937 - Google streetview

Á sínum tíma var ég ákaflega hrifinn af Google-earth forritinu þar sem maður gat skoðað loftmyndir af nánast öllum heiminum og virt fyrir sér gatnakerfi og ýmislegt annað.

Nú er ég nýbúinn að kynnast öðru svipuðu forriti frá Google sem heitir Google streetview og hægt er að nálgast í gegnum Google maps. Þar getur maður til dæmis ferðast eftir götum í tilteknum bæjarhlutum víða um heim og skoðað húsin þar og annað, snúið sér á alla kanta og dregið að sér. Bílar og fólk er þar eins og frosið en vel hægt að skoða það. Ekki er þarna um allan heiminn að ræða, t.d. ekkert frá Íslandi.

Mikið er frá Bandaríkjunum og talsvert frá Norðurlöndunum.Víða hafa þeir Goole-menn farið og margt er hægt að skoða. Myndirnar eru teknar með „fiskiauga"-linsu af bílþaki, sýnist mér. Ég gat T.d. skroppið til Kanarí og skoðað þar hótelið sem ég dvaldi á í janúar.

Ég er sammála Sigurði Þór um að sýn Jónasar Kristjánssonar á blogg er afar þröng. Líka sýn margra annarra. Blogg sem eru nær eingöngu fréttakomment og stjórnmálaskrif virðast njóta mikilla vinsælda. Blogg geta bara verið svo margt annað. Næstum hvað sem er. Sjálfum finnst mér ágætt að blanda öllu saman. Fréttakommentum og allskyns hugleiðingum. Svo virðist sem einhver fjöldi fólks hafi áhuga á slíku.

Margir setja stjórnmál svo mikið fyrir sig að þeir hafa hætt á Moggablogginu. Svo virðist sem sumir þeirra hafi þurrkað út allt sitt. Kommentin líka. Sé að sum gömul komment hjá mér eru horfin. Þetta er svolítið slæmt því stundum er einskonar þráður í kommentunum.

Athugasemdir

[Óskar Þorkelsson, 20.2.2010 kl. 08:57]

takk fyrir mig og lestur þinna blogga undanfarna mánuði :) þú ert fastur liður hjá mér Sæmi yfir morgunkaffinu.  

[Sveinn hinn Ungi 20.2.2010 kl. 08:58]

Mér finnst óþægilegt að vera hér á moggablogginu undir manni sem þekktur er af flestu öðru en umburðarlyndi gagnvart þeim sem ekki lúta honum í einu og öllu.

Þakka ábendinguna með Google streetview. Ætla að prufa það.

Þakka einnig góða ferðasögu frá Kanarí um daginn. Kannaðist við margt úr þeirri lýsingu, enda hef ég farið þangað yfir tíu sinnum og líkað vel.

[Sæmundur Bjarnason, 20.2.2010 kl. 09:14]

Takk Óskar.

Sveinn, mér finnst maður ekkert vera undir Davíð seldur hér á Moggablogginu. Hér er bara ágætt að vera. Auðvelt að blogga og ef maður skráir sig t.d. í Blogg.gáttina þá er fremur auðvelt að finna mann. Varla eru menn svo pólitískir að þeir forðist að lesa Moggablogg!!

[Rafn Haraldur Sigurðsson 20.2.2010 kl. 09:22]

Svo eru sumir sem fóru yfir á eyjuna þegar að Davíð tók við. En einhverra hluta vegna virðast þeir ekki fá nógan lestur þar og þurfa þess vegna að auglýsa bloggið sitt hér á mogganum eins og hún Lára Hanna.

Ég hef ekki orðið var við að hann Davíð hafi verið að hrauna yfir bloggara hér á mogganum, hann er meira að segja það umburðarlyndur að leyfa henni Láru að auglýsa bloggið sitt  á eyjunni án gjalds.

[Þorsteinn Briem, 20.2.2010 kl. 09:29]

I have a girlfriend on Google,
she is very pretty and cool,
in Street View nice,
very street wise,
and she is always in Liverpool.

[Sæmundur Bjarnason, 20.2.2010 kl. 09:52]

Ég kann ekki að yrkja á ensku. Einu sinni gerði ég samt vísu á dönsku. Hún er svona:

En vise paa dansk at digte
drömt har jeg længe om.
Men inspirasjonen vil svigte.
Jeg synes at være tom.

Man eftir einni ágætri vísu á ensku. Veit ekki hver gerði hana. Í huganum tengist nafn séra Roberts Jacks samt þessari ágætu hringhendu:

She is fine as morn´in May,
mild devine and clever.
Like a shining summerday
she is mine forever.

[Sigurður Þór Guðjónsson, 20.2.2010 kl. 11:11]

Það vill svo til að mér er kunnugt um að ýmsir þeir bloggarar sem mikið voru lesnir á Moggablogginu og fóru svo yfir á Eyjuna eru þar MEIRA lesnir en áður.

[Sæmundur Bjarnason, 20.2.2010 kl. 11:40]

Sigurður, þetta með meira eða minna lesnir er hugsanlega ekki marktækt. Við hvað er miðað? Eru róbottar taldir með? Hversu vel er lesið og með hve mikilli athygli? Spurningarnar eru óendanlega margar. Kannski er mest að marka athugasemdirnar. En þær geta líka orðið of margar. Þegar maður kemst ekki einu sinni yfir að lesa þær er fokið í flest skjól. Mínir fordómar.

[Ben.Ax. (Benedikt Jóhannes Axelsson), 20.2.2010 kl. 12:23]

Vísan She is fine er eftir séra Sigurð Norland í Hindisvík á Vatnsnesi. Séra Róbert tók við prestskap af honum en orti aldrei vísu svo vitað sé. En hann var viðförull og sagði margar skemmtilegar sögur og ekki allar dagsannar en þær voru þeim mun skemmtilegri sem hann kryddaði þær betur.

[Jóhannes Laxdal Baldvinsson, 20.2.2010 kl. 19:05]

Vargur brennu barmar sér
blá hendin penna beitir
Margur kennir garminn hér
sá halur Oddson heitir

eða

Heitir Oddson halur sá
hér garminn kennir margur
beitir penna hendin blá
Sér barmar brennu vargur

[Jón Arnar, 20.2.2010 kl. 21:13]

Þetta er frekar nice framtak hjá Google með streetview ég er t.d búinn að sjá bílinn minn á tveimur myndum hér í borg (Kbh) og afturhlutan á sjálfum mér á leið inn um hlið til "frokost´s besøg" á Frederiksberg s.l. sumar

[Sæmundur Bjarnason, 20.2.2010 kl. 21:42]

BenAx, þetta er alveg rétt með Sigurð í Hindisvík, ég man það núna.

Bláa höndin brennir allt,
beitir penna illa.
Úr Dabba blaði kemur kalt
og kannski eintóm villa.

Já, Jón Arnar, þetta með streetview er nokkuð svalt og alls ekki allir sem vita af þessu þó það sé kannski ekki nýtt.

[Ólafur Sveinsson 20.2.2010 kl. 23:05]

Andskoti eru þig skemmtilegir sveinar!!