504. - Ástandið er alvarlegt segja Geir og Bjöggi. Bjóst einhver við öðru?

Ég vil ekki skrifa mikið um ástandið í þjóðfélaginu. Verst finnst mér hve lítið er vitað og hve litlar upplýsingar eru gefnar. Kynningarmál öll eru í algeru skötulíki hjá stjórnvöldum. Mér finnst til mikils mælst að fólk sé rólegt og yfirvegað í ástandi eins og hér hefur verið að undanförnu. 

Að skipa ný bankaráð við bankana þar sem eru sérstakir varðhundar flokkanna er einfaldlega afturför sem nemur mörgun áratugum.

Á blaðamannafundinum sem þeir Geir og Bjöggi héldu í dag fannst mér óheilindi þeirra skína í gegnum allt á fundinum. Þegar talið barst að icesave reikningunum fóru þeir einfaldlega undan í flæmingi.

Mér kæmi ekki á óvart þó lán það sem beðið hefur verið eftir hjá Alþjóðagjaldeyrissjóðnum komi aldrei og það sem einkum verði deilt um næstu vikurnar verði þessir blessaðir icesave reikningar. Ég á ekki von á öðru en fjölmenni á mótmælafundinum á mogun. Samstaðan er að lagast.

Merkilegt hve margir af þeim sem maður hittir hafa séð bloggið manns og jafnvel lesið. Sennilega er lesendum mínum talsvert að fjölga og möguleg áhrif mín þar með að aukast. Hingað til hef ég talið þau afar lítil. Kannski verð ég að endurskoða það. Moggabloggurum fer sífjölgandi. Vinsældir bloggsins eru ótrúlegar og ég get ekki séð að þær séu neitt að dvína.

Við sem eldri erum eigum ekki að hatast við unga fólkið. Obama hinn nýi forseti Bandaríkjanna nýtur einkum fylgis meða ungs fólks, kvenfólks og annarra valdleysishópa. Heimsku hvítu karlarnir hans Moores hafa líklega kosið McCain þó Palin hafi verið heldur öfgafull fyrir þá. Öfgarnar þarf að dulbúa vel til að þær njóti almenningshylli. Það kunnu stuðningsmenn Georgs Dobbeljú.

Það er mikið sem gengur á í Netheimum núna. Barack Hussein Obama notaði sér nýjustu tækni í samskiptum á leið sinni í eitt valdamesta embætti veraldarinnar. Á Vesturlöndum mun Netið innan tíðar yfirtaka gersamlega hlutverk hinna gamaldags og afdönkuðu fjölmiðla. Þeir eru flestir á hausnum hvort eð er og fáir sem sjá eftir þeim. Hlutverk þeirra mun fara síminnkandi á næstunni. Þó munu þeir ekki hverfa.

Í lokin eru svo nokkrar myndir sem ég tók um daginn í nágrenni við heimili mitt við Auðbrekku.

Burt með spillingarliðið.

Athugasemdir

[Óskar Þorkelsson, 8.11.2008 kl. 00:17]

Ég les bloggið þitt samviskusamlega á hverjum degi.. oftast rétt eftir að þú setur þá á netið.. en ég svara sjaldan sem kannski skýrsit af því að ég er þér oftast svo sammála og sáttur við þín skrif Sæmi. 

[Lára Hanna Einarsdóttir, 8.11.2008 kl. 00:33]

Ég tek auðvitað undir hvert orð hjá Óskari... eða því sem næst.

Ætlarðu ekki að mæta á Austurvöll á morgun, Sæmi?

[Malína 8.11.2008 kl. 01:56]

Ekki örvænta - við erum mörg hérna úti sem lesum alltaf bloggið þitt!  Ég les það yfirleitt á svipuðum tíma nætur - þegar þú ert nýbúinn að setja inn færslurnar. 

Við höldum áfram að hafa vakandi auga með þér!

[Brjánn Guðjónsson, 8.11.2008 kl. 18:06]

upplýsinga- og kynningamál ríkisstjórnarinnar einskorðast við ekkifréttir á innantómum blaðamannafundum. þar segja þeir lítið annað en það sem fólk veit þegar.

hinsvegar brenna ótal spurningar á fólki og þegar blaðamenn spyrja einhverra þeirra spurninga fást engin svör.

svona eins og í slæmum samböndum, þar sem óþægilegum spurningum og reiði er svarað með þögninni.

[Ben.Ax. (Benedikt Jóhannes Axelsson), 8.11.2008 kl. 20:34]

Þetta er ekki rétt hjá þér, Sæmundur. Það vita allir að allt er að fara til andskotans. Þú getur því farið að skrifa um skemmtanalífið í helvíti til að venja þig við.

[Hriflungur 8.11.2008 kl. 22:27]

Neyðarlögin 6. okt. voru mistök.  Til lengdar hefði verið betra að láta bankana bara fara á hausinn án þess að skipta þeim fyrst upp í innlenda og erlenda starfsemi.

Hugsunin var að verja Íslendingar með húsnæðislán hjá bönkunum.  Erlendir lánardrottnar hefðu annars eignast þessar skuldir úr þortabúum bankana og húsin á eftir. 

En hvað gerist?  Neyðarlögin eru brot á EES, leiða til mismununar eftir þjóðerni og við fáum hvergi aðstoð fyrr en þetta hefur verið leiðrétt.  Allir verða að sitja við sama borð, Íslendingar og útlendingar.  Þjóðin er ábyrg fyrir skuldum óreiðumanna, sem hafa fengið að svíkja út fé í nafni hennar.  Það er grátlegt en stjórnvöld sváfu.