1139 - Fésbókin einu sinni enn

Sálufélag mitt við fésbókarfólk er ekki eins gott og sálufélagið í bloggheimum. Þar hef ég líka búið (skrifað) lengur og þar eru nokkrir búnir að venja sig á að kommenta hjá mér. 

Það er örugglega mér sjálfum að kenna að ég skuli ekki ná jafngóðu sambandi við fólk á fésbókinni og í gegnum bloggið. Líklega ætti ég að fara að fjölga fésbókarvinum mínum. Prófa það. Veit samt ekki hvernig best er að fara að því.

Líka mætti athuga að blogga oftar og jafnvel enn styttra. Líst þó illa á það. Ef eitthvað er stundum varið í bloggskrifin hjá mér held ég að það sé einmitt vegna þess að ég set þau ekki alltaf upp nýskrifuð. Leyfi þeim oft að gerjast svolitla stund. Hætti jafnvel við eða fresta og breyti hugsanlegum bloggum.

Óhnitmiðuð skrif og beint af kúnni ef svo má segja finnst mér yfirleitt henta betur á fésbókina. Finnst líka alltaf að færri sjái skrif þar og séu ekki eins varanleg. En hvað er svosem varanlegt í þessum heimi breytinganna. Ekki bloggskrif.

Um daginn skrifaði ég dálítið um fjölmiðla, einkum um blöðin og bloggarana. Útvarp og sjónvarp minntist ég ekki á. Hvað fréttir og fréttaumfjöllun þar snertir finnst mér einkum bera á fréttastofu ríkisútvarpsins og útvarpi Sögu. Ríkisfréttastofan nýtur talsverðs trausts og fer ævinlega fram með mikilli gát. Kastljós sjónvarpsins er einkum notað til að fjalla um viðkvæm ágreiningsmál. Umfjöllun þar er mjög ómarkviss en vekur oft mikla athygli.

Útvarp Saga hefur skorið sig úr öðrum útvarpsstöðvum og lagt margt gott til mála. Þar er gjarnan tekið á vandamálum sem aðrir fjölmiðlar þegja sem fastast um. Umfjöllun þar er samt oftast óvönduð og illa grunduð. Einkennist gjarnan af persónulegum skoðunum þáttastjórnenda og stjórnenda stöðvarinnar.

Hver er hin pólítíska hugsjón Útvarps-Sögu-liðsins? Mér finnst stefnan þar vera sú að vera á móti sem flestu. Hallmæla öllum og þykjast merkilegri en aðrir. Þegar kosningar nálgast á ég von á að Útvarp Saga muni styðja frjálslynda flokkinn eins og fyrr og eigna sér allan hans árangur. Ég reikna semsagt með að sá flokkur rísi upp aftur og öðlist einhvern þingstyrk.

Annars er mjög erfitt að spá um stjórnmálaframvindu hérlendis. Jón Gnarr hefur vissulega hrist upp í hefðbundnum stjórnmálum og sú kenning Egils Helgasonar, að landsmálapólitíkusar óttist að eitthvað svipað gerist í landsmálum og í sveitarstjórnarkosningunum í Reykjavík síðastliðið vor, er alls ekki fráleit.

Gömul flugbraut fyrir geimför (líklega). Skammt frá Hjörleifshöfða.

Athugasemdir

[Jóhannes Laxdal Baldvinsson, 14.9.2010 kl. 00:31]

Sæll Sæmi, Ég er sammála þér varðandi hnignun Útvarps Sögu. Það er einhver sjálfseyðingarhvöt í gangi þar sem veldur því að mér líður sífellt ver ef ég festist lengi í að hlusta á þá stöð. þetta dekur við þingmenn Sjálfstæðisflokksins (Pétur Blöndal, Guðlaug Þór o.fl), Kvótagreifa LÍÚ (Guðmundur Franklín)og hrunherjana (auglýsingaþáttur Iceland Express) er alls endis óboðlegt! Og móðgun við heilbrigða skynsemi. Auglýsingahórerí verður líka að hafa takmark. Eins vel og stöðin stóð sig í gagnrýni fyrir hrunið þá veldur það miklum vonbrigðum hvert stefnir nú.

[Sigurður Hreiðar, 14.9.2010 kl. 13:01]

Það er ekki út í bláinn að úti í blánum hefur sjálfkrafa myndast vígorð fyrir Útvarp Sögu: Stöðin sem aldrei sér til sólar.

[Ellismellur 14.9.2010 kl. 15:07]

Hef aldrei hlustað á útvarp Sögu, veit ekki einu sinni hvort hún næst þar sem ég bý. - En varðandi þessa "flugbraut fyrir geimför" við Hjörleifshöfða, getur þetta ekki verið tilraunareitur Landgræðslunnar (spyr sá sem ekkert veit).

[Sæmundur Bjarnason, 14.9.2010 kl. 16:02]

Jú, Ellismellur, áreiðanlega er þetta eitthvað svoleiðis en ímyndunin er stundum skemmtilegri en raunveruleikinn.