1270 - Morgunblaðið

Þessa dagana les ég Morgunblaðið talsvert því við fáum það ókeypis. Tveir aðilar skilst mér að hafi látið Herdísi á neðri hæðinni fá gjafaáskrift að blaðinu og hún lætur okkur njóta góðs af því. Eflaust gengur erfiðlega núorðið að selja Morgunblaðið ekki síður en önnur blöð. Líka getur verið að einhverskonar fjölmiðlakönnun sé í gangi. Hvað veit ég? 

Um daginn las ég grein í Morgunblaðinu eftir einhvern gáfumanninn og þar var hann að fjalla um göngustíga og hjólreiðar. Sagði meðal annars að hjólreiðabrautirnar á göngustígunum hér í Fossvogi væru ýmist hægra eða vinstra megin. Ég á erfitt með að þola heimsku af þessu tagi og get helst ekki haldið áfram að lesa þegar ég sé svona lagað. Samkvæmt mínum skilningi hefur hægri og vinstri enga merkingu þegar hægt er að fara í báðar áttir. Kannski hefur þetta samt verið ágætis grein en að taka til orða á þennan hátt finnst mér benda til vanhugsunar og það eyðileggur mikið fyrir mér.

Merkilegt finnst mér að menn skuli enn vera að deila um stjórnlagaþing. Auðvitað er ekkert skrítið að einhverjir skuli vera á móti því að halda slíkt þing. En að hamast við að finna því allt til foráttu núna og skrifa blaðagreinar um alla hugsanlega vankanta þess finnst mér ansi seint í rassinn gripið.

Samþykkt var á alþingi með meirihluta atkvæða að halda stjórnlagaþing. Þó hæstiréttur hafi úrskurðað að ekki hafi verið löglega staðið að kosningu til þess er ekkert sem segir að þingið sjálft sé að engu hafandi. Að sjálfhætt sé við þingið af þessum sökum er fráleitt. Þannig virðast samt sumir hugsa. Alþingi ræður því að öllu leyti hvernig greitt verður úr þessu máli. Allt kemur til greina. Jafnvel að hætta alveg við þingið. Þar með væri alþingi reyndar að segja að fyrri samþykkt þess hafi bara verið plat.

Styttan hjá Garachico. Um hana er löng saga og merkileg.

Athugasemdir

[Jóhannes Laxdal Baldvinsson, 14.2.2011 kl. 01:10]

Sæll Sæmi, þú undrar þig á deilum. Ég kalla þetta þras. Það hafa öll sjónarmið fyrir löngu komið fram og þeir sem halda umræðunni áfram eru að þrasa.  Mér leiðast endurtekningar og skipti umræðum í 3 þrep. Fyrsta þrepið eru rökræður þar sem menn skiptast á ólíkum skoðunum og færa rök fyrir sinni afstöðu. þetta dugar langflestum og þar á meðal mér. Næsta stig eru deilur. Þar sem menn sem myndað hafa sér skoðanir leitast við að sannfæra gagnaðilann um réttmæti sinna skoðana. Síðasta stig umræðunnar er svo þrasið. Þar eru þeir í essinu sínu sem rífast rifrildisins vegna í algeru tilgangsleysi nema að valda sárindum. Í þessum fasa er mestöll bloggumræðan

[Sæmundur Bjarnason, 14.2.2011 kl. 08:36]

Sammála þér að flestu leyti Jóhannes. Málefni eru útrædd og úrelt þegar skoðanakannanir um þau koma. Skoðanakönnunin um stjórnlagaþingið er samt athyglisverð og nú má rífast um hana. Fjórðungur vill hætta við allt saman. Hvað vilja hinir þrír fjórðu hlutarnir? Hitt og þetta sýnist mér.

[Óskar Þorkelsson, 14.2.2011 kl. 10:08]

afhverju er gat á styttunni ?

[Sæmundur Bjarnason, 14.2.2011 kl. 12:20]

Í sem allra stystu máli er ástæðan sú, Óskar að hraun rann yfir þennan bæ á tuttugustu öldinni og allir þurftu að flýja, en skildu hjartað eftir og komu aftur.

[Óskar Þorkelsson, 15.2.2011 kl. 04:17]

ahh :) takk fyrir þessar upplýsingar Sæmi