1340 - Stjórnlagaráð

Gamla myndin
er af Bjarna Harðarsyni þegar hann var uppá sitt besta. Nei, hann var ekki orðinn alþingismaður þá.

Hægt gengur vorinu að komast að. Ég er óhressastur með þessar sífelldu rigningar. Það mætti alveg fara að þorna eitthvað um.

Mér finnst fésbókin frek. Tekur myndir og birtir þær hist og her. Skil ekki almennilega hvernig þetta ofurforrit virkar. Færi miklu sjaldnar á fésbókina ef ekki vildi svo til að þar er ég að tefla helling af bréfskákum. Hún er góð í því. Er aðeins að prófa að tefla Chess960.

Svo er Gúgli frændi líka afskiptasamur í meira lagi. Þefar uppi hvað sem er. Birtir líka myndir af öllu sem beðið er um. Er samt sem betur fer oft svolítið ruglaður en afar fljótur að finna hlutina. Miklu máli skiptir hvernig hann er spurður. Sumir eru flinkir í að tala við hann. Svo leikur hann stórt hlutverk í spurningaþáttum sjónvarpsins. Varið ykkur. Tölvurnar eru að taka yfir.

Mjög er í tísku að kenna núverandi ríkisstjórn um allt sem aflaga fer. Bloggarar eru slæmir með þetta og blaða- og fréttamenn einnig. Mér finnst ég ekki gera mikið af því. Er kannski þess vegna af mörgum álitinn stuðningsmaður ríkisstjórnarinnar og kannski er ég það. Eitt er það sem mér finnst núverandi ríkisstjórn gera betur en flestar þeirra fyrrverandi. Hún tekur mark á forsetanum.

Mér finnst umgjörðin um þjóðaratkvæðagreiðslur, hlutverk forsetans og þess háttar samt of óskýr. Mikilvægasta hlutverk núverandi stjórnlagaráðs er að mínu viti að ráða bót á því. Vona að tillögur þar að lútandi komi fram sem fyrst.

Þeir sem hamra sífellt á því að þeir vilji nú endilega þjóðaratkvæðagreiðslur en bara ekki að þetta stjórnlagaráð geri nokkurn skapaðan hlut heldur verði kosið til þess einhverntíma seinna, á annan hátt o.s.frv. eru bara einfaldlega á móti því að breyta nokkru í stjórnarskránni. Það er alveg sjónarmið út af fyrir sig. Finnst að menn ættu að viðurkenna það.

Ef stjórnlagaráðið kemur sér saman um einhverja tillögu að stjórnarskrá, ef til vill með nokkrum mismunandi möguleikum um sumt, á ég alveg von á að það verði samþykkt.

Við þetta er engu að bæta.

Athugasemdir

[Jóhannes Laxdal Baldvinsson, 24.4.2011 kl. 05:52]

Sæll Sæmundur.  Það er þetta með beina lýðræðið sem pólitíkusar munu ekki koma sér saman um. Við sáum viðbrögðin við ákvörðunum forsetans í sambandi við 2 síðustu þjóðaratkvæðagreiðslur og umræðu allra þingmanna, líka úr hreyfingunni að endurskoða beri og helst afnema 26. grein stjórnarskrárinnar. Spuninn kemur svo líka úr ólíklegustu áttum eins og bloggfærsla Egils Helgasonar um ríkisfjármál Kaliforníu. Allt er þetta liður í að grafa undan þessu ákvæði í núverandi stjórnarskrá og koma í veg fyrir þennan sjálfsagða rétt í þeirri endurskoðun sem nú fer fram. Þessar tillögur ráðsins um 15% lágmark gerir erfitt fyrir að safna nægum undirskriftum.  Okkar stjórnarfar er smám saman að færast nær fasisma þar sem "ríkið" á að ráða öllu. Þetta gerist þegar svonefndir vinstri flokkar glata tilverugrundvelli sínum sem byggði á stéttabaráttu og alræði öreiganna. Núna eru "öreigarnir" ríkisstarfsmenn og stéttabaráttan snýst um að efla millistéttina. Afleiðingin er yfirtaka vinstri elítunnar á vinstri væng stjórnmálanna sem setur ríkiskapitalisma aftur í öndvegi sem svar við hruni frjálshyggjunnar. Það ásamt aukinni forræðishyggju og kvenhyggju birtist okkur svo í þeim fasísku stjórnarháttum sem einkenna núverandi stjórnarfar...Ef við fáum ekki fljótlega að kjósa okkur nýtt Alþing þá munu þessir fasistar efla völd sín enn frekar í flokkunum og kæfa allar frekari lýðræðisumbætur.

[Sæmundur Bjarnason, 24.4.2011 kl. 08:11]

Þú segir í upphafi að póitíkusar muni ekki koma sér saman um beina lýðræðið. Það er bara eitt af því sem þeir fá ekki að ráða. Þeir þurfa ekkert að ráða öllu. Svo segirðu í lokin:

Það ásamt aukinni forræðishyggju og kvenhyggju birtist okkur svo í þeim fasísku stjórnarháttum sem einkenna núverandi stjórnarfar...Ef við fáum ekki fljótlega að kjósa okkur nýtt Alþing þá munu þessir fasistar efla völd sín enn frekar í flokkunum og kæfa allar frekari lýðræðisumbætur.

Þetta er einfaldlega ekki rétt hjá þér. Ef núverandi stjórnarhættir eru fasistiskir (tapa hvað eftir annað í þjóðaratkvæðagreiðslu!!) eru þeir stjórnarhættir einfaldlega mun betri en þeir afskiptalitlu og spilltu stjórnarhættir frjálshyggjunnar sem réðu hér öllu áratuginn fyrir hrun.

Fyrir mér getum við séð hvert mismunandi stjórnarhættir leiða með því að horfa á Evropu (ESB og norðurlöndin) annars vegar og Bandaríkin hinsvegar.

[Sigurður Hreiðar, 24.4.2011 kl. 14:47]

15% lágmark er amk. helmingi of lágt. Það er svo auðvelt að efna til múgæsingar, jafnvel heiftrækinnar múgæsingar.

Gleðlega hátíð.

[Sæmundur Bjarnason, 24.4.2011 kl. 15:06]

Já það getur verið að 15% sé of lágt en það getur verið að absolut tala skipti miklu máli í þessu líka. Vonum bara að þeir í stjórnmálaráði komist að skynsamlegri niðurstöðu. Svo er kannski spurning hvort hægt er að breyta þessu lágmarki með einföldum hætti. Þjóðaratkvæðagreiðslur geta bæði orðið of margar og of fáar og líklega finnst ekki öllum það sama.