1273 - Hálftími hálfvitanna

Hálftími hálfvitanna. Jónas Kristjánsson hefur kallað upphaf þingfunda þessu nafni og það á vel við. Mér finnst að forseti þingsins ætti að slá þingmennina í hausinn með fundarhamrinum frekar en að dangla bara í bjölluna þegar þeir eru með öllu ómálefnalegir og tala um eitthvað allt annað en þeir þykjast vera að tala um. Einkennilegt að þeir skuli aldrei vitkast.

Landsbyggðarmenn eru ekkert endilega samkvæmari sjálfum sér en þeir sem á höfuðborgarsvæðinu búa. Oft er sagt að það komi fleirum við en Reykvíkingum hvar Reykjavíkurflugvöllur sé og er það orð að sönnu. En kemur íbúum höfuðborgarsvæðisins ekkert við þó Blönduósbúar lengi hringveginn um fjórtán kílómetra að óþörfu?

Að því leyti er verra að ganga um stígana hér í Kópavogi en sunnar á hnettinum að hér er oft mun hálla. Datt um daginn á gangstétt hérna og uppgötvaði nokkru seinna að húslyklarnir og síminn voru ekki lengur í vasa mínum. Sneri við og þá lá þetta allt á gangstéttinni og beið eftir að verða tekið til handargagns. Þegar snjór er yfir öllu er líka stundum fátt um myndefni. Það er samt allt í lagi því ég tók mikið af myndum á Tenerife og mun demba þeim yfir þá sem asnast hingað inn.

Fyrirsögnina má misskilja en ef einhver er hálftíma að lesa bloggið mitt þá er hann ansi stirðlæs. Man eftir að hafa lesið eitthvert blað til enda á lestrarprófi í barnaskóla og þar var umsögnin sú að ég væri að verða læs. Vissi vel að ég var fluglæs og ekki jók þessi augljósa villa álit mitt á lestrar-hraða-prófunum sem þá tíðkuðust.

Þó sífellt sé verið að fullyrða annað þá held ég að hjól atvinnulífsins snúist þessa dagana. Loðnubræðsluhjólin halda a.m.k. áfram að snúast. Finn til með bræðslumannagreyunum sem neyddust til að hætta við verkfallið sitt þó þeir hefður ekkert upp úr því. Næst reyna þeir vonandi að ná betri samstöðu. Held nefnilega að það hafi verið hún sem bilaði. Það er tilgangslaust að fara í verkfall ef ekki gera það allir.

Er sammála Jónasi Kristjánssyni um dóminn yfir níumenningunum. Hann er dálítið úti á túni. Svona mælingar hjá dómstólum til að reyna að friða bæði sækjendur og verjendur eru stundum skelfing asnalegar. Þó ekki séu neinir arfavitlausir útaf þessu eru heldur engir ánægðir.

Santiago del Teide. Þar borðuðum við og heststyttan sú arna var helsta kennileitið.

Athugasemdir

[Axel Þór Kolbeinsson, 17.2.2011 kl. 00:34]

Þú ert greinilega ekki að velta fyrir þér hversu mikill falsari ég er.  Hálftími hálfvitana verður í mínum huga ótengt þinginu eftir daginn í dag.

Annars þakka ég þér fyrir að fá mig til að brosa fyrir svefninn.

[Sæmundur Bjarnason, 17.2.2011 kl. 06:59]

Axel, hvaða hálftíma eða stofnun finnst þér þetta þá tengjast?

[Sigurður Hreiðar, 17.2.2011 kl. 12:47]

Vona að þú hafir sloppið ómeiddur frá byltunni. En hún sannar einu sinni enn hið fornkveðna að best er að kanna bæli sitt þá burt frá því skal hverfa.

Karlinn í matstofunni þarna á Santiago del Teide er hreinast listakokkur. Eða starfsliðið hans. Þrátt fyrir hestinn sem stendur í næsta garði er það ekkert hrossaket sem hann ber á borð.