2476 - Forsetakosningarnar enn og aftur

Satt að segja er mér ofboðið þegar ég les fésbókina og það sem menn þar láta frá sér fara í tilefni af forsetakosningunum. Mér er nær að halda að marga vanti alla sómatilfinningu. Það er næsta víst að ekki eykst tiltrú mín á fésbókinni við þessar forsetakosningar. Jafnvel Moggabloggið er betra hvað orðbragð snertir. Skyldi enginn skammast sín?

Vitanlega fara úrslit forsetakosninganna lítt eftir því hver forsetalegastur er. Og allra síst eftir því hvað einum einstaklingi finnst í því efni. Samt sem áður ætla ég að segja frá því hver þeirra sem venjulega eru efstir í skoðanakönnunum mér finnst vera forsetalegastur.

Satt að segja er það Guðni Th. sem þar hefur vinninginn. Af einhverjum ástæðum finnst mér Andri Snær vera strákslegastur (í góðri merkingu) þeirra allra og ég hef þá trú að hann muni skjótast framúr Davíð á lokasprettinum, en þrátt fyrir góða og skýra framtíðarsýn ekki hafa neina möguleika á að ná Guðna. Halla Tómasdóttir ætti skilið að vera mun ofar, en líklega er stuðningur hennar við útrásarvíkingana og tengsl við þá á árum áður, henni talsverður fjötur um fót.

Af einhverjum lítt skiljanlegum og fárálegum ástæðum virðast minningar fólks úr þorskastríðunum ætla að verða þungamiðjan í þessum forsetakosningum. Ég get bara sagt það um mig að þó ég ruglist stundum svolítið í ártölum í þessu sambandi þá man ég vel eftir þeim. Auðvitað var það svo að allir vissu að Bretar vildu ekki eða fengu ekki fyrir Bandaríkjamönnum að beita sér að fullu. Þeir máttu t.d. ekki drepa menn. Að margir Íslendingar hafi samt sem áður álitið að þeir væru að berjast fyrir lífsafkomu sinni þarf ekki að vera nein mótsögn í sjálfu sér.

Eftirminnilegasta atvikið úr þessum stríðum hvað mig snertir er hve litlu mátti muna að Íslendingar gripu til ófyrirsjáanlegra og afdrifaríkra ráða þegar varðskip stöðvaði togarann Everton fyrir norðan land og hélt honum þar í nokkurn tíma. Ef uppúr hefði soðið þar og Íslendingar gripið til örþrifaráða er ekki að vita hvernig farið hefði.

Mikið er deilt nú um stundir um hvað fram hafi farið í tveggja manna tali milli Ólafs Ragnars Grímssonar forseta Íslands og Sigmundar Davíðs Gunnlaugssonar forsætisráðherra. Sumir virðast jafnvel telja að þetta hafi áhrif á núverandi kosningabaráttu fyrir næstu forsetakosningar. Því fer samt fjarri. Krakkarnir mundu segja að ÓRG hafi haldið kúlinu en SDG ekki. Ég ætla ekkert að segja um þetta, kúlið má bara eiga sig.

Einhver mynd.