1286 - Kristleifur á Stóra-Kroppi

Í mínum huga er mars, sem nú er nýbyrjaður, vetrarmánuður. Enginn vafi á því. Apríl getur hinsvegar brugðið til beggja átta. Vetrarmánuður eða vormánuður. Duttlungar náttúrunnar. Maí er hinsvegar tvímælalaust vormánuður. Í minningunni eru maíkvöldin sérstök góðveðurskvöld. Þá vorum við í „sto" eða „yfir" kvöld eftir kvöld. Fórum þó stöku sinnum í „kjöt í pottinn". Svo í september var komið haust. Október beggja blands en nóvember vetrarmánuður. Svoleiðis var nú það. Held ég sé að verða veðursjúkur.

Seinnipartinn í dag rigndi hressilega. Hundum og köttum er sagt á enskunni. Úrhellisrigningu kalla ég þetta. Hann hlandrignir segja sumir. Þegar talað er um hlandrigningu dettur mér alltaf í hug vísan góðkunna:

Regnið þungt til foldar fellur
fyrir utan gluggann minn.
Það er eins og milljón mellur
mígi í sama hlandkoppinn.

Svona er nú hugsunarhátturinn. Get samt ekkert að þessu gert.

Óttalega er Icesave-umræðan orðin þreytt eitthvað. Sérfræðingarnir í bankamálum eru líka orðnir afar margir eftir að bloggið kom til sögunnar. Mér finnst annar hver maður skrifa af ofurviti (að eigin áliti) um fjármál og skyld málefni og hafa einnig miklu meira vit á öllu en almennar þingmannsvæflur og ráðherraræflar sem þó reyna að kynna sér málin eins vel og vit þeirra hrekkur til. Ætli endirinn verði ekki sá að allmargir samþykki Icesave-samninginn bara til að losna við umræðuna endalausu.

Bókin sem ég er að lesa um þessar mundir heitir „Úr byggðum Borgarfjarðar" og er eftir Kristleif Þorsteinsson á Stóra-Kroppi. Það er Þórður sonur hans sem annast útgáfuna og bókin er gefin út árið 1944. Stórmerkileg bók og forvitnileg. Bæjarnafnið er skemmtilegt og sérkennilegt og býður heim ómerkilegum bröndurum sem ég ætla að stilla mig um að tilfæra hér dæmi um. Kannski kem ég einhverju að úr bókinni seinna meir en ég er nýbyrjaður á henni núna.

Fjölskylda Hannesar Þórs Helgasonar hefur tjáð sig um dóminn yfir banamanni hans. Þó ég vilji ekki á nokkurn hátt gera lítið úr sorg fjölskyldunnar og vonbrigðum með dóminn finnst mér að brotaþolum í málum sem þessu komi lítið við hvernig þjóðfélagið refsar þeim seku. Auðvitað á þjóðfélgið eftir því sem mögulegt er að tryggja að fólk þurfi ekki að verða fyrir glæpum af þessu tagi. Hvernig það er gert er yfirleitt ekki til bóta að brotaþolar ákveði. Hvað þetta sérstaka mál varðar þá finnst mér afar einkennilegt ef lausn afbrotamanns úr gæsluvist getur farið fram án afskipta dómstóla.

Gott er í góðu veðri mynd að mála.

Athugasemdir

[Harpa Hreinsdóttir 2.3.2011 kl. 08:29]

Þetta er ekki rétt hjá fjölskyldu Hannesar, þ.e. litlar líkur eru á að Gunnari verði sleppt si-sona af Sogni. Sjá http://visir.is/alvarlegt-ad-vera-daemdur-a-sogn/article/2011110309888  Auk þess kemur fram í málsskjölum að Kristinn Tómasson (form. Geðlæknafélagsins og yfirmatsmaður geðheilsu G.) varar sérstaklega við að honum verði sleppt og bendir á að hann sé það leikinn í þykjast frískur að hann gæti jafnvel platað geðlækni. Bæði Kristinn og Tómas Zoega (hinn yfirmatsmaðurinn) hamra á því að G. sé líklega ólæknandi og mjög hættulegur samfélaginu. Og það kemur fram að erfitt sé að geyma hann í fangelsi því strax í hinni stuttu dvöl á Litla-Hrauni var hann farinn að plana að drepa samfanga sinn.

Mér finnst að fjölskylda Hannesar megi vel við una - þetta er miklu skárri niðurstaða en langur fangelsisdómur  þar sem alltaf er séns á að vera sleppt miklu fyrr á skilorði.

[Sæmundur Bjarnason, 2.3.2011 kl. 10:05]

Takk Harpa. Einmitt mín skoðun.

[Sigurður Hreiðar, 2.3.2011 kl. 14:31]

Þú nefnir þarna nokkra gamla leiki sem varla nokkurt barn kann nú til dags. Ég kunni í gamla daga þá tvo sem þú nefnir fyrst, en ekki Kjöt í potti.

Hvernig væri að taka smákafla við og við í bloggi til að lýsa þessum gömlu leikjum? Það væri liður í að forða þeim frá gleymsku.

[Sæmundur Bjarnason, 2.3.2011 kl. 15:12]

Mjög góð ábending, Sigurður. Kjöt í pottinn var mjög þekktur leikur en gekk kannski annars staðar undir öðru nafni. Þeir sem "voru hann" áttu að klukka sem flesta og safna í pott. Aðrir gátu frelsað þau nema þau væru sjálf klukkuð.

[Sigurður Hreiðar, 2.3.2011 kl. 21:59]

Gæti hann hafa heitað „laus og bundinn“ annars staðar?

[Svanur Gísli Þorkelsson, 2.3.2011 kl. 22:13]

Tek undir með Sigurði H. um að þú skrifir eitthvað um þessa leiki.

Ég kannast ekki við "Kjöt í pott" en kemur helst til hugar að þetta sé leikur sem gangi undir öðrum nöfnum eins og t.d. Tröllaleikurinn gerir þar sem fjórir þátttakendur eru tröll. 

Hornin eru hellar tröllanna og hvert tröll á sitt horn. Allir aðrir eru dýr að eigin vali og hlaupa um leiksvæðið. Þegar gefið er merki hlaupa tröllin úr hellum sínum og reyna að veiða dýr og fara með þau í hella sína. Það tröll vinnur sem veiðir flest dýr. Einnig er hægt að leyfa hinum dýrunum að frelsa þau sem búið er að veiða, það gerir þó leikinn flóknari.

[Númi 2.3.2011 kl. 23:20]

Í fyrri hluta pistils þíns nefnir þú leiki Sæmundur,ég vil benda ykkur á að Una Margrét Jónsdóttir þáttastjórnandi hjá RÚV,var að gefa út disk og bók um gamla barnaleiki og þrautir. Það var viðtal við hana í Kiljunni fyrir um cirka hálfum mánuði síðan og undirritaður ætlar að verða sér úti um þessar gersemar,þá fyrir barnabörnin. Góðar stundir.

[Sæmundur Bjarnason, 3.3.2011 kl. 00:20]

Nei, Svanur Gísli ég hugsa að þetta hafi ekki verið Tröllaleikur. En það er góð hugmynd að skrifa eitthvað um leiki og ég mun svo sannarlega íhuga það.

[Sæmundur Bjarnason, 3.3.2011 kl. 00:21]

Númi, takk fyrir upplýsingarnar. Reyni bráðlega að skrifa eitthvað um þetta. Mér kemur á óvart hve fáir kannast við leikinn "kjöt í pottinn".

[Kristján Sigurður Kristjánsson, 3.3.2011 kl. 00:35]

Af einhverjum ástæðum þótti afa mínum (f. 19.7. 1873 á Heggstöðum) bók Kristleifs ekki merkur pappír.

[Sæmundur Bjarnason, 3.3.2011 kl. 10:20]

Kristján, þegar afi þinn las bókina hefur hún kannski ekki verið orðin nógu gömul. Datt þetta bara svona í hug. Get ekki skýrt þetta að öðru leyti.

[Kristján Sigurður Kristjánsson, 3.3.2011 kl. 13:01]

Ekki frá því.