1206 - 1234 5678 9010

Hvað ætti ég að taka mér fyrir hendur ef ekki væri bloggið? Það er nánast allra meina bót að skrifa blogg. Þú ættir bara að prófa. Já, ég er að meina þig sem hefur álpast til að lesa þetta. Jú, jú ég er kominn með svolitla æfingu en það geta þetta samt allir. Fyrst er þetta ekkert sérlega gaman. Maður er sífellt með hugann við hvað sé óhætt að skrifa um. Hvort þeir sem lesa bloggið fái ekki einhverjar ranghugmyndir um mann eða misskilji allt sem maður skrifar. 

Þegar maður er orðinn laus við þá hræðslu eru manni allir vegir færir. Aðallega þarf maður að athuga að vera ekki alltaf að skrifa um það sama. Eða það finnst mér. Verst hvað ég veit lítið. En mér er alltaf að fara fram við gúglið.

Nú er ég búinn að setja 25 nöfn á listann sem er á „kosning.is". Ætla samt ekkert að segja hverjir það eru. Þarf líka eitthvað að endurskoða röðunina. Þessi persónukosning er annars ári sniðug. Og líka það að vera laus við pólitíkusana sem maður er vanastur við allar kosningar. Kannski borgar sig bara best að kjósa utan kjörfundar. Hræddur um að sumsstaðar gangi nokkuð hægt á kjördag. En búast ekki allir við því?

Nú er ég búinn að sjá að ég get helst ekki opinberað hverjir eru á listanum mínum. Með einhverjum aðferðum er þá kannski hægt að reikna út hve vinstri eða hægrisinnaður ég er. Það er vandlifað í henni verslu. Ég gæti svosem haldið því fram að menn séu þarna mest útaf tilviljunum. Svo gæti ég bara birt númerin. Þá væri veruleg fyrirhöfn að komast að einhverju um mig.

9365 3403 5361 2193 2336 4096 6351 9915 6208 9024 2325 3249 7682 4261 4921 8386 7715 4954 5196 9068 7814 6527 7968 2941 4976.

Það er alveg óviðunandi að hafa ekkert val um neitt annað en þessa úreltu og afdönkuðu stjórnmálaflokka við kosningar. Ef ný öfl bregðast svo líka er eflaust hægt að finna enn önnur.

A: Samkvæmt íslensku óánægjuvoginni er betra að fara í langt bað en stutt.

B: Hvað er íslenska óánægjuvogin?

A: Það er eitthvað forrit sem ég fann uppog allir eiga að trúa.

B: Af hverju?

A: Af því að þar eru hlutirnir mældir og vegnir með vísindalegum aðferðum.

B: Segir þú. Eru aðrir sammála um vísindalega nákvæmni vogarinnar?

A: Auðvitað. Annars verða þeir bara vegnir og léttvægir fundnir.

B: Já, einmitt.

A: Hvað er þetta? Trúirðu mér ekki?

B: Jú jú.

A: Þér finnst kannski eins og ég sé að gera grín að auglýsingum annarra?

B: Nei, alls ekki.

A: Við getum talað meira um íslensku óánægjuvogina ef þú vilt.

B: Endilega.

A: Finnst þér ekki sniðugt hjá mér að hafa fundið þetta upp?

B: Jú, jú. Ég þori ekki að segja annað.

A: Eru þá hræddur við mig?

B: Nei, nei.

A: Það er nú samt alveg eins og svo sé.

B: Kannski óánægjuvogin gleypi mig og mali.

A: Já, passaðu þig bara. Annars er ég að hugsa um að fara og finna upp eitthvað fleira.

B: Já gerðu það. Hafðu það bara ekki eins hættulegt. Og passaðu þig á myrkrinu.

Sá áðan Fréttatímann og þar stendur á blaðsíðu tvö: „Verslunin hyggst bjóða bókina á hálfvirði frá og með deginum í dag og með skilarétti þar til birgðir endast." Gafst upp við að lesa blaðið eftir þessa reynslu. Kíki samt kannski á það seinna. Dettur ekki í hug að halda að blaðamaðurinnn sem skrifaði þetta sé svona vitlaus. Hefur bara ekki nennt að lesa fréttina yfir.

Kringlumýrarbraut að morgni.

Athugasemdir

[Hörður Sigurðsson Diego, 20.11.2010 kl. 00:27]

Er ekki klókt að bjóða bók með skilarétti þar til birgðir endast? Þá er hægt að segja við þann sem vill skila að því miður hafi birgðirnar ekki enst og því sé ekki hægt að skila.

[Sæmundur Bjarnason, 20.11.2010 kl. 00:48]

Hörður, mér finnst bara vitlaust orðalag að segja "þar til birgðir endast." Alveg sama hvernig reynt er að snúa þessu. Mér finnst þetta vera dæmi um það að sá sem skrifaði fréttina var að breyta einhverju en nennti ekki að lesa yfir. Hefur ætlað að orða hugsun sína öðruvísi upphaflega. Annars er þetta fremar ómerkilegt mál eins og aðfinnslur eru venjulega.

[Svanur Gísli Þorkelsson, 20.11.2010 kl. 01:11]

Nú er verið að bjóða Jónínu Ben á hálfvirði og svo má skila henni. Sumt breytist aldrei.

[Sæmundur Bjarnason, 20.11.2010 kl. 07:17]

Já, Svanur Gísli og ég er ekkert viss um að hálfvirði sé sannvirði en skilarétturinn er sjálfsagður.

[Axel Þór Kolbeinsson, 20.11.2010 kl. 11:52]

Það er brosað breitt hér í Hveragerði Sæmundur

[Ragnar Eiríksson, 20.11.2010 kl. 14:03]

Ég er nú aldrei verulega sammála þér en merkilegt nok erum við sammála um 6 af 8 fyrstu númerunum, bara Eiríkur og Svanur falla milli þilja hjá mér! 

Þetta "þar til birgðir endast" er bara ritvilla sem verður að nota meðan birgðir endast!

[Sæmundur Bjarnason, 20.11.2010 kl. 14:33]

Vona að Hvergerðingar séu að hlæja með mér frekar en að mér, Axel.

[Sæmundur Bjarnason, 20.11.2010 kl. 20:02]

Ragnar, sé að þú hefur lagt það á þig að spekúlera í númerunum sem ég skrifaði í síðasta blogg. Listinn er svosem alveg réttur en hugmyndir mínar gætu breyst.