlinum mínum er ég núna að byrja að lesa bók (eða réttara sagt pdf skrá) um Fermi´s paradox. Hann er svona á ensku: Where is everybody? Þar er Enrico Fermi, sem er þekktur m.a. fyrir þátttöku sína í Manhattan projektinu, að velta fyrir sér af hverju ekki séu geimverur útum allt. Margar skýringar eru til á því og um sumar (margar) þeirra er fjallað í bókinni. Þarna er meðal annars minnst á Drake-jöfnuna frægu og margt fleira. Mér finnst margt sem snertir „kosmologiu“ mun eftirtekarverðara en trúmál. Hef lesið talsvert eftir Carl Sagan og fleiri og auðvitað séð sjónvarpsþættina sem hann stjórnaði. Man eftir sögu sem lesin var í útvarpið á sínum tíma (fyrir mjög löngu) og nefndist „Svarta skýið“ og var eftir Fred Hoyle sem mig minnir að hafi einnig verið einn af forvígismönnum „Big bang“ kenningarinnar á sínum tíma. Ætti sennilega að fara að kynna mér stjörnufræðivefinn en einhvern vegin hef ég aldrei haft tíma til þess.

Hvað mun gerast þegar bókasöfn fara að lána rafbækur. Þau lána núna hindrunarlaust hljóðbækur. Auðvitað er hæg að afrita hljóðskránar. Eða því geri ég ráð fyrir. Nenni samt ekki að prófa.

Eiríkur Örn Norðdahl skrifar um afritunarvarnir á rafbókum á bloggið sitt og fésbókina líka. Segir slíkar varnir tilgangslausar og valda einungis skaða og ruglingi auk þess að vera óhemju dýrar. Höfundarréttur er mér talsvert hugleikinn og margir hafa áhuga á honum. Það er samt ekki rétt að annar aðilinn ráði öllu þar. Það er jafnvitlaus hugmynd að listamenn ráði þar öllu eins og að hver og einn geti stolið því sem hann kærir sig um. Höfundarréttur hlýtur að vera eins konar samningur milli notenda hugverka og framleiðenda þeirra. Ýmsar aðgerðir aðila og stjórnvalda geta að sjálfsögðu haft áhrif á þróunina. Einnig tæknin sem notuð er og löggjöf í hverju landi.

Mér leiðast þessir árans mannkynsfrelsarar. Það verður varla þverfótað fyrir þeim. Allir keppast við að bjarga sem flestum börnum í Kína eða einhverju þess háttar og það má varla hafa skoðun á nokkru nema fá sér um leið áskrift að uppáhaldsbílæti mannkynsfrelsararns.

Hentugt farartæki í snjó.

Athugasemdir

[DoctorE 11.1.2012 kl. 13:18]

Þú færð Cosmic Calendar í verðlaun
http://www.youtube.com/watch?v=qZYQtWnHqN8

[Ellismellur 11.1.2012 kl. 13:24]

Er þessi mynd nokkuð tekin á Kaldárbökkum?

[Sæmundur Bjarnason, 11.1.2012 kl. 13:26]

Takk DoctorE.

Ég er bara svo paranoid og innbilskur að ég er alltaf hálfhræddur, þegar ég er sendur í youtube-langlokur, um að ég verði rukkaður eftirá um eitthvað af internet-providernum mínum fyrir erlent niðurhal. Sorry.

[Sæmundur Bjarnason, 11.1.2012 kl. 13:44]

Ellismellur, það gæti vel verið. Faxaborg á Hvítárbökkum kæmi líka til greina held ég. Kannski er nafnið vitlaust en ég man eftir að hafa komið á hestamannamót við Hvítárbrú.

[Ólafur Sveinsson 11.1.2012 kl. 15:11]

Menn geta bæði riðið hrat og riðið hart.

[DoctorE 11.1.2012 kl. 15:17]

Hva, þetta er nú ekkert svakalega stórt videó....

Að auki getur verið erfitt fyrir fólk að átta sig á hvað er erlent niðurhal og hvað ekki... td geta .is síður hæglega verið í kína eða hvar sem er...

Ertu með slappan ISP.. sem rukkar og rukkar og rukkar... þrátt fyrir kostaboð og svona :)

[Sæmundur Bjarnason, 11.1.2012 kl. 15:22]

Nei, DoctorE. En það er anakronismi að vera að borga sérstaklega fyrir erlent niðurhal.

Ólafur, ég þekki vel muninn á því að ríða hratt og ríða hart. Það síðarnefnda er að ég held viðurkennt málfar.

[DoctorE 11.1.2012 kl. 16:06]

Það kemur að því að þetta verði "ókeypis"; Netið er svotil ókeypis fyrir mig.. miðað við í byrjun, þegar ég hringdi inn og var með 100 þúsund kr símareikning.. mjög oft :)

[Sæmundur Bjarnason, 11.1.2012 kl. 18:56]

Já, það er satt. Símakostnaður hefur stórlækkað frá því sem áður var. En mikill vill meira.

[DoctorE 12.1.2012 kl. 10:16]

Meira og meira, ég er með 100mb tengingu heima hjá mér :)