1399 - Runólfur Ólafsson (ekki minnst á hann hér)

Gamla myndin.
Þetta er Hörður Haraldsson sem kenndi okkur þýsku og hagfræði á Bifröst. Þar að auki var hann landsfrægur spretthlaupari. Myndin er líklega tekin í gönguferð á Baulu.

Sko, það er fremur auðvelt að næla sér í fáein komment. Ekki þurfti annað en að skíra færsluna í gær dálítið kryptísku nafni. Auðvitað hefði ég getað sett það í færsluna sjálfa að það væri mynd af Jóni Sigurðssyni sem væri á fimmhundruðkallinum. Hitt er svo enn kryptískara með bílinn í lok færslunnar og litinn á honum. Hann lenti samt þarna fyrir eintóma tilviljun. Væri ég nægilega hjátrúarfullur héldi ég auðvitað að Jón Sigurðsson hefði sjálfur staðið fyrir þeirri tilviljun.

Því er stundum haldið fram að Ísland sé á mörkum hins byggilega heims. Þetta er alveg rétt og sjaldan sér maður það betur en þegar sólin er álíka hátt á lofti þegar maður vaknar eins og þegar maður fer að sofa. Skín bara úr svolítið annarri átt. Líka má auðvitað sjá þetta í svartasta skammdeginu þegar varla birtir um hádaginn. Annars er mér sléttsama um allt sólskin, eða það finnst mér. Mætti samt að skaðlausu vera svolítið hlýrra. Finn það vel þegar ég fer illa klæddur út að ganga á morgnana hvað það væri miklu betra. Annars er aðalmunurinn á göngustígunum hér og á Tenerife að þar eru allskonar aumingjar en hér aðallega hundaviðrunarfólk og skokkarar.

Að mörgu leyti er stjórnlagaráðið að taka hér völdin. Vinsældir þess aukast stöðugt. Ríkisstjórnin er trausti rúin. Varla að stjórnarandstaðan þori að anda á stjórnlagaráðið. Takist þeim að koma saman einhverju boðlegu eru mestar líkur á að það verði samþykkt. Hvort það breytir svo einhverju varðandi pólitíkina á eftir að koma í ljós. Pólitíkusarnir einbeita sér þessa dagana að kvótanum og í gegnum SA og ASÍ telur stjórnarandstaðan sig hafa náð einhverju taki á ríkisstjórninni útaf vegamálum. Svo er þó ekki. Ömmi og félagar eru afsleppari en svo.

Sagt er að dragi úr bensínsölu. Þessu get ég vel trúað. Sjálfur er ég farinn að keyra minna en ég gerði. Auðveldasti sparnaður í heimi er að minnka svolítið óþarfa akstur og keyra ögn sparlegar en áður. Þ.e. gefa heldur minna inn þegar farið er af stað eða hraðinn aukinn. Horfa jafnvel meira á snúningshraðamælinn en hraðamælinn sjálfan. Ef bensínverðið er nógu hátt verður sparnaðurinn þeim mun meiri. O.K., ég veit að þetta síðasta er vafasöm hagfræði en gat bara ekki stillt mig.

Mesta spennan þessa dagana er um það hvenær næsta þjóðaratkvæðagreiðsla eða almennu kosningar verða. Samkvæmt Guðs og manna lögum (eða réttara sagt gömlu stjórnarskránni) ættu næstu alþingiskosningar að verða árið 2013. Ætli það verði samt ekki næsta spenna í þessu sambandi að vita hvort Ólafur ætli að bjóða sig fram einu sinni enn til forseta eða ekki og hvort einhver þorir á móti honum ef hann býður sig fram. Svo má auðvitað búast við þjóðaratkvæðagreiðslu um tillögur stjórnlagaráðs og ESB er einhvers staðar út við sjóndeildarhringinn. Semsagt nóg að gera á næstunni en þó verður eitthvert hlé í sumar. Best að njóta þess og vera ekki að þessu eilífa sífri sem einkennir stjórnmálaumræðuna í dag.

Nú, mega þá ekki einu sinni fatlaðir leggja hér?

Athugasemdir

[Ólafur Sveinsson 22.6.2011 kl. 00:29]

Man vel eftir þeim Herði og Clausens bræðrum. Frábærir. Byrjaði að stunda Melavöllinn 1950. Oft ferlega skemmtilegt.

[Ellismellur 22.6.2011 kl. 05:18]

Gaman að sjá þessa mynd af lærimeistara okkkar, Herði H. Blessuð sé minning hans. Sammála þér með stjórnlagaráðið, Þorvaldur Gylfason mun setja samfélaginu umferðarreglur til næstu áratuga. Ekki viss um að það sé slæmt per se, hinsvegar sýnist manni að nýja stjórnarskráin markist um of af stjórnlyndi, þ.e. hún verði alltof ítarleg og miðuð við þau vandamál, sem þjóðin hefur lent í upp á síðkastið. Annars verður náttúrulega að miða hana við heildarreglur Evrópusambandsins.

[Sæmundur Bjarnason, 22.6.2011 kl. 08:38]

Takk, Ellismellur og Ólafur. Hef ekki miklar áhyggjur af að nýja stjórnarskráin verði of ítarleg, en meiri af því að áhrif hennar verði ekki eins mikil og margir virðast álíta. Held ekki að hún leysi nein sérstök og sértæk vandamál.

Já, Melavöllurinn var merkilegt fyrirbrigði. Ég kynntist honum þó ekki mikið. 

[Ólafur Sveinsson 22.6.2011 kl. 12:56]

Þetta með stjórnarskránna. Ég er hræddur um að í henni mun lítið standa um gegnumsæi bankakerfisins, í framtíðinni. Virðist lítið rætt á þinginu. Hvort að menn vilji eða geti ekki tekið á þessu bráðnauðsynlega máli. Það brennur á okkur öllum að tekið verði á þessu.

[Sæmundur Bjarnason, 22.6.2011 kl. 15:27]

Ólafur, það er þetta með bankaleyndina og tjáningarfrelsið. Ég er hræddur um ráðinu finnist erfitt að taka á þessu í stjórnarskránni. Þessi mál kunna vel að hafa fleiri hliðar en sjást í fljótu bragði.