1234 - Blogg og aftur blogg

Þessi færsla verður bara um blogg. Blogg í öllum regnbogans litum. Er blogg fjölmiðlun? Er ég þá hluti af fjórða valdinu svokallaða? Bara af því ég hef gaman af að blogga? Held ekki. Þó meira en hundrað gestir líti yfirleitt hingað inn daglega samkvæmt Moggabloggsteljaranum (sem gæti verið lyginn) er ofrausn að kalla þetta fjölmiðlun. Fjölmiðill hlýtur að vera miðill sem mikill fjöldi skoðar reglulega. 

Sumir skoða sinn fjölmiðil nokkuð vel og aðrir verr eins og gengur. En hve marga þarf til að mynda „mikinn fjölda"? Það er þar sem hnífurinn stendur í kúnni. Menn hafa afar mismunandi hugmyndir um slíkt. Fréttatengdu bloggin sem oftast eru stutt og hengd í vinsælar fréttir mörgum sinnum á dag hafa heilmikið forskot hvað þetta snertir og gætu sum líklega kallast fjölmiðlar.

Þetta segi ég ekki af því að mér þyki vinsældaberin súr. Mín skrif eru vinsælli en ég get með sanngirni ætlast til. Auðvitað er það rétt að lítið spennandi væri að blogga með látum eins og ég geri ef lesendur væru alveg örfáir. En hvað eru „örfáir"? Þarna stendur hnífurinn aftur í kúnni.

Var að taka eftir því að númerið á þessu bloggi er áhugavert. En ég hef ekkert hugsað mér að hætta þessari númerasérvisku. Á því má þekkja mín blogg. Stundum skrifa ég mikið, stundum lítið, og öðru hvoru jafnvel ekki neitt. Stundum um margt, stundum fátt. Stundum er ég blár, stundum rauður og allt þar á milli. Pólitík hata ég en get samt ekki látið vera að minnast á hana.

Bloggið sem slíkt er mitt áhugamál. Fésbókin finnst mér ruglandi og ómerkileg. Er vinstri sinnaður og fylgjandi aðild að ESB. Skrifa fremur sjaldan um sjálfan mig nema þá helst í endurminningum. Þar er ég að mestu þurrausinn í bili og óttast auk þess að endurtaka mig um of ef ég fer að skrifa um svoleiðis lagað.

Í gegnum glerið - málverkasýning.

Athugasemdir

[Harpa Hreinsdóttir 18.12.2010 kl. 04:44]

Teljarinn segir ekki allt ... maður sér háar teljaratölur á þessum "í-frétt-linkuðum" örbloggum en samt er yfirleitt ekkert bitastætt þar að finna og líklegt að meirihluti lesenda glepjist þangað inn út af link úr moggafréttinni. Örbloggin eru síðan höfð eins ögrandi og hægt er og skrifi einhverjir komment eru þau oftar en ekki ábending til bloggarans um að hann sé fífl.

Blogg eins og þitt, sem fjallar um hitt og þetta en notar ekki ódýr trix til að þenja teljarann, er miklu meira virði. Því miður virðist þeim fara fækkandi sem blogga frá eigin brjósti og sem maður nennir að lesa. Haltu endilega áfram á sömu braut, Sæmundur; þú ert skemmtilegur bloggari sem ég les daglega! Allt yfir hundrað lesendur á svoleiðis blogg er gott því þessir hundrað eru þá raunverulegir lesendur en ekki ómerkilegir kíkjarar.

[Sæmundur Bjarnason, 18.12.2010 kl. 08:10]

Takk Harpa. Það er einmitt eitthvað á þessa leið sem ég hugsa oft sjálfur. Með sjálfur mér kalla ég flest blogg ýmist "fréttablogg" eða "alvörublogg." Eggert í Vogsósum (meira um hann vonandi í næsta bloggi) kallaði alla menn ýmist "skúma" eða "lóma". Mikið skil ég hann vel. Kallaði sjálfur í eina tíð flesta menn með sjálfum mér ýmist "úlpumenn" eða "frakkamenn." Þetta er ekkert hægt að skýra út í hörgul og auðvitað fráleitt að skipta mönnum bara í tvo flokka.

[Sigurður Þór Guðjónsson, 18.12.2010 kl. 13:46]

Það eru allur glans af blogginu farin. Allt gengur í bylgjum.

[Sæmundur Bjarnason, 18.12.2010 kl. 22:23]

Já, Sigurður. Kannski er mesti glansinn farinn af bloggi og bloggskrifum. Get þó ekki að því gert að ég tek það á margan hátt framyfir fésbókina. Facebook er vissulega ágæt til síns brúks. Þ.e. að fylgjast með ættingjum og frétta af löngu gleymdum vinum og þ.h. Fyrir þá sem eru sískrifandi eins og ég og vilja láta í sér heyra er bloggið að mörgu leyti hentugra. Hraðinn er þó ekki eins mikill þar ef vilji er til að gera bloggin sæmilega úr garði. Eiginlega eru þau millistig á milli vandaðra blaðagreina og óvandaðra kompuskrifa.

[Sigurður Þór Guðjónsson, 20.12.2010 kl. 00:35]

Það er líka tímaspursmál hve nær glansinn fer af fésbók. Og það er jafnvel tímaspursmál hve nær mesti glansinn fer af okkur!

[Sæmundur Bjarnason, 24.12.2010 kl. 00:09]

Þarna greip ég þig glóðvolgan. Þú átt ekki að segja fésbók þegar þú talar um fésbók. Heldur fasbók.

Gleðileg jól.