2469 - Um Júlíus Vífil og ýmislegt fleira

Nú um stundir virðist það vera Hringbraut sem er einkum á milli tannanna á fólki. Gallinn við alla fjölmiðlun er sá að um leið og viðkomandi miðill verður vinsæll (sem skeður) eru peningaöflin komin og farin að krukka í hann. Farsælast er að treysta RUV-inu hvað sem framsóknarmenn segja. Þeir sem þar eru öðlast smám saman þykkan skráp og þó þau séu aðvitað rekin eins og annað fólk, þá tekur oftast lengri tíma að losna við þau.

Ég sagði eitthvað um Hringbraut hérna áðan, en auðvitað er það ennþá frekar Júlíus Vífill Ingvarsson sem er einkum á milli tannanna á fólki einmitt núna. Hringbrautlingar ráku að vísu Björn Þorláksson, sennilega fyrir of harkalega vinstrimennsku, og hann sættir sig illa við það. Annars er það mál í þann veginn að verða of gamalt til að tala um. Mál Hönnu G. Sigurðardóttur, sem ég ræddi reyndar einu sinni við, er orðið alltof gamalt.

Annars er það einn helsti gallinn á þessum fésbókartímum, sem öllum ber saman um að eru óttaleg trunta, hve hraðinn á öllu er orðinn mikill. Maður hefur ekki tíma til að hneykslast á einu þá er komið nýtt hneykslunarefni. Meira að segja Borgunarmálið, sem er ansi stórt, hefði horfið í gleymskunnar dá ef ekki hefði verið fyrir fáeina alþingismenn. Eins slæmir og þeir oftast eru.

Fækkun fæðinga er alvörumál. Sama er að segja um fjölda þeirra sem flytja frá landinu. Eflaust eru margar skýringar á þessum málum. Að ekki sé vitað neitt um eða skýrslur til um þá sem flytja frá landinu er sömuleiðis alvarlegt mál. Fæðingum fækkar áreiðanlega vegna þess að ungu fólki finnst erfiðara að lifa en áður. Fæðingarorlof gæti skipt máli hér. Ef það eru einkum sérfræðingar og vel menntað fólk sem flytur í burtu frá landinu gæti það þýtt að afkoman hér á landi sé ekki eins góð og af er látið. Vitanlega hafði Hrunið og atvinnuleysið í kjölfar þess sitt að segja, en eftir því sem sagt er ætti það ekki að virka lengur.

Einn er sá maður sem hefur ásakað mig um að stinga sig í bakið (í óeiginlegri merkingu þó). Það er hann Villi í Köben. Hann heitir reyndar Vilhjálmur Örn Vilhjálmsson og vinnur að ég held hjá póstþjónustunni í Kaupmannahöfn. Mér finnst hann orðljótur með afbrigðum og hann sér gyðingahatara í hverju horni. Held hann sé lærður fornleifafræðingur og hann langar greinilega til að vera álitinn merkur sagnfræðingur en sennilega er hann fullfljótfær og síonískur í hugsun til þess. Kvartar stundum við mig undan því að ég minnist á hann án þess að sérstakt tilefni sé til. Hann er Moggabloggari eins og ég og ekki veit ég betur en að það sem hann skrifar sé talsvert lesið.

Einhver mynd.

Athugasemdir

[Ellismellur 19.5.2016 kl. 15:58]

Varðandi það mál, sem þú nefnir og snýr annars vegar að fækkun fæðinga og hins vegar að flótta menntafólks úr landi, þá er að mínu mati þar talsverður áhrifavaldur að störfum fyrir fólk með menntun hefur ekki fjölgað hér á landi síðustu ár. Heldur fækkað ef eitthvað er, því hagræðing t.d. í fjármálakerfinu hefur frekar orðið til þess að fækka störfum fyrir menntaða einstaklinga. Nýsköpun hefur lítil orðið enda fátt gert af hinu opinbera til að hlúa að henni, sem og verður fjarlægð landsins frá mörkuðum sem skipta máli til þess að fólk með góðar hugmyndir býr þeim frekar á fæturna erlendis en hér. Hér hefur aukning starfa fyrst og fremst verið í láglaunastörfum eins og ferðaþjónustu. Svo má ekki gleyma því að víða, eins og til dæmis í framkvæmdum, er hyllst til að fá starfsfólk með milligöngu erlendra verktaka og starfsmannaleiga, þar sem hægt er að komast af með kjör og aðbúnað starfsfólks, sem fólk hér og á Norðurlöndunum myndi aldrei sætta sig við. Eykst þetta frekar en hitt.

[Erla Magna Alexandersdóttir, 19.5.2016 kl. 22:11]

skemtileg skrif ! he he he