1525 - Lífið er leiðinlegt

Gamla myndin.
Beðið eftir strætó.

Í grunninn er lífið leiðinlegt. Við ráðum alltof litlu sjálf. Gerum fátt ótilneydd. Nennum nánast ekkert að gera upp á eigin spýtur. Höfum framselt vald okkar til alltof margra og ólíkra stofnana. Stofnanirnar eru of margar hér á Íslandi miðað við okkur vesalings Frónbúana. Með öðrum orðum sagt, við erum of fá. En gengur þeim sem fleiri eru eitthvað betur? Ekki er það að sjá. Hvernig stendur á því? Hafa stofnanirnar vaxið þeim yfir höfuð? Verða þær ekki sífellt valdameiri og óviðráðanlegri. Verða þær því sterkari sem fleiri standa að þeim? Er kerfið og kerfin að ríða okkur á slig? Ég verða að segja það. Ég hef áhyggjur af þessu.

Allskyns kerfi, fjármálakerfi, bankakerfi og allavega önnur kerfi hrifsa af okkur völdin og við bregðumst ekki við. Það er ekki viðunandi að andlitslaus óskapnaður ráði öllu. Tökum kerfin og flengjum þau hvert með öðru. Látum dómsmálakerfið með sinn Ögmund og þann sérstaka ráðast á fjármálakerfið með kjafti og klóm. Þeir gera þá minni skaða á meðan. Látum Geirjón sjálfan og lögguna gera útaf við bankaræksnin. Þá getum við tekið í græna fingur bændanna og Tryggva Þórs og komið okkur vel við þann græna og lífræna sem allt vill gleypa.

Nú, er það ekki þetta sem við stefnum að? Það verður að halda lífi og fjöri í fjórflokknum. Annars fer allt í hund og kött. Engir aðrir kunna eins vel að múta og þeir. Með öðrum orðum sjá þeir um að láta spillinguna hafa sinn gang. Við getum alls ekki án hennar verið. Já, ég er að tala um spillinguna. Við erum orðin svo vön henni og samdauna að við sjáum hana ekki. Frændi hans Jóns með þorskhausana vill fá eitthvað að gera. Er ekki sjálfsagt að hann stjórni slorinu? Mér finnst það.

Maðkafluga að hvíla sig.

Athugasemdir

[Aðalsteinn Agnarsson, 8.11.2011 kl. 00:35]

Allir vilja éta kökuna, en enginn vill baka, þetta eru

afleiðingar menntastefnu okkar.

[Sæmundur Bjarnason, 8.11.2011 kl. 08:51]

Já, þú meinar eins og í "Litlu gulu hænunni." Eru menn samt ekki að reyna að kasta þeirri hugsun á bak við sig?

[Vilhjálmur Örn Vilhjálmsson, 8.11.2011 kl. 11:14]

Var maðkaflugan líka að bíða eftir strætó? Í Vesturbænum?

[Sæmundur Bjarnason, 8.11.2011 kl. 15:55]

Sko. Strætóstoppið er sennilega á Lynghaganum. Sú mynd er líklega tekin 1967 eða svo. Maðkaflugan var um daginn í Kópavoginum. Hvort hún hefur einhverntíma beðið eftir strætó veit ég bara ekki.  

[Jóhannes F Skaftason 8.11.2011 kl. 19:34]

Sko Sæmund. Bara kominn í pödduljósmyndunina líka!

[Sæmundur Bjarnason, 8.11.2011 kl. 22:57]

Já, og þessi var auðveld. Minnir að gler hafi verið á milli mín og flugunnar. Annars er þetta ekki fyrsta pöddumyndin sem ég tek. Einkennilegt samt með maðkaflugur, ekki þótti manni þær neitt ógeð í gamla daga og eru jafnvel ekki enn. En kakkalakkar,... ég fæ alveg í herðarnar. Er þar að auki skíthræddur við geitunga. Pöddufræði er merkileg.