1099 - Kristnitökuhraun

Eftir talsverða orrahríð í athugasemdakerfi mínu er nú farið að lægja í Grefils&Kristins-málinu. Búið er að loka báðum bloggunum hans Grefils og er það helsta afleiðing þessarar deilu. Það sem eftir situr að mínum dómi er það að eins og oft vill verða fara bloggdeilur (séstaklega um trúarbrögð) gjarnan úr böndunum. Sigurður Þór Guðjónsson hefur þó oft staðið fyrir slíkum deilum án þess að skaði hafi hlotist af. (Finnst mér). Grefill braut reglur mbl.is í eftirmálanum og verður að gjalda þess. 

Að annar deiluaðila skuli hafa haft úrskurðarvald í sambandi við form umræðnanna sjálfra er galli sem aðilar hefðu átt að sjá í upphafi. Það sem skeð hefur í þessu máli í dag fyrir utan lokunina sem áður er áminnst er að Kristinn kvartaði við mbl.is útaf fyrirsögnunum hjá Grefli og síðar náðu þeir samkomulagi á bloggsíðu Óskars Helga Helgasonar (svarthamar.blog.is) en það samkomulag fór síðan í vaskinn og ég veit ekki hvernig þessu reiðir af.

„Hverju reiddust goðin þá er hraun það brann sem nú stöndum vér á?" Sagði Snorri goði á Alþingi fyrir margt löngu. Þetta var gáfulega ályktað hjá honum og ekki aðrir klárari í jarðfræðinni á þeim tíma. Þá bjó annar goði sem Þóroddur var nefndur á Hjalla í Ölfusi. Gott ef hann var ekki lögsögumaður. Þá var Kristnitökuhraunið (sem enginn veit nú hvar er) að renna í áttina að Hjalla. Var Svínahraun kannski Kristnitökuhraun? Minnir að ég hafi einhverntíma heyrt því haldið fram.

Nú er ég búinn að finna aftur bloggið hans Davíðs Þórs. Það var Harpa Hreinsdóttir sem vísaði mér á það. (Já, ég er spar á linkana. Man ekki linkinn á Davíð - gúglið hann bara.) Var nefnilega alveg búinn að týna honum. Setti hann umsvifalaust í „readerinn" minn en þar eru samankomnir allir mínir uppáhaldsbloggarar. (Og jafnvel fleiri) Ég sé Fréttablaðið afar sjaldan (og nenni jafnvel ekki að lesa það ef ég sé það). Davíð Þór skrifaði bakþanka í blaðið um daginn um norðlensku hljóðvilluna. Gott hjá honum. Annars virðast ekki mjög margir haldnir þessari villu á háu stigi og gaman er að heyra hermt eftir henni.

Nú er sumri tekið að halla og útihátíðir hafa flestar tekist ákaflega vel þó nú sé á mánudegi farið að rigna hér í Kópavoginum. Mikið hefur verið drukkið af bjór og víni og margir setjast nú til vinnu endurnærðir á sál og líkama.

Athugasemdir

[Grefillinn Sjálfur, 3.8.2010 kl. 02:16]

Sæmundur ... bara leiðrétta eitt ... ég braut engar reglur mbl.is og á því ekki að gjalda neins ... nema ef það að segja sannleikann sé brot á reglum Mbl.?

[Theódór Norðkvist, 3.8.2010 kl. 02:59]

Tek undir með þér að það var misráðið að annar deiluaðila skyldi fara með úrskurðarvald í sambandi við form umræðnanna.

Ég vil reyndar ganga lengra og halda því fram að það hafi verið misráðið að láta umræðurnar fara fram á bloggi annars hvors þátttakandans.

Deiluefnið hefði verið best að leiða til lykta á hlutlausum vígvelli. Þ.e.a.s. ef umræðuaðilar hefðu getað komið sér saman um slíkan vettvang.

[Grefillinn Sjálfur, 3.8.2010 kl. 03:08]

Ég treysti Kristni til að gera þetta heiðarlega. Hann virkaði ærlegur áður en þetta hófst allt saman og reglurnar bæði skýrar og einfaldar - fannst mér alla vega.

[Sæmundur Bjarnason, 3.8.2010 kl. 07:15]

Morgunblaðsmenn eiga bloggsvæðið og ráða yfir því. Framhjá því verður ekki komist. Auðvitað túlka þeir sínar reglur sér í vil. Það er líka auðvelt að sjá eftirá að ykkar eigin reglur hefðu átt að vera öðruvísi. En svona fór þetta og best að reyna að gera gott úr þessu og hætta að rífast.

[Jóhannes Laxdal Baldvinsson, 3.8.2010 kl. 07:30]

Davíð er góður. Bloggar bara of lítið og er ekki á blogggáttinni. Ég er algerlega búinn að fá upp í kok af trúmálaþvælunni. Skil ekki í Hrannari Baldurssyni að vera að trolla þetta undir merkjum heimsspekinnar. Slíkar hugleiðingar eiga frekar heima í blaðagreinum heldur en á opnu bloggi.

[doctore 3.8.2010 kl. 09:22]

Þetta hefði átt að gerast á bloggi hjá 3ja aðila... Eins og hjá mér, ef ég væri með blogg hér... þar sem ég er strangheiðarlegur og læt ekki hafa áhrif á mig þó menn séu trúaðir eður ei.

Ég hef alveg sérstakan áhuga á að trúaðir tjái sig... ekkert virkar betur til að fá fólk úr trúarbrögðum :)

[Kristinn Theódórsson, 3.8.2010 kl. 10:04]

Málavextir - stutta og skýra útgáfan - lokaorðið um Grefil (Guðberg)

Sáttahöndin hefur löngu verið rétt fram, en getur Grefil hætt?

[Sæmundur Bjarnason, 3.8.2010 kl. 11:59]

Jóhannes, þú segir að sumt eigi fremur heima í blaðagreinum en opnu bloggi. Mér finnst bloggið alveg geta tekið við þessu. Það sem vantaði hjá Grefli og Kristni var ritstýring. Deilur af þessu tagi virðast ekki geta þrifist án þess. Heimspekilega og rökfræðilega hliðin á þessu öllu saman kemst til skila hvert sem umræðuefnið er.

[Grefillinn Sjálfur, 3.8.2010 kl. 12:46]

Umræðan er alfarið komin hingað svo maður þurfi ekki að vera að svara á öllum síðum úti um allt.

Vonandi lýkur þessu máli hér í dag.