1029 - Sylvía Nótt og Jón Gnarr

Það var tími til kominn að stjórnmálin fengju sína Sylvíu Nótt. Að mörgu leyti er Jón Gnarr einmitt það. En stjórnmálamennirnir áttu þetta skilið. Ef Jón Gnarr fær meirihluta í Reykjavík þá er það bara merki um að stjórnmálin þar hafi verið komin í algert öngstræti og að hann sé að bjarga þeim úr því. Reykjavíkurlistinn hafi í rauninni ekki verið neitt betri en Sjálfstæðismenn. Sem er slæm tilhugsun.

Af ýmsum ástæðum var ég á sínum tíma mikill aðdáandi Sylvíu Nóttar og fékk bágt fyrir víða. Fyrir mér lauk ævintýri hennar ekki fyrr en í Grikklandi þegar hún reifst og skammaðist yfir að komast ekki áfram. Það var of langt gengið því aumingja Grikkirnir skildu ekki brandarann.

Ég vorkenni þeim svolítið sem eiga 5000 vini á fésbók. Sjálfur á ég bara nokkra tugi og finnst það nóg. Svo tefli ég líka á fésbók og fer þessvegna þangað inn nokkuð oft. Samt finnst mér að mínir vinir séu ekki að skrifa mjög oft. Sem er ágætt.

Í fyrndinni fórum við bræðurnir þrír (það er mínus Bjössi) oft saman í bað og skemmtum okkur vel. Af einhverjum ástæðum hafði mamma okkur alltaf í sundskýlum við það. En það var mikið fjör og mikið gaman. Mikill hávaði líka er ég viss um. Okkar helsta íþróttaiðkun var að kasta þvottapoka þannig upp í loftið á baðinu að hann festist þar. Kom samt alltaf niður á endanum en ef hann tolldi þar dálitla stund var það mikill sigur. Man samt ekki hvort tími var tekinn eða hvernig stig voru reiknuð en mikið gekk á.

Sagt við Goldfinger-Geira: (er mér sagt)

Seðlum fleiri á súlumey
sýnist illa varið.
Ballarmiðið bregst mér ei
ef bikinið er farið.

Sé að það er kominn tími á myndir. Kannski ég reyni að finna einhverjar.

Hér er margt hættulegt.

Ástæðulaust að nýta ekki þessa fjárans ljósastaura fyrst þeir eru þarna.

Hef ekki hugmynd um hvað þessi er að gera.

Heimspekilegur köttur.

Ljón í veginum.

Athugasemdir

[TómasHa, 25.5.2010 kl. 00:19]

Því miður verða það kjósendur en ekki stjórnmálamennirnir sem munu verða fyrir barðinu ef ævintýrið endar eins og í Grikklandi.

[Grefillinn Sjálfur - Koma svo! 25.5.2010 kl. 00:33]

Þessi þarna á mynd #3 er að moka. Ég er nokkuð viss um það.

[Emil Hannes Valgeirsson, 25.5.2010 kl. 00:50]

Mér finnst neðsta myndin lýsa rótum vandans.

[Sæmundur Bjarnason, 25.5.2010 kl. 08:38]

 Takk allir!

 TómasHa, já kjósendur tapa alltaf hvort eð er.

Grefillinn sjálfur - kíktu við, já hann er örugglega að moka, en að hverju er hann að leita?

Emil, já en hvar lá slóðinn áður en tréð var fellt?

[Sæmundur Bjarnason, 25.5.2010 kl. 08:40]

Kannski þetta með rót vandans sé klassíska dæmið um eggið og hænuna. Hver veit?

[Sigurður Hreiðar, 25.5.2010 kl. 13:49]

Ef Georg Bjarnferðarson og Sylvía Nótt verða sigurvegarar kosninganna í Reykjavík held ég sé mál að óska bara góðrar nóttar.

Annars held ég Sæmundur, að þú sér farinn að eyða of miklu tíma á Smettu og leggir minni rækt við bloggið en þú gerðir áður.

[Grefillinn Sjálfur - Koma svo! 25.5.2010 kl. 19:40]

Maður þarf nú ekki að vera að leita að einu né neinu til að hafa gaman af því að moka. Tala nú ekki um á ströndinni.

En kannski hefur hann bara tapað sjálfum sér?

Af hverju eru annars allir allt í einu farnir að tala um Sylvíu Nótt? Var hún ekki löngu dauð?

[Ellismellur 25.5.2010 kl. 20:03]

Ja, hérna, Sæmundur. Nú var orðið of langt síðan ég hafði kíkt í bloggheima. Segi þér ástæðuna prívat ef við hittumst. En ég hef verið að velta fyrir mér einni grundvallarspurningu. Hún er: Af hverju spillast stjórnmálamenn? Gæti hugsast að það sé vegna þess að of fáir kjósendur taki þátt í stjórnmálastarfi og það skorti því aðhald? Getum við ekki verið sammála um að án stjórnmálaflokka og stjórnmálastarfs sé lýðræðið lítið nema nafnið eitt? Nú virðist öll umræða snúast um að allt sé vont við stjórnmál, stjórnmálaflokka og stjórnmálastarf. Hver hagnast á því að við rústum grundvallarstoðum lýðræðisins?

[Grefillinn Sjálfur - Koma svo! 25.5.2010 kl. 22:36]

Af hverju spillast stjórnmálamenn? Ég veit að þú varst ekki að spyrja mig ... en ég ætla samt að svara:

Af peningum.

Og við megum alls ekki rústa grundvallarstoðum lýðræðisins, en við VERÐUM að taka til í spillingagrenunum.