1027 - Enn eitt bloggið um Jón Gnarr

Besti flokkurinn er málið í komandi sveitarstjórnarkosningum. Á önnur ný framboð er ekki minnst. Jafnvel þó grínframboð séu. Menn eru með böggum hildar útaf þessari uppfinningu Jóns Gnarr. Áróðurinn nú beinist einkum að því að þeim sé nær að láta svona og þeir viti ekki hvað þeir séu að fara útí. Menn eru semsagt búnir að komast að þeirri niðurstöðu að úrslit kosninganna verði þannig að flokkurinn fái verulegt fylgi. 

Ég er þeirrar skoðunar að borgarfulltrúar úr besta flokknum verði bestu borgarfulltrúar sem um getur. Jafnvel þó þetta með ísbjörninn geti dregist eitthvað þá verða þeir lausir við að þurfa að hygla hinum og þessum sem hjálpað hafa þeim að ná þessum árangri.

Þeir verða auðvitað að vinna eins og menn og munu gera það. Eyðslusemi og yfirdrepsskapur er það sem fólk ætlast til að hverfi úr rekstri borgarinnar. Þetta verður því enginn dans á rósum fyrir þá bestaflokksmenn. En ég hef meiri trú á þeim en atvinnupólitíkusum og vonast til að þeir fái hreinan meirihluta í borginni.

Sem betur fer hef ég ekki kosningarétt í Reykjavík og þarf þess vegna ekki að gera upp við mig hvort ég styð Jón Gnarr eða ekki. Hef ekki einu sinni áhuga á Næstbesta flokknum sem ku vera með framboð hér í Kópavoginum þó það hafi eflaust farið framhjá einhverjum.

Hef enga hugmynd um hvað ég væri að kjósa yfir mig með því að styðja þessa grínara. Grunar samt að sumir þeirra kunni að vera hægrisinnaðri en mér gott þykir.

Hvar voru þeir meðan veislan stóð sem hæst? Voru þeir að græða á daginn og grilla á kvöldin, eða sneru þeir því kannski við?

Ef persónan Georg Bjarnfreðarson á að vera einhver skopstæling á vinstrimennsku almennt og Steingrími Jóhanni sérstaklega þá er sú gagnrýni fremur einfeldningsleg.

Athugasemdir

[Hrannar Baldursson, 21.5.2010 kl. 06:22]

Hefur tekist að klína pólitískum skoðunum á þetta grínframboð?

[Sigurður Þór Guðjónsson, 21.5.2010 kl. 14:06]

Ég held að Jón Gnarr sé hægrisinnaður trúmaður, ef ekki beinlínis afturhaldssamur. Man alltaf eftir andstyggilegri grein sem hann skrifaði í Fréttablaðið um öryrkja og ég svaraði í því blaði.

[Guðmundur Bjarnason 21.5.2010 kl. 15:50]

Þegar tæp vika er til kosninga þá er að renna upp fyrir fólki að fátt gott er í vali.

Ég held að Gnarrismin sé komin til að vera, a. m.k. næstu fjögur ár.
Sömuleiðis held eg að 4 flokkarnir megi vara sig í næstu alþingiskosningum.

Ég óska mér alls hins besta fyrir land mitt og fleiri blogga í anda Sæma til að opna augu fólks.

[Guðmundur Júlíusson, 21.5.2010 kl. 21:35]

Mér finnst þú tvístígandi í þessari grein þinni, í fyrstu segir þú að þeir verði bestu borgarfulltrúar sem um geti, og síðan virðist þu ekki eins hrifinn er líða tekur á blogg þitt? Annars er þetta ekki fráleitt með þá skoðun sumra að Jón gæti verið hægri sinnaður trúmaður, ef ekki beinlínis harðlínumaður í sumum skilningi þess.

[Brattur, 21.5.2010 kl. 22:05]

... Besta flokkurinn ætlar að hygla vinum sínum komist þeir til valda...   segja þeir skýrt og skorinort... þeir eru hreinskilnir, meira en hægt er að segja um gömlu þríflokkana... (undanskil VG... finnst þeir heiðarlegir og hreinskilnir)...

... við vitum hvar við höfum Besta flokkinn... þar er sko enginn feluleikur í gangi... megi hann verða fyrirmynd allra flokka í framtíðinni og megi hann ná meirihluta í borginni... þá erum við á réttri leið í uppbyggingunni... 

[Sæmundur Bjarnason, 23.5.2010 kl. 22:01]

Guðmundur Júlíusson. Þeir (fulltrúar besta flokksins) geta vel verið bestir þó ég sé ekki ýkja hrifinn af þeim. Hef litla hugmynd um fyrir hvað þeir standa pólitískt.