972 - Um Moggabloggið

Einhver sem skrifar á vef sem kallaður er „Escape.is" segir: 

Það hefur oft verið rætt í mínum bakgarði um blogg þjónustu mbl.is og áhrifin sem hún hefur haft á blogg kúltúr Íslands. Umræðan er oft á þann veginn að "moggabloggið hafi komið óorði á bloggið". Breytingar á blogg venjum fólks eiga sér eflaust flóknari útskýringar (m.a. tilkoma Facebook) en það er einn punktur sem mig langar að draga fram.

Blogg þjónusta mbl.is er að stórum hluta kommentakerfi á fréttir mbl.is. Til þess að geta kommentað á fréttir á mbl.is þá þurfa notendur að skrá blogg. Með þessari kröfu varð til nýr hópur af bloggurum. Fjöldi fólks sem aldrei hefði annars haft frumkvæði fyrir því að stofna og viðhalda bloggi.

Ég ætla ekki að fara í djúpar vangaveltur um hvað telst blogg og hvað ekki. Ég veit þó að komment eru ekki bloggfærslur.

Þetta er greinilega einn af þeim sem finnst ekki nógu erfitt að blogga á Moggablogginu og að bloggarar séu orðnir alltof margir. Ég hef áður skrifað um slíkt fólk og ætla ekki að endurtaka mitt álit á því. Belgingurinn er þó oft hlægilegur. Það er að vísu alveg rétt að athugasemdir við fréttaklausur eru ekki blogg en ég sé ekki að það skaði neinn þó þær séu taldar þannig eins og mbl.is gerir.

Eftirfarandi segir Jens Guð á sínu bloggi:

Það er einhver svakalega mikill spenningur í loftinu vegna skýrslu rannsóknarnefndar Alþingis um aðdraganda og orsök bankahrunsins.  Það er eins og fólk haldi að í skýrslunni sé eitthvað upplýsandi;  að loksins komi sannleikurinn í ljós.  Ég get fullvissað ykkur um að því fer víðs fjarri.  Það mun nákvæmlega ekkert markvert koma í ljós í þessari skýrslu.  Allt orðalag verður almenns eðlis í loðnum getgátustíl.  Ábyrgð verður ekki vísað á einn né neinn.  Þetta verða aðeins margtuggnar klisjur um að eftirlitsstofnanir hafi brugðist,  menn hafi ekki gætt að sér,  betur hefði farið ef hlustað hefði verið á gagnrýnisraddir,  umsvif bankanna hafi orðið of stór fyrir íslenska hagkerfið,  viðvörunarbjöllur hafi verið farnar að hringja og eitthvað í þeim dúr.  Sannið til.  Skýrslan verður máttlaust plagg,  hvítbók.

Ég er sammála Jens um þetta en bind þó vonir við að margir taki mark á þessari skýrslu og hún verði ekki alveg gagnslaus. Alltof lengi hefur þó verið beðið eftir henni og talað um hana. Alltof oft hefur útkomu hennar verið frestað og alltof miklar vonir eru bundnar við hana til þess að nokkur von sé til þess að hún standi undir væntingum.

Athugasemdir

[Ólafur Sveinsson 27.3.2010 kl. 00:27]

Það verður áhugavert hvernig menn taka á skýsrslunni. Ég held að ekkert markvert komi þaðan.  Jafnvel æsi menn upp, án rökstuðnings?

[Jón Arnar, 27.3.2010 kl. 00:31]

Öh athugasemd við frétt er jú kannski blogg í huga þess er skrifar hana á sínum bloggvef!  Held ég því ekki að við ættum að fara að reyna að gæðaflokka folk eftir hversu djupt það skrifar að okkar eigin mati heldur frekar gleðjast yfir þvi að allir get tjað sig bæði með og án nafns.

[Sæmundur Bjarnason, 27.3.2010 kl. 05:42]

Er í skýrslu ekkert nýtt
engir þurfa að kvíða.
Víkingana frelsið frítt
fer nú senn að prýða.

eða

Er í skýrslu allt mjög nýtt
allir þurfa að kvíða.
Víkinganna frelsið frítt
fer nú senn að líða.

[Þorsteinn Briem, 27.3.2010 kl. 09:38]

Hefur það hér skríllinn skítt,
skegg á körlum mestallt nýtt,
hefur það þó Sæmi sítt,
soldið lengi hefur prýtt.

[Skeggi Skaftason, 27.3.2010 kl. 10:58]

Einfalt ráð til að sía út einnar-línu kommenta-bloggara er að nota blogggáttina, blogg.gattin.is. Kommentabloggararnir hafa fæstir fyrir því - eða vit á- að skrá síður sínar þar.

[hilmar jónsson, 27.3.2010 kl. 12:21]

Ef skýrslan verður í þeim dúr sem Jens spáir ( reyndar fleiri en Jens sem hafa þennan óþægilega grun , þar á meðal ég )

Þá hefur nefndin og þar með alþingi brugðist þjóðinni.

Hræddur er ég þá um að búsáhaldabyltingin virki sem smá æfing í samanburði við þá reiðiöldu sem rísa mun upp.

[Gunnar Th. Gunnarsson, 27.3.2010 kl. 13:08]

Við hverju búast menn eiginlega varðandi þessa skýrslu? Að einhver einn verði dreginn til ábyrgðar?....og þá helst Davíð Oddsson

Bankarunið hér er í grundvallaratriðum nákvæmlega eins og annars staðar í veröldinni. Eini munurinn er sá að hér voru bankarnir allt of stórir miðað við hagkerfi þjóðarinnar og þ.a.l. réði fámenn fjármálaklíka of miklu.

Sumir segja að allir stjórnmálaflokkar á Íslandi eigi sök á því hvernig fór, nema VG. En VG var ekki á móti eiknavæðingu bankanna vegna þess hverjir keyptu þá... eða fengu að kaupa þá. VG var einfaldlega á móti einkavæðingunni, punktur.

En það var bara ekki hægt að komast hjá því að einkavæða bankanna, a.m.k. meirihluta þeirra. Svo er ESB fyrir að þakka... segi ég, en að kenna segir VG. En VG sá ekki bnakahrunið fyrir frekar en aðrir og gerðu þess vegna ekkert til að koma í veg fyrir það, frekar en aðrir. 

[Jóhannes Laxdal Baldvinsson, 27.3.2010 kl. 14:35]

Nú skelfur allt sem skolfið getur
því skýrslan kemur senn
Og hengdir verða hér í vetur
hrunsins ábyrgðarmenn

[Jóhannes Laxdal Baldvinsson, 27.3.2010 kl. 14:36]

Bloggarar velta mjög vöngum
um vandann sem við er að kljást
Rasandi' á áherzlum röngum
og regluverki sem brást

Hér reyndi á þolin mörk landans
sem þraukaði framyfir jól
en öryggið farið til fjandans
og fokið í flest öll skjól

Ástandið enn fór að kárna
og almúginn þoldi ekki meir
Hann hallmælti Davíð og Árna
og helvítis fíflinu Geir

En áður en skall á hér skálmöld
skelkaðir alþingismenn
samþykktu' að setja' af þau stjórnvöld
sem sviku og svíkja víst enn

Úti á Austurvelli
almúginn heimtaði hefnd
skúrkarnir skefldir í hvelli
skipuðu rannsóknarnefnd

Og allir sem ábyrgð hér bera
helst Árni og Davíð og Geir
Makleg upp málagjöld skera
með orðstí sem aldregi deyr

[Finnur Bárðarson, 27.3.2010 kl. 14:36]

Þarna heyrirðu það Hilmar. Skýrslan mun fjalla um aðal sökudólginn sem er VG, ef marka má Gunnar hér að ofan.

[Ólafur Sveinsson 27.3.2010 kl. 15:15]

Þó skipti litlu máli lengur og til að hafa það á hreinu, þá birti SJS bók og greinar, þar sem hann varar við aðstæðunum sem voru að myndast. Þetta var allt frá árinu 2005.

[Þorsteinn Briem, 27.3.2010 kl. 15:17]

Einkavæðingin - Forsætisráðuneytið

[Þorsteinn Briem, 27.3.2010 kl. 17:44]

Sameign þjóðarinnar veðsett - Alþingi

[Ólafur Sveinsson 27.3.2010 kl. 18:36]

Var að fá þessa<<.

Þau lögðu saman lend og kinn

-lostugur var kossinn-

þarna mættust stálin stinn

stólpípan og krossinn.

[Kama Sutra, 27.3.2010 kl. 19:06]

Ég kíkti á þessa Escape-síðu sem Sæmundur fjallar um og get ekki séð að hún sé mikið merkilegri en bloggin hjá okkur örmu vesalingunum hérna á Moggablogginu.

Eða eru berin bara súr?

[Björn Birgisson, 27.3.2010 kl. 20:06]

Gunnar Th. Gunnarsson segir hér að ofan:  "En VG sá ekki bnakahrunið fyrir frekar en aðrir og gerðu þess vegna ekkert til að koma í veg fyrir það, frekar en aðrir."

Ég tel að í umræddri Hrunskýrslu muni annað koma fram. Hrunið átti sér lengri aðdraganda en menn halda fram. Margir vissu að þess væri von, en kusu að stinga hausnum í sandinn, í þeirri von að þetta væri bara vondur draumur. Þessi hópur manna verður vonandi nefndur í Hrunskýrslunni og síðan dreginn til ábyrgðar. 

[Ólafur Sveinsson 27.3.2010 kl. 20:14]

Steini Briem bendir á mjög góðar síður hér að ofan.  Efni til þess að moða úr.

[Þorsteinn Briem, 27.3.2010 kl. 21:35]

Forsætisráðherra: Þjóðaratkvæðagreiðsla um kvótann