1418 - Páll Baldvin kærður?

Gamla myndin.
Þetta sýnist mér vera minnisvarðinn um Stephan G.

Fjölmiðlar hafa mikið yndi af alls konar könnunum og rannsóknum. Sumt er þar ákaflega óvísindalegt og oft hlægilegt mjög. T.d. man ég eftir að í frétt um nýlega rannsókn sem ég af einhverjum ástæðum las, aldrei slíku vant, kom fram að konur tali 28% meira en karlar. Þetta finnst mér mjög trúlegt. Þær hljóta þá að koma frá sér a.m.k. 28% meiri speki en aðrir.

Heldur virðist vera að hitna í kolunum varðandi Sögu Akraness. Sagt er að bæjarstjórinn á Akranesi ætli fyrir hönd Gunnlaugs Haraldssonar, höfundar verksins, að kæra ritdóm Páls Baldvins Baldvinssonar í Fréttatímanum um síðustu helgi. Ég hef bloggað um þetta mál nokkrum sinnum og ætla ekki að endurtaka það, sem ég hef áður sagt. Ég fylgdist vel með skrifum Hörpu Hreinsdóttur um bókina á sínum tíma, fékk lánað eintak af öðru bindinu hér á bókasafninu og er af ýmsum ástæðum e.t.v. vilhallur í þessu máli. Oft hafa menn verið ósáttir við bókadóma en ekki man ég eftir kærumálum út af slíku. Páll er vissulega orðhákur hinn mesti, en ég á ekki von á að hann verði í neinum vandræðum með að verja sig í þessu máli.

Í Skessuhorni á vefnum er eftirfarandi klausa höfð eftir bæjarstjóranum á Akranesi:

„Í þessum skrifum Páls er nefnilega ekki snefill af fræðimennsku en hellingur af fúlmennsku og dágóður slatti af lítilmennsku líka. Mér sýnist Páll af einhverjum óskýrðum ástæðum hafa ákveðið að éta gagnrýnislaust upp þruglið sem bloggari einn hér í kaupstaðnum hefur staðið fyrir linnulítið undanfarnar vikur. Þetta er því alls ekki ritdómur heldur skítkast sem lýsir mjög litlum metnaði en allt of mikilli sjálfsánægju og mjög miklum hroka, yfirlæti og lítilsvirðingu og ekki aðeins gagnvart höfundi sögunnar, ritnefnd og útgefanda, heldur gagnvart öllum Akurnesingum,“

Þetta finnst mér vera ærumeiðingar sem Harpa Hreinsdóttir á greinilega að taka til sín. Ég get ekki séð að þessu máli sé lokið.

Grunar samt fastlega að Páll hafi lesið umfjöllun Hörpu Hreinsdóttur um verkið og hyggist styðjast við margt af því sem hún hefur kannað vandlega. Hversvegna er ekki Harpa kærð? Bæjarstjórnin virðist hafa gert ráð fyrir að geta hundsað blogg, en ekki prentað mál. Er greinilega haldin sömu fordómum gagnvart bloggi og margir aðrir.

Dómstólar landsins (og dómarar þar með) eru greinilega líka fordómafullir mjög. Halda greinilega að allt hljóti að vera í lagi ef lagatæknin og útúrsnúningarnir eru það. Dæma t.d. Erlu Hlynsdóttur hiklaust í sekt þó hún hafi einungis sem blaðamaður haft orðrétt eftir öðrum. Til hvers eru ritstjórar eiginlega og hvers eiga prentuð blöð að gjalda þegar allt virðist vera leyfilegt ef um rafræna dreifingu er að ræða? Þetta eru greinilega fordómar hinir verstu þó hægt sé líklega að vefja um þá lagarökum.

Héðan koma víst ORA-baunirnar.

 

Athugasemdir

[Hrafn Arnarson 15.7.2011 kl. 07:31]

Viðbrögð bæjarstjórans voru fyrirsjáanleg en um leið sérstakleg heimskuleg. Að núvirði hefur bæjarfélafið eytt 122 milljónum í verið. það er stór biti og erfitt að kyngja þegar það kemur í ljós að verkið sem þeir fengu stenst ekki kröfur. Nú er reynt að snúa vörn í sókn. Óvenju vönduð umfjöllun Hörpu hreinsdóttur er kölluð þrugl. Ekki er þetta fræðileg umræða um sagnfræðirit. Páli er hótað málssókn. Ef til hennar kemur mun koma í ljós að bak við stór orð Páls leynist rétt lýsing á verkinu. Bæjarstjórinn reynir fyrir sér í lýðskrumi. Ritdómur Páls er móðgun við Akurnesinga alla sem einn!!! Það er fjarri lagi. Ritdómur Páls er áfellisdómur yfir höfundi, ritnefnd og bæjarstjórn.

[Sæmundur Bjarnason, 15.7.2011 kl. 09:52]

Kæran er ekki enn komin fram, svo ég viti. Kannski hættir bæjarstjórnin við hana. Eins og dómskerfið er má jafnvel búast við að Páll verði sakfelldur fyrir eitthvað. Ritdómur hans var harkalegur en þöggunartilraunir bæjarstjórnar munu ekki takast. Stórtap verður á verkinu og áhrif þessa máls á næstu bæjarstjórnarkosningar er ekki hægt að sjá fyrir.

[Sigurður Þór Guðjónsson, 15.7.2011 kl. 12:41]

Ég held Sæmundur að hér sé ekki beint um að ræða fordóma gegn bloggi og viriðingu fyrir prentuðu máli heldur annars konar og eiginlega enn verri fordóma. Páll Baldvin er nú einu sinni opinber bókagagnrýnandi og mjög þekktur gagnrýnandi, ekki síst vegna Kiljunnar. Hann er því eins konar ''númer'' í bransanum og menn eins og bæjarsstjórinn eru veikir fyrir slíku. Þeir sjá fyrst og fremst formið, stöðu þess er setur hlutina fram, en meta ekki sjálfstætt innihald hugsunarinnar. Harpa er hins vegar ekki þekkt sem bókagagnrýnandi og miklu minna þekkt almennt en Páll Baldvin. Síðast en ekki síst hefur hún ekki farið í felur með geðræn veikindi sín. Af öllum þessum ástæðum strika þessir kallar bara yfir skrif manneskju eins og Hörpu og tala um þau af ótrúlega hrokafullri lítilsvirðingu þó þau séu vel rökstudd og mun betur en skrif Páls Baldvins. Talandi um þrugl er leitun af jafn vúlgar og meira vanstilltara þrugli en lesa má í þessum orðum bæjarstjórans sem þú tilgreinir.

[Sæmundur Bjarnason, 15.7.2011 kl. 13:51]

Já, Sigurður sennilega er þetta alveg rétt hjá þér. Mér hættir til að álíta alla fordóma svipaða. Reiði bæjarstjórans stafar e.t.v. mest af því að hann óttast að fleiri taki marka á Páli en Hörpu. Seinna atriðið sem ég minnist á og fjallar um DV er samt greinilega vegna þess að dómarar vilja láta gömul lög gilda þó þar sé gerður greinarmunur á prentuði máli og öðru. Semsagt lagatækni umfram sanngirni.

[Harpa Hreinsdottir 15.7.2011 kl. 15:01]

Eg hef skrifad Arna Mula bref og farid fram a ad hann dragi ummaeli sin um mig til baka og bidji mig afsokunar i naesta Skessuhorni. Fylgi thessu mali betur eftir thegar eg kem heim. Og eg fretti ad Pall Baldvin hefdi komist ad thessari nidurstodu ohad minu bloggi og er thvi vaentanlega med onnur atridi i huga, sem eg er ekkert viss um ad Arni Muli verdi gladur yfir ad komi fram. Eg thekki Pal Baldvin ekki neitt.

[Sæmundur Bjarnason, 15.7.2011 kl. 16:23]

Já, ég held að bæjarstjórinn sé alls ekki búinn að bíta úr nálinni með þetta mál. Ég mun halda áfram að fylgjast með því.

[Ólafur Sveinsson 15.7.2011 kl. 17:32]

"Mér hættir einnig til að álíta ALLA fordóma svipaða"