510. - Ég er orðinn ansi þreyttur á þessu

Í svefnrofunum sem ég stundum glimrandi góða bloggpistla. Gallinn er bara sá að þegar ég kemst að tölvunni man ég aldrei nema eitthvert hrafl úr þeim. Við þetta verð ég að una og get engu um það breytt. 

Í mínum huga snýst málið ekki lengur um það hvort ríkisstjórnin fari frá heldur einungis hvenær það verður. Geir getur tæplega gert sjálfum sér og öðrum það öllu lengur að þrjóskast við segja af sér. Afglöp hans eru slík að óhjákvæmilegt er að hann fari. Ingibjörgu Sólrúnu er nokkur vorkunn vegna veikinda á slæmum tíma en auðvitað er best að hún fari líka og allir hinir ráðherrarnir einnig. Mín spá er sú að svo margir mæti á mótmælafundinn á laugardaginn kemur að jafnvel Geir sjálfur sjái að sætasta stelpan er ekki í Svörtuloftum. Nú er hann búinn að glata því tækifæri sem hann hafði á að fórna Doddsyni og ekkert minna dugar en að þeir fari báðir og sjáist ekki framar.

Hvað tekur við þegar Geir er búinn að segja af sér? Það er ekki með öllu ljóst. Alþingi ætti að sjálfsögðu að sjá sóma sinn í því að skipa nýja ríkisstjórn. Helst ættu ekki að vera neinir Alþingismenn í henni en líklega þarf þó fólk í hana sem þingflokkarnir geta sætt sig við svo friður skapist. Svo ætti auðvitað að vinda bráðan bug að því að fara að undirbúa kosningar. Tímasetning þeirra getur orðið talsvert vandamál en varla má það dragast lengur en til næsta sumars að kjósa.

Það gengur ekki lengur að halda öllu sem hægt er leyndu fyrir þjóðinni. Í samningum við aðrar þjóðir eru hlutirnir ekki bara svartir og hvítir. Einhverjar millileiðir hljóta að hafa verið athugaðar. Það skiptir meira máli hvernig og hvort samningar takast en hvor vinnur endanlega fyrir dómstólum. Engir geta beðið eftir slíku. Nóg er komið af andskotans biðinni.

Þetta með stýrivextina er hlálegt en bara ein birtingarmynd af ruglinu sem viðgengst hjá stjórnvöldum. Til hvers er eiginlega að hækka stýrivexti eftir kröfu Alþjóðagjaldeyrissjóðsins ef hann ætlar svo ekki að gera neitt. Hvað lá eiginlega á?

Athugasemdir

[Vilhjálmur Örn Vilhjálmsson, 14.11.2008 kl. 16:07]

Þú verður að fá þér draumatengingu við tölvuna. Annars eru bloggin þín oftast nokkuð góð, ef þú ert ekki að hnýta í merka menn eins og mig.