1400 - Já, ég er í vandræðum með fyrirsögnina

Gamla myndin.
Þessi mynd er frá Bifröst. Þessir tveir, þeir Jón Illugason og Guðvarður Kjartansson eru úr skólahljómsveitinni.

Á Stokkseyri í gær (þriðjudag) var helst að sjá að eitthvað sérstakt stæði til. Veit þó ekki hvað, en danski fáninn og sá grænleski blöktu þar í góða veðrinu. Þetta leiddi mig til samanburðar á menningu okkar Íslendinga annarsvegar og Grænlendinga hinsvegar.

Segja má að okkur Íslendingum hafi tekist það sem Grænlendingum hefur ekki tekist að öllu leyti. Það er að byggja upp nútímaþjóðfélag að vestrænum hætti. En er það nútímasamfélag sem okkur hefur tekist að byggja upp eftirsóknarvert?

Já, mér finnst svo vera að flestu leyti. Einkum hvað snertir heilbrigði, menntun og lífskjör öll. Við Íslendingar viljum einnig gjarnan líta á okkur sem fyrirmyndir á sem flestum sviðum, en erum það því miður ekki. Þær tölur sem við hömpum mest og sýna eiga yfirburði okkar yfir aðra, eru næstum alltaf handvaldar af okkur sjálfum.

Um þetta langar mig ekki að deila og set því sem flesta fyrirvara um þessa skoðun. Hún hefur t.d. ekkert með ESB eða mögulega inngöngu okkar þangað að gera. Heldur ekki um stöðu okkar í hernaðabandalögum og almennar stjórnmálaskoðanir. Hún er bara þarna og getur ekki annað.

Var að enda við að lesa síðustu bloggfærslu Hörpu Hreinsdóttur (sjá link hér til vinstri) um Sögu Akraness og verð að viðurkenna að ég er impóneraður og bíð eftir yfirlitsfærslu hennar um þetta mál. Bókina sjálfa (eða einstök bindi hennar) kaupi ég hinsvegar áreiðanlega ekki, en rekist ég á hana á bókasafninu mun ég íhuga að taka hana að láni ef ég treysti mér til að bera hana.

Að Harpa skuli hafa lagt allt það á sig, varðandi þetta mál, sem hún hefur augljóslega gert, er til fyrirmyndar. Áhrif alls þessa á næstu bæjarstjórnarkosningar á Akranesi hljóta að verða einhver. Hvet alla til að fylgjast með þessu máli.

Svei mér ef ég er ekki kominn á topp 50 vinsældalista Moggabloggsins til að vera. (Eins og sagt er). Nú er ég nývaknaður og strax eru komnir yfir 50 lesendur á mína síðu. Auðvitað ber þetta líka vott um þverrandi vinsældir Moggabloggsins, en samt..... Jú, auðvitað fylgist ég með svonalöguðu. Kann þó ekki (eða nenni ekki) að athuga hvaðan allir þessir lesendur koma. Svona er þetta bara.

Svartagallsrausið er útum allt. Það má varla opna fyrir útvarp til að hlusta á fréttir eða neitt. Neikvæðnin er alla að drepa. Ef ekki er um þindarlaust músíkpopp og blaður um það að ræða þá á maður helst von á fréttum af atvinnulausum aumingjum eða fyrirtækjum á hausnum. Er ekkert annað að frétta? Ef maður vill hlusta á erlendar fréttir er ástandið lítið skárra. Gjaldþrot Grikkja eða loftárásir á Líbýu. Þetta er a.m.k. ekkert fyrir þunglyndissjúklinga.

Þegar hægri sinnuð ríkisstjórn hrærir vinstri hugmyndum saman við frjálshyggjuna, eins og hér gerðist og ef til vill hefur gerst í Grikklandi líka (og jafnvel á Írlandi), verður útkoman banvænn kokkteill. Okkur tókst með harðfylgi að forðast þjóðargjaldþrot og kannski tekst Grikkjum það líka. Staða þjóðanna er þó alls ekki sambærileg og hagfræðingar munu á næstunni reyna að útskýra þetta allt.

Mér er þó efst í huga að hagfræðin er ekki nein nákvæm vísindagrein heldur snýst alltof oft um vafasamar eftiráskýringar.

Les oft fréttaskýringarnar í bloggi Jónasar Kristjánssonar fyrrum ritstjóra. Margt er skynsamlegt þar en honum hættir til að flýta sér um of. Þessvegna verða fréttaskýringar hans oft hvatvísinni að bráð og minna að marka þær en æskilegt væri. Líka er auðvitað slæmt að bíða of lengi. Þeir sem fréttir lesa og fréttaskýringar eru óþolinmóðir. Meðalhófið er vandratað þarna sem annarsstaðar.

Einhver hefur platað Pál Magnússon illilega. Nema hann hafi trúað því sjálfur að Íslendingar mundu sigra á EM < 21. Að henda út fréttum til þess að koma þýðingarlausum knattspyrnuleikjum að í beinni útsendingu eru afglöp sem sannarlega mundu réttlæta brottvikningu.

Veggmyndir á skóla.

Athugasemdir

[Hörður B Hjartarson, 23.6.2011 kl. 00:34]

    Sæmundur ! Hvaða ár/vetur varst þú á Bifröst ?

[Hörður B Hjartarson, 23.6.2011 kl. 00:39]

  ´59-´61  , varst þú þá ekki með Palla - Páli Pálssyni , hann var ´43 módelið , ég myndi halda að hann hafi verið ´60-´62?

[Sæmundur Bjarnason, 23.6.2011 kl. 06:02]

Þú svarar þér sjálfur. Já, ég var einmitt 1959 til 1961. Kannast auðvitað best við mín bekkjarsystkini. Þar á eftir við þau sem voru í bekknum á undan. Af einhverjum ástæðum minna við þau sem voru árið eftir. Páll Pálsson kann vel að hafa verið í bekknum á eftir mínum en ég man þá eflaust betur eftir honum undir öðru nafni. Rámar þó í nafnið. Prófaðu fésbókina. Minnir að Guðbrandur Þorkell Guðbrandsson hafi verið í þessum bekk og hann er örugglega þar.

[Hörður B Hjartarson, 23.6.2011 kl. 20:10]

Hann var með Óla Herði Þórðarsyni og formanni lýfeyrissjóðanna þ.e. sukksjóðanna , man ekki í svipinn hvað hann heitir , en Magnússon held ég hann sé .

[Sæmundur Bjarnason, 23.6.2011 kl. 20:49]

Bæði Óli Hörður Þórðarson og Hrafn Magnússon útskrifuðust frá Bifröst 1964 og Páll Pálsson líka að ég held. Guðbrandur sem ég minntist á fyrr útskrifaðist árið 1962. Árbækur nemendasambandsins sem ég hef verið að glugga í upplýsa þetta.