1091 - Sennilega er þetta búið

Nú er farið að tala um „lausn" á Magma-málinu sem einhvers konar björgunarleiðangur til að bjarga lífi ríkisstjórnarinnar. Í mínum huga er hvers kyns löggjöf sem gerir greinarmun á „Íslendingum" og „Útlendingum" dæmd til að mistakast. Hægt verður að túlka hana endalaust með ýmsu móti og leppa hvaða misgjörðir sem er.

Að leigja nýtingarrétt á hitaorku til 65 ára (með möguleika á helmingi lengri tíma) og gefa útvegsmönnum „nýtingarréttinn" á fiskinum í sjónum eru mál sem verður að leysa. Þetta er sala (eða gjöf) á náttúrauðæfum hvað sem hver segir. Ef hægt er að koma í veg fyrir að stjórnmálamenn og hagsmunaaðilar nýti þetta í eigin þágu er mun skárra að þjóðin (þ.e.a.s. ríkið) eigi þetta allt saman.

Undarleg árátta þessar skoðana-auglýsingar sem bloggið er. Sjálfur er ég illa haldinn af þessum kvilla. Öðrum finnst þær skoðanir sem ég auglýsi hér kannski merkilegar. Ekki mér. Mér finnst þær sjálfsagðar og eðlilegar. Svo er ég alltaf að breyta þeim því það er svo gaman. T.d. er ég núna alveg kominn á þá skoðun að það gáfulegasta sem ríkisstjórnin gæti gert væri að boða til kosninga.

Já, ég veit að það er stutt frá síðustu kosningum en það er gott að kjósa ört á tímum sem þessum. Þjóðaratkvæðagreiðslan í vor var hálfgert ómark og virðist ekki hafa haft nein áhrif.

Og nokkrar myndir, því ég á svo mikið af þeim:

Akranes fólkvangur, listigarður, skógrækt eða eitthvað þessháttar. Golfvöllur á bak við trén.

Göngubrú yfir Varmá hjá Reykjakoti skammt fyrir ofan Hveragerði. Draugur eða vatnsdropi fremst á myndinni.

Hér grilla menn af hjartans lyst. (Listilega kannski líka).

Akrafjall í öllu sínu veldi.

Fjalldalafífill.

Drullupollur.

Leyfar af stíflumannvirki.

Athugasemdir

[Jóhannes F Skaftason 29.7.2010 kl. 00:00]

Ekki er ég viss um að vísir menn samþykki heitið Varmá svona ofarlega í þessari á þar sem hver kafli eða bútur hefur sitt sérheiti.

Grétar á Reykjum er örugglega ekki ánægður með þig þarna 

[Sæmundur Bjarnason, 29.7.2010 kl. 00:15]

Minn skilningur er að eftir að Reykjadalsá og Hengladalsá eru komnar saman heiti áin Varmá og síðan Þorleifslækur seinna meir. Hvenær byrjar áin að heita Varmá eftir þínum skilningi? Viðurkenni Grétar ekki sem hæstarétt í þessu máli.

[Jóhannes F Skaftason 29.7.2010 kl. 20:27]

Það verður að segjast að ekki er ég fróður um blessaða ána. En bæði Grétar og svo líklega Björn Pálsson, aðfluttur maður er kenndi lengi í Hveragerði, vann þar svo í bankanum og gerðist síðan skjalavörður á Selfossi eru sennilega manna fróðastir um slík efni að Þórði á Grund gengnum. En Grétar hélt langa tölu yfir mér um ána fyrir nokkrum árum þar sem bæði Sauðá og Grændalsá komu við sögu. Hefði ég betur sleppt athugasemdinni því þegar á reynir sé ég að mig brestur minni.Var bara svo kátur yfir að hafa sigrast á ritvörninni. Bestu kveðjur Smundur.

[Sæmundur Bjarnason, 30.7.2010 kl. 00:03]

Já, já. Mér þótti alltaf merkilegt að þessar fjórar ár mynduðu Varmá sem varð svo að Þorleifslæk niðri í forum. Grændalsá vil ég nú kalla Grensdalsá og það sem stendur í mér er einmitt hvað áin heitir frá ármótum Hengladalsár og Reykjadalsár og þangað sem Grensdalá rennur í hana. Nær hún kannski ekki Varmárnafninu fyrr en þar sem Sauðá rennur í hana? Merkilegt mál og hreint ekki einskisvert.