230. - Borgarstjórafarsinn og ýmislegt fleira

Hef verið að fylgjast með mótmælum á borgarstjórnarfundi og vissulega eru þau nýnæmi.

Gamli góði Villi sem var víst borgarstjóri einhvern tíma í fornöld sagði að mótmælin væru skipulögð. Auðvitað eru þau það. En eru þau eitthvað verri fyrir það? Er allt slæmt sem er skipulagt?

Eitt finnst mér ekki hafa komið nógu greinilega fram í öllu moldviðrinu sem þyrlað hefur verið upp í kringum þessi borgarstjóraskipti. Ólafur F. segir að hann hafi fundið að ekki var mikill hljómgrunnur fyrir stefnumálum F-listans meðal samstarfsflokkanna. Það getur verið svolítið til í þessu hjá honum, ef hann horfir einkum á Reykjavíkurflugvöll og gömul hús.

Ég á samt bágt með að trúa því að hann sé svo skyni skroppinn að hann haldi að það verði auðveldara að finna þennan hljómgrunn hjá Sjálfstæðisflokknum, þó þeir hafi verið tilleiðanlegir til að setja einhver falleg orð á blað. Þegar á herðir er ég viss um að Ólafur verður jafnóánægður með undirtektir þeirra. Þá skáka Sjálfstæðismenn í því skjólinu að Ólafur treysti sér ekki til að fara aftur í fang kollega síns, því þá væri hringlandahátturinn kominn út fyrir öll mörk.

Langlíklegast er að Ólafur undirbúi endurkomu í Sjálfstæðisflokkinn og vonist jafnvel til að hægt verði að fá fleiri með sér heim í heiðardalinn. Hann vonar kannski að hann fái völd og áhrif á ný í gamla flokknum en hræddur er ég um að hann lendi í sama pyttinum og óþekkir Sjálfstæðismenn lenda yfirleitt í.

Risafyrirsögn sá ég í einhverjum snepli í dag og var hún þannig: Töldu Margréti með. Fyrst þegar ég sá þessa fyrirsögn hélt ég að verið væri að segja frá einhverjum einföldum mistökum við talningu. En líklega er verið að meina að einhverjir hafi talið að Margrét Sverrisdóttir myndi fylgja Ólafi uppí til Sjallanna.

Bingi greyið komst ekki nærri strax að með sínar fréttir. Það er að segja að hann væri búinn að ákveða að hætta í borgarstjórn. Ég held að Björn Ingi ætli sér enn stóra hluti innan framsóknarflokksins. Ef honum og Valgerði tekst ekki að sveigja flokkinn til fylgisaukningar á þéttbýlissvæðum landsins þá er hætt við að sögu flokksins ljúki fyrir 100 ára afmælið.

Annars er það önnur frétt sem hefur vakið meiri athygli mína í dag og mér þykir jafnvel merkilegri en þessi borgarstjórafarsi og það er að líklega er það rétt að Bobby Fischer hafi átt dóttur.

Ef svo er þá á hún að sjálfsögðu að taka arf eftir hann samkvæmt íslenskum lögum. Reyndar veit ég afskaplega lítið um fjármál Fischers, en veit þó að hann stóð í margvíslegum málaferlum. Öll þau mál verður trúlega að leiða til lykta áður en arfskipti geta hafist.

Stór hluti þeirra fjármuna sem Fischer kann að hafa eftirlátið fer eflaust til þeirra lögfræðinga sem skiptin annast. Mér finnst hæpið að krefjast þess að nefnd sú sem vann að hingaðkomu Fischers á sínum tíma láti sér jafn annt um dóttur hans og hann sjálfan, en auðvitað á nefndin á engan hátt að leggja stein í götu hennar. Kannski reyna þeir bara að nota hana til að fá einhvern hlut í arfinum ef einhver er.

Anna Einarsdóttir í Holti birti magnaða færslu á sínu bloggi í gær og ég hvet alla sem hér koma til að skoða hana. Anna er efst í mínum bloggvinalista. Það er ekki rétt af mér að vera að endursegja þá sögu sem þar er sögð, en óhætt er að segja að hún sé áhrifamikil.

Athugasemdir

[Lára Hanna Einarsdóttir, 26.1.2008 kl. 00:50]

Varðandi skipulagningu mótmælanna... ekki var nema hluti af því fólki sem var á pöllunum í ungliðahreyfingum stjórnmálaflokka. Margir sem þarna voru eru bara venjulegt fólk á miðjum aldri og ég hef séð þónokkra hér á blogginu sem segjast hafa verið þarna. Hörður Torfason söngvaskáld var í viðtali á annarri sjónvarpsstöðinni - varla telst hann til ungliða. Og eru mótmæli eitthvað verri eða óeinlægari þótt þau séu skipulögð?

OG - það er einmitt þetta unga fólk sem tekur við þjóðfélaginu svo ef mótmælin oru einlægn er ekki nema gott að þau geri sér grein fyrir því hvernig á EKKI að gera hlutina.

Mér finnst vafasamt að Ólafur gangi til liðs við Sjálfstæðisflokkinn á meðan hann er í þessari mikilvægu oddaaðstöðu sem nú... hann hefur hreðjatak á flokknum og getur beitt því valdi að vild.

Kærar þakkir fyrir að benda á færsluna hennar Önnu. Ég las hana alla - með hléum - og fann til.

[Anna Einarsdóttir, 26.1.2008 kl. 01:03]

Takk fyrir fallega vísu, Áslaug og Sæmundur.  Hún yljaði.