934 - Hrafn Gunnlaugsson

Einu sinni var ungur maður. Hann hafði gaman af að skrifa. Þegar Menntaskólanáminu lauk gáfu foreldrar hans honum kvikmyndatökuvél. Þau héldu nefnilega að hugur hans stæði til frama á því svið. Svo var þó ekki. Ungi maðurinn vildi nefnilega frekar skrifa. Ákvað að fara til Svíþjóðar og skrifa þar. En hann átti enga ritvél. Ekki lét hann það þó stöðva sig heldur setti auglýsingu í Morgunblaðið um að hann vildi láta kvikmyndatökuvél í skiptum fyrir ritvél. Þessi ungi maður hét Hrafn Gunnlaugsson og heitir enn. 

Hér er það sem ég kem til sögunnar. Þegar þetta var þá var ég nýútskrifaður af Samvinnuskólanum og átti ritvél (vandaða Erica ferðaritvél) sem ég hafði orðið að kaupa mér. Á Samvinnuskólanum var nefnilega kennd vélritun. Ég hafði talsverðan áhuga á ljósmyndun allskonar og hafði fiktað við að framkalla sjálfur. Ég svaraði því auglýsingunni og skipti (að mig minnir á sléttu) við Hrafn.

Hér eru myndir af þessari kvikmyndatökuvél. Ég á hana nefnilega ennþá og Hrafn hefur engan áhuga á henni. Ég hef spurt hann að því. Samt er þetta hugsanlega fyrsta kvikmyndatökuvélin sem hann eignaðist og hann er miklu þekktari fyrir kvikmyndagerð en bókmenntaskrif. Veit samt að hann hefur fengist við slíkt. Er jafnvel ekki grunlaus um að hann hafi bloggað. Örugglega samt ekki mikið og ekki oft. Nenni ekki að gúgla nafnið hans. Aðrir geta gert það ef þeir vilja.

Var um daginn að taka til í drasli hjá mér og rakst þá á þessa vél og eins og hendi væri veifað rifjaðist þessi saga upp fyrir mér.

Vélin er hér með auglýst til sölu.

Athugasemdir

[Brjánn Guðjónsson, 17.2.2010 kl. 00:19]

ég býð forláta ritvél. á sléttu

[Þorsteinn Briem, 17.2.2010 kl. 02:26]

Úr landi Sæmi hrakti hrafn,
en hann er kominn nú á safn,
af krummum ætíð hrifinn Hrafn,
og hrikalega stórt hans nafn.

[Jóhannes Laxdal Baldvinsson, 17.2.2010 kl. 03:58]

Þótt ofmat margan manninn blekki
mistök Hrafns í byrjuninni
Skrattanum að skemmta ekki
og skila Sæma ritvélinni

[Hrannar Baldursson, 17.2.2010 kl. 05:42]

Með þessa kynningu á ensku og með lista um myndir Hrafns á IMDB ættirðu að setja vélina á e-bay uppboð. Þú gætir nefnilega fengið góðan pening fyrir þetta.

[Sæmundur Bjarnason, 17.2.2010 kl. 05:54]

Steini og Jói stanslaust nú
stökur semja bara.
Eru soldið útúr kú
og ekki létt að svara.

[Sæmundur Bjarnason, 17.2.2010 kl. 05:57]

Takk Hrannar. Þetta er ekki galin hugmynd.

[Ari Eldjárn 17.2.2010 kl. 11:26]

Ég hef mögulega áhuga.

Ertu með verðhugmynd?

Æ

[Gunnar Th. Gunnarsson, 17.2.2010 kl. 12:34]

Snjöll hugmynd, þetta með e-bay

[Njörður Helgason, 17.2.2010 kl. 12:58]

Sæmundur, þetta er merkisgripur. Sögulegt tæki sem Krumminn notaði þegar ungur hann var. Gunnlaugur hefur séð soninn verða Fellini norðursins.

Krumminn hefur átt þokkalega spretti.

Þessi sögulega vél væri best geymd á Kvikmyndasafni Íslands.

[Sæmundur Bjarnason, 17.2.2010 kl. 14:02]

Brjánn. Hef ekkert við ritvél að gera. Allavega ekki venjulega. Takk samt.

Ari. Hef enga verðhugmynd. Ef ég set hana á e-bay set ég samt sennilega lágmarksverð á hana. Veit ekki hvað það verður.

Njörður. Veit ekki hvort Hrafn hefur nokkurn tíma notað hana. Sjálfur notaði ég hana lítið og hún er í góðu lagi.

[Njörður Helgason, 17.2.2010 kl. 15:02]

Hrafn hefur kannski leitað að steinum með fiski undir?