1530 - Skák og fjárhættuspil

Gamla myndin.
Reykjavík.

Landsfundur Sjálfstæðisflokksins um aðra helgi gæti orðið spennandi. Hætt er samt við að fáir hafi áhuga á öðru en formannskjörinu. Mér finnst Hanna Birna sigurstranglegri þar þó talandinn í henni minni mig alltaf á vélbyssu. Sagt er að DOddsson styðji Bjarna Benediktsson og ég veit ekki hvort það er styrkur. Kannski endurspeglar sá stuðningur eitthvað afstöðuna til ESB. Gæti trúað að stuðningsmönnum Hönnu Birnu finnist nauðsynlegt fyrir flokkinn að sætta sjónarmiðin í því máli. Svo er hún ný en Bjarni óttalegur vindhani og brennimerktur Hruninu að auki. Hún er að vísu reynslulaus en það þarf ekki endilega að vera veikleiki.

Stjórnmálin eru skemmtileg. Einkum þegar um er að ræða baráttu um formennsku í fjórflokknum. Vandræðagangurinn sem varð í sjálfstæðisflokknum þegar leitað var að „stól fyrir Steina“ um árið gæti sem best endurtekið sig. Þó er svo margt breytt núna að hugsanlegt er að svo verði ekki þó Hanna Birna vinni sigur. Ef hún tapar er alls ekki víst að hún sé þar með úr sögunni sem framtíðarleiðtogi.

Rauðhærði unglingurinn úr Grafarvoginum Hjörvar Steinn Grétarsson verður næstum örugglega næsti stórmeistari okkar Íslendinga í skák. Hann náði afar glæsilegum og góðum árangri í Evrópukeppni landsliða í Grikklandi sem nú er að ljúka. Náði tvöföldum stórmeistaraárangri og er líklega kominn með um 2470 stig. Til þess að verða útnefndur stórmeistari þarf hann einn áfanga í viðbót og að rjúfa 2500 stiga múrinn. Verður líklega ekki skotaskuld úr því. Hélt satt að segja að Hjörvar væri ekki orðinn svona gríðarlega sterkur en hef samt lengi vitað að hann væri efnilegasti skákmaður okkar Íslendinga. Sennilega byrja nöfn flestallra okkar bestu skákmanna á H. Hannes, Henrik, Héðinn, Hjörvar og Helgi. Fróðlegt verður að sjá hvernig næsta Ólympíusveit verður skipuð.

Rætt er um að banna fjárhættuspil á netinu. En til að hægt sé að banna slíkt verður að vera til trúverðug aðferð við að framfylgja slíku banni. Spilafíkn er vaxandi vandamál bæði hér á landi og víða annarsstaðar. Ég er alfarið á móti spilafíkn en þykist skilja hana nokkuð vel. Sé núna að kannski er ég svona mikið á móti fésbókinni vegna þess að þar grasserar happdrættis- og auglýsingamennskan í like-formi sem hvergi annarsstaðar.

En hvernig á að framfylgja banni við fjárhættuspili á netinu. Hægt er að fylgjast með netnotkun fólks en slíku held ég að ekki sé hægt að koma á hér á landi frekar en hægt sé að fylgjast með því sem sagt er í síma. Mögulegt er að leyfa greiðslukortafyrirtækjum að banna viðskipti við þau fyrirtæki sem stjórna fjárhættuspili á netinu þar sem það er leyft. En þá er mögulega komið inná pólitískt jarðsprengjusvæði og bann greiðslukortafyrirtækjanna við að miðla greiðslum til WikiLeaks e.t.v. orðið löglegt.

Gamla myndin sem ég birti um daginn og kallaði „Á þjóðhátíð“ vakti svolitla athygli. Þetta var þann 10. nóvember s.l. Hún vakti líka athygli þegar Bjarni sonur minn birti hana á fésbókarsíðu sinni 17. júní s.l. eins og sjá má á þeim sagnfræðilegu úrklippum sem  hér birtast:

Girnileg reyniber.

Athugasemdir

[Ólafur Sveinsson 12.11.2011 kl. 23:04]

Bjarni óttalegur vindhani og brennimerktur Hruninu að auki. Ég vona að hann verði valinn.

[Ólafur Sveinsson 13.11.2011 kl. 00:12]

Ég þekki gatnamótin.

[Ólafur Sveinsson 13.11.2011 kl. 00:13]

Myndirnar vekja ekki athygli, nema seim til þekkja.

[Ólafur Sveinsson 13.11.2011 kl. 00:23]

Það er þetta sem ég kalla að misnota Sæmund.  Ég sjálfur.

[Sæmundur Bjarnason, 13.11.2011 kl. 09:50]

Takk samt, Ólafur. Fjórar athugasemdir vekja meiri athygli en ein!! Já, mér finnst Bjarni vindhani sem breytir um skoðun eftir því sem vindurinn blæs. Kannski Hann Birna sé það líka. E.t.v. vona ég líka að hann vinni, því þá eru kannski meiri líkur á að flokkurinn klofni. Ef myndirnar eru úr Reykjavík hljóta margir að þekkja til. Gatnamótin eru sennilega Miklabraut og Háaleitisbraut.

[Emil Hannes Valgeirsson, 13.11.2011 kl. 11:05]

Ég var dálítið lengi að átta mig á þessari mynd þó ég sé alinn upp í Háaleitishverfinu. Þetta eru vissulega gatnamót Háaleitisbrautar og Miklubrautar en myndin er hinsvegar spegluð. Hún ætti að vera tekin frá Fellsmúlablokk og blokkirnar á myndinni tilheyra Hvassaleiti. Myndin er sennilega eldri en svo að hægri umferðin gangi upp.

[Sæmundur Bjarnason, 13.11.2011 kl. 12:15]

Eflaust alveg rétt hjá þér, Emil Hannes. Man núna að það voru heilmiklar spekúlasjónir á fésbók þegar Bjarni birti þessa mynd þar. Niðurstaðan var einmitt sú held ég að myndin hlyti að vera spegluð. Það gæti einmitt passað að myndin væri tekin úr blokkinni á mótum Fellsmúla og Háaleitisbrautar, sem var alveg ný þá minnir mig. Kannski er þetta ágætis felumynd!! og hugsanlega best að seifa hana og snúa við í þartilgerðu forriti til að átta sig á henni.

[Valgarð 13.11.2011 kl. 20:42]

Flottur dúfnakofi þarna á myndinni sýnist mér . Annars er frekar lélegir frambjóðendur í sjálfstæðisflokknum að mínu mati og þingmannahópurinn einsleitur . Flokkurinn gerði vel með því að laga stefnuskrá sína og endurnýja bæði þingmenn og forystu sína .